Kum Thak Dawn Zia! ~ Thangboi

Kum Thak Dawn Zia! ~ Thangboi

“Noah a khan’ kum zaguk leh a kum khatna, a kha masa, tua kha ni masa ni-in leitung panin tuite keu hi; Noah in teembaw khuhna lakhia a, khuadak hi, en in, lei maitang keu hi”. (Piancil 8 : 13)

“Kha masa ni masa ni” ci aih teh kum thak ni hi luazen hi.

Tua ni in leitungbup ah kum thak amu kha leh adawn kha Noah te innkuan bek ahi hi.

Pasian in Israel te Egypt gam pan asuahtak ni uh “Kha masa” in ciamteh sak sese hi (Paikhiatna 12:2). Egypt gam pan suahtak ni cih pen Satan’ khut sung pan suahtak ni hi a gupkhiatna ngah ni ahi hi. Gup khiatna ih ngah nai kei leh kum thak atung nailo himai hi.

Noah te innkuan bek in kum thak adawnkhakna uh ahang pen Tembaw tungah a om man uh ahi hi. Midang khempeuh Tembaw tungah tuanglo uh ahih man un tuiciin in vukcip in simang khin uh hi.

Tua Tembem pen Honpa Zeisu limlahna ahi hi. Tuiciin pen Rapture khit ciang a atung ding Gimna Lianpi limlahna ahi hi. Tuiciin tunma in Enock ahintang in vantung ah akahtohna pen Rapture lim lahkholhna ahi hi. Tembaw tuangte bek suakta in kum thak adawnkhak mah bang un Honpa Zeisu asangte bek gimna lianpi pan suakta ding uh a “Kum Thak Taktak” dawn kha ding uh hi.

Sanggam aw Honpa Zeisu nasan nai kei leh nang a ding in kum thak nailo hi.

Ih LST mun ah “Noah in teembaw khuhna lakhia” ci sese hi. Tuapen kum thak ni a asep masak penpen ahi hi.

Kum thak ni in teembaw aliah akikhuhnate Noah in alakkhiat mah bang in ei zong Honpa Zeisu mite’n amuh theihlohna ding vua adal akikhuhnate kum thak ni a kipan ih lakkhiat ding ahi hi.

Tua in Khazih nungzuite’ Kum Thak Dawn Zia man taktak ahi hi.

Tuni a kipan na nuntakna sung pan Honpa Zeisu kilangh ngiat ta hen.

Mapai in lawhcing ngiat ta in. Amen

Note’ itna sung ah, Mung Laan Thang (Zangkong)