France ah galtai te bukna mun ki suksiatsak

France ah galtai te bukna mun ki suksiatsak

Oct. 26, 2016: French crews kici nasem ten kumpi sawlna bangin France gam-a galtai 6,000-8,000 kiim in bukna ding leh teen’na mun dingin a zat uh Calais gammang/tulak “Calais Jungle refugee camp” kicihna zan in sing atna (electric saws) zangin singkungte va phuksak uh a, sing-a kibawl innte leh lei nawnna dinga kizang vante pawlkhat suksiat sak uh hi.

Hih tulak-a galtaite bukna mun susia nasemte pen French Riot police kicite tawh kipawl uh a, Riot policete kidalna lum (shields) tawh kithuam in, hih mun-a bukna munte va suksiatsak uh hi. Calais Jungle Refugee camp sunga omte pen Britain gam lut a sawmte ahi uh hi. Ulian leh huhna vanpia ulian (aid officials) ten hih mun a kisuksiat ma-in tua kiim-a buknote a kinusiatsan siang ta hiam cih lim takin va en pha masa uh hi ci-in AFP news in gen hi.

French Interior Minister Bernard Cazeneuve in zan nitak lamin parliament dei nuainung pen ah Calais tulak a om mi 1,000te teen’na ding mun zan in kipia a, tua mun a kisuksiat masa ni-in picing/khangham 1,918 leh naupang 400 makeshift camp panin kituahkhia masa hi ci-in gen hi.

Calais tulak-a galtai 6,000-8,000 omte pen Afghan mi, Sudan mi eh Eritrea mi hi uh a, Britain gam lut ding a hanciam leh lunggulh vive ahi uh hi ci-in AFP in suaksak hi. Ulian ten zan in galtaite bukna mun a kisuksiatna ah buaina leh liamna tuak (kuamah) om lo hi ci uh hi. Britain in nung kal in galtai 200 na lak beh a, tu-in mi za tampi ten a kilaklut pah ding uh lametna lianpi nei in haibang ngak lai uh hi.

Galtai ten bukna dingin a zat uh Calais tulak pen a zaina 4 Km. square (1.5-square-mile) ahi hi. Leitung mun tuamtuam ah buaina leh gal a pian’na hangin Galpi Khatna hun lai sangin tu-in galtai tam zaw hi. Source: Agencies/ Thang Khan Lian