Francis Thawng Cin Kham te innkuan lungdam pihna

Francis Thawng Cin Kham te innkuan lungdam pihna

Malaysia ah 2006 kum in tung in khuasungah ki om ngamlo in ZAM kipatcil lai-in gamlak ah camp kibawlna Putra, Dengkil ah UN ngak in tai kawikawi in atawpna ah Rawang Camp ah kum 1 val UN ngak in om ngei hi. UN ngahzo tuanlo in a om kawmkal ah 2008 ni khat ZAM zumah vahawh in zangiakna ah Operasi lutna pan palaai le lengla 18 kiman lak ah kihel in Lenggeng camp ah ni 45 sung kiman in om hi.

Tua khitteh Thai gamgi ah kipuak kik in tua hun sungin UN ah gambeel mi khat minsanna na ngah theipah hi. Revolving door cih Tenaganita (Malaysia NGO) te laibu bawlna sungah zong kihel kha hi.

Camp pan suahtaakna ngah khitteh Harvest Centre (tu in gambeel naupang tampitak te sangkah theihna Dignity for Children Foundation) kici NGO ah sangsia nasep ngah in tuapan in za khang toto in a tawpna ah UNHCR le Dignity kipawl in nasep khopna a hi Teachers Compensation Project ah a kipat 2010 pan 2015 kikaal sungin Refugee naupangte sangkahna sang 120 te tawh nasemkhawm in sangsia 180 – 230 teng ii khasum ngah theihnang in vaisaina tampitak le gambeel naupang te ading in thugenna le panpihna te neito thei hi.

Naupang te tul sawm val le sang sia 400 val te ading in tungsiah UN lamah kizopna a kicin semsem nang in nasiatak in panla hi.

Tua huhau in 2013 kum in UNHCR in “Most Outstanding Contribution to Community Learning Centres” cih pahtawina zong na ngah ngei hi. Hih pen hunbit nasepna hi. Minam kipawlna ah zong hun awng neih sunsun zatsiam in ZAM – ZSM ah adviser dinmun 2013 – 2015 sung sem hi.

2013 kum ZAM kumcin kiteelna ah va kihel ngei in Thuzeekpi dinmun ngah ngei in a hi zongin tua panmun pan vai tuamtuam hangin sauvei semsuak manlo hi. Francis Khampi pen 25/5/2015 in a zi Judith Cing le a tanu Teresa Kham tawh USA gam, Portland, Oregon State ah UNHCR vaihawmna tawh tung theita uh hi. ZAM Thupuak