France gamsung High School khat ah thau kikapna piang, mi 2 liam cih kizaphot

France gamsung High School khat ah thau kikapna piang, mi 2 liam cih kizaphot

France (Piancit) gamsung aom High School khatah thautawi mi 2 in thautawh mi kap uh ahih manin, mi 2 liam cihciang BBC pan kizaphot hi. Southern France aom Grasse City sungah thupiang hi a, thautawi mi 2 lakah khatpen kiman khinzo cih French Police te’n pulak uhhi.

Adang thautawi khatpen ki khahsuahlai ahih manin, Anti-terrorist Commandos leh French Police te’n zonsan uh cih BFMTV in genkhia hi. Hih sanginnsung buaina apian ciangin French Government inzong Terrorist Attack om hi ci’n Mobile App tungtawn in Warning zaksakna khahkhia uhhi.

Thau kikapn apianna sanginn pen Alexis de Tocqueville High School kici a, tuni sun 1pm hunpawl in thupiang ahihi. Anti-terror Police te’n sanginn vengsung aom khuasung mite kuamah apualam pusuahkhiat lohding in thupia uhhi.

Aliam mi 2 te lakpan khatpen sangsiapi Headteacher kici sawnsawn hi. Reports pawlkhat in agenna ah thautawi migilo te’n Headteacher ngimin thautawh akap huan uh hiding ci uhhi.

Grasse City pen France gamsung ah Perfume aki limbawlkhiat mahmahna khuakhat hi a, “Capital of France’s perfume industry” kiciliang hi. Nice City panin 44km (27 miles) bek ki gamla hi. Tua Nice City sungahzong abeisa nungkum July khasungin Lorry Attack omngei in mi 86 takin sihlawh uhhi.

France gam ii khuapi ahi Paris City sung aom International Monetary Fund (IMF) ahzong Thursday nimah in Letter Bomb puakkham cisawnsawn hi. IMF Secretary numei khatnu ii amaitang ah apuakkham hi a, amai leh akhut liamgawp in, abil ngek “Eardrum” sacip cimawk hi. Khua azakkik nading baihpaklo khading hi.

More: Eiffel Tower pen $21.4 Million bei in Bulletproof Glass tawh dai kikaiding

France gamsung ah migilo te ngongtatna omden ahih manin, abeisa kha 18 sung (kum 1 leh alang) bangpen “State of Emergency” in aomden gamkhat ahihi. ZD Sawltak #zomidaily