Israel ah Palestine mi Lorry Driver khatin Israel galkap 4 phulum

Israel ah Palestine mi Lorry Driver khatin Israel galkap 4 phulum

Jan. 9, 2017: Zan in West Jerusalem khuapi ah Israel galkap ten khualzinmite muhnopna mun (tourist spot) – Old City a om Dome of Rock leh mun tuamtuam en in a om lai un Palestine mi van puakna mawtaw (lorry) hawl khatin a lorry tawh Israel galkapte mi li a phuklupsak banah mi 15 kiim in liamna tuak hi. A lorry hawlpa kikaplum hi ci-in United Hatzalah emergency service a sem Arie Jaffe in ci hi.

West Bank a om Ramallah khua-a Palestinian security ulian ten mawtaw hawpa pen East Jerusalem sunga om Jabal Mukaber kicihna mun a teng hi ci uh hi. October 2015 panin Palestine ten lungphona neih na kipan uh a, tua khit nung tu dong Israel police leh galkap ten Palestine mi 247 that ta uh a, Palestine ten Israelte mi 40 that ta uh hi.

Palestine mi a kithatte pen tem tawi a mi leh galkapte dawt, thau tawi leh car zanga mi phulumte ahi hi. Pawl khatte pen lungphona neihna ah kinawktuahna a kikaplum hi a, pawl khatte Israel in Gaza Strip tung lam panin a kapna hanga si ahi hi. Tua loin October 2015 khit nung US gammi nih,Jordan gammi khat, Eritrea gammi khat leh Sudan gammi khatin zong sihna na tuak ta hi.

More: Singapore Changi Airport sungah numei khat kum 8 sung teengcip

Israel police spokesman Micky Rosenfeld in sihna tuak galkapte Old City panin Jerusalem lim takin a kimuhtheihna mun (scenic view) en dingin bus ah a tuan lai un tua mawtaw hawl pa in a bus tuanna uh thakhat thu-in phusak hi ci hi. Source: The Hindu/ Thang Khan Lian