Gambup Makaipi Makaih Ki-ukna (Presidentialism) ~ Bob Tuangpi

Gambup Makaipi Makaih Ki-ukna (Presidentialism) ~ Bob Tuangpi

Gamkhat bangcidanin kilamh ding leh kimakaih ding cih pen gambup thukhunpi (constitution) ah kiciantakin kigelh hi. Tua bang gam ki-ukna atamzaw thamtham nam (3) leitung gam kimakaihna ah ki limzat hi. Gambup makaipi makaih gam ukna (Presidentialism); gambup thuvanpi makaihna ki-ukna (Parliamentarianism) ban ah gambup makaipi makaih ki-ukna leh gambup thuvanpi makaih ki-ukna nih kigawm gam ki-ukna (Hybrid Regime) ci’n nampi thum kikhen hi.

Tua sung pan gambup makaipi makaih (Presidential rule) gam icih ciang’n; gam kimakaihna ah gambup makaipi (president) in gambup ii lutangpi leh gambup kumpi makaipi (head of the State & head of government)ahihi. Gambup makaipi in gambup innpi tungah mawhpuak alak ban ah gambup kumpi tanu tuamtuamte (cabinet ministers) khempeuh ama deih bangbang munpiak theihna (nomination) bawl thei hi. Ama munpiak mite mawhbanna a om kei naak leh gambup innpi (Union Assembly/Congress) in kipsakna neithei-in nialtheihna zong nei uh hi.

Gambup ah gam makaipi in alian pen thuneihna leh dinmun nei hi. Tua ciangin gambup kumpi sung mun tuamtuam (ministry/department) ah tanu sem dingte (cabinet ministers) gambup pen taangmi (member of parliament) ahih teekteek kullo-in gambup makaipi in paubanna a om kei naak leh seh ziauziau thei lel hi.

Tua teng ban ah gambup makapi pen gambup thukhunpi in apiak akiciangtan zah dong( term khat kum 4(or)5) kiptakin sem thei ahih manin gambup innpi (Union Assembly/Congress) in muanmawhna leh mawhpaihna (vote of no confidence) tawh gambup innpi taangmi te’n gambup makaipi hemkhia ziauziau theilo uh ahih manin; gamsung ah party khat leh khat ki-elna leh kihazatna hangin apiangthei zel gamsung buaina leh lungphonate gambup makaipi (president) in lenkipzo ahih manin gambup thuvanpi’ makaih ki-ukna (parlamentary system) tawh ki lamdang ahih manin gambup makaipi’tutna aciangtanhun dong kippaisuak (stable) zaw hamtang hi.

A thupi mahmah khat ah gambup makaipi (President) in gambup galkapte’makaipi (commander-in-chief) zong hipah ahih manin galkap mangpipa (minister for defence services) adeih leh deihloh zui-in munpiakna leh hepkhiatna neithei lai hi. Gambup makaipi ki-makaihna azangh gamte (gtna: USA; S.Korea; Phillppines; Indonesia; France) gamte in hih gam kimakaihna tawh na kalsuanin na lawhcing mahmah uh hi.

Adiakdiakin; USA bang gambup makaipi in gamthu ah thuneihna (political power) muibuntakin zangh thei aa; gambup kiteelpi (presidential election) ciangin zongh mipi in gambup makaipi (president) mimal khat ciat mee-tang (vote) tawh teltheihna (direct voting) nei pah uh ahih manin gammite lungkim phadeuh uh hi. by: Bob Tuangpi