Gambup kilemna maban (Union Peace Process -21st Century Panglong)

Gambup kilemna maban (Union Peace Process -21st Century Panglong)

A (3) veina gambup kilemna khawmpi Union Peace Conference-21st Century Panglong pen hong tung ding May kha kal nunung ( last week of May, 2018) sung bawlzah ding ngimna kinei hi cih avaisai thunei khat in kipsakna nei hi.

Tua adingin athupi pen in tuama Nationwide Ceasefire Agreement Sign thuh nunung pen mualmi thautawi ahi New Mon State Party ( NMSP) leh Lahu Democratic Union (LDU) te in NCA thukhun ah a omsa bangin amau’ minam dinmun kikup masakna (National Level Dialogue) aneih masak ding uh kisam ding hi.

Tua teng ban ah tulaitak NCA sign thuh dingin akithawithawi pian Karenni National Progressive Parry ( KNPP) te leh gambup kilemna vaihawmpawl (Peace Commissioner) teng tutung 26-27, 2018 sung teng Kayah State khuapi Loikaw ah kamkupna nasiatak aneihlaitak uh zongh ahihi. Hong tung ding a (3) veina 21st Century Panglong khawmpi ma kiginkholhna khat zong hi gige hi.

KNPP ahih leh mualmi thautawi kipawlna United Nationalities Federal Council (UNFC member) khat ahih ban ah Kayah State Level leh Union Level dong ah kumpi tawh kilemna abawlkhin (Bilateral Peace Agreement) anei khin uh hi aa, Nationwide Ceasefire Agreement (NCA) bel thukimna neinailo uhhi.

Zomi te’Kiginkholh Ding leh Muhkholh Ding Thu

A tung ah igengensa gambup kilemna khawmpi 21st Century Panglong Khawmpi ahong piankhiatna abulpi leikhamangpi pen Zomite’ minam party ahi Zomi National Congress/Zomi Congress For Democracy in 2010 kumin party makaipi Pu Chin Sian Thang’ innpi Kalaymyo tangkona pan hong piangkhia ahihi cih thu imangngilh loh ding akisap mah bang tua ii agah ilawhkhak ding zong athupi pen ahihi. Tua ahih manin, ahong tung ding a (3) veina gambup kilemna khawmpi-21st Century Panglong khawmpi ading Zomi thautawi kipawlna leh Zomi Party abaihsa-in ikiginkholh hunta hi.

Gambup Kilemna Khawmpi Kikup Ding Thuguipite

Gambup kilemna khawmpi (21st Century Panglong) ah akikup ding thuguipi nam (5) kiseh hi. Tuate in:

• (1) Gamvai -Political Sector Principles
• (2) Sumlei sumzuakna Vai – Economic Sector Principles
• (3) Leitang leh Leisung Sumpiang Vai – Land and Natural Resource Sharing Sector Principles
• (4) Nuntak Khuasakzia Vai – Social Sector Principles
• (5) Gamsung Bitna Lam – Security Sector Principles cihte ahihi.

Hih atung aa thuguipite’ lak ah ahong tung ding gambup kilemna khawmpi ah kikup ding bulpite pen Gamsung Bitna -Security Sector Principles leh Gambup Gamcai Bulpi – Political Sector Principles te hong hiding ban ah khauhpai pen ding hi. Adiakin gambup bitna dingin gambup galkap khat neih ding vai (Federal Army/Union Army) leh 1947 Panglong thukimna omsa bangin, mualmite’ Kawlgam pan inntuan theihna (Right to Seccession) cihte hong kuitung mahmah ding hi.

Myanmar gamsung mualmi thautawi kipawlna ah athahat penpen Federal Political And Consultative Committee (FPNCC -group -7), Nationwide Ceaaefire Agreement (NCA signatories Group -10) leh United Nationalities Federal Council (UNFC) cih bangin khenpi (3) pha hi.

Tua khenpi (3) teng lakah Zomite in Zomi leh Zogam ading koi pen pom ding ihihiam? Ipilvan ding leh ilampi ding isialkholh siam kul ding hita hi.

National League For Democracy makaih kumpi in ahih leh a omlai ama thuneihna kum (3) hun sungin amasak ding thubulpi ageelna ah

(1) Gambup ah Thukhun Kizelh Nading leh Gammi Khatciat Nuntakna Kilapsang Nading- Rule of Law and Priority of Citizen’s Socio-economic Life

(2) Gambup Kilemkikna – National Reconciliation and Peace Process

(3) Gambup Kilemna Tungtawn 2008 Thukhunpi Puahna/Athak gelhna – 2008 Constitution Amendment Through Union Accord cihte masuanpi-in anei uh ahihi.

Khahsuah Loh Ding Lampi

Tuate Zomite in ahunlapin ibawhlek pah theih ding hong thupi mahmah ding hi. Yangon – Mandalay lam azuan meileng (Train) ahih leh Yangon Station pan Mandalay lam zuanin paipaita hi.

Yangon pan Mandalay tun nading lamkal ah Station tampi kinawkto hi. Tua Yangon leh Mandalay kikal Station tuamtuamte ah akum dingte kumin akah dingte kah zeel hi. Yangon panin Mandalay tun dong tua bangin kongkhak kihong ahihi.

Tua mah bangin, NLD kumpi in zong 2008 thukhun puah nading lampi asial ah atunna abeisa a (2) vei gambup kilemna khawmpi -21st Century Panglong siksanin thubulpi (37/ 37 Union Accord Points) ngahkhinta uhhi (Deih leh deih loh tawh kisailo 2008 thukhunpi laih nading lampi sialna).

More: 21 Panglong Khawmpi ah mualmi thautawi tetawh kam kiselna tampi aom gamvai kikupna omding

Tua ahih manin, NLD kumpi hunsung 2016- 2020 kikal dong gambup kilemna ding mualmi thautawite leh akisaikha kipawlna khempeuh ading (Stakeholders) kongkhak kihonglai gige hi cih, sapna awnging kongzing tengah ging ciaiciai lai hi. Muhna Pulaak : Bob Tuangpi