FGA Tulsa kum (7) cinpawi ki bawl

FGA Tulsa kum (7) cinpawi ki bawl

Full Gospel Assembly Tulsa pawlpi pen tuma kum (7) lai-in USA gam Oklahoma State, Tulsa khuapi a, omahi Tulsa Holiday Inn Hotel ah Kum 2007, 0ct 7 ni-in mi 17 tawh aki phutkhia hi-in tu-in Topa’n apawlpi lamin kum sagih cinni-in pawlpi mi 535 bang ki phata hi.Pawlpi kipat aki pan tupna leh ngimna in pawlpimi thu umsinsen hiding kua mahpawl zol lo ding cih leh,hih pawlpi hangin nasemsil bawl a om thu-ummi akua mahpeuh kha lam ah thak suahna ding leh kawlgam ah mission nase tak a semding cih ngimna ki neihi.

Topa’n kum khat khit kumkhat onggualzawhpih in kumsagih cinni zong Oct 12,2014 ni-in thupitak in kibawl in,tulaitak pawlpi ah sia/mah mi 6 pha intua lak ah,hunbit nasem khat leh Sunday School siamah 5 ki neihi.Hotel ah kumthum leh alang bang biakpiakna bawl khit teh August 7,2011 ni-in Topa’n eite adingin biakinnpi khat ongpiahi.Pawlpi in kawlgam ah mission nasepna,sangnau pangte huhna,tagah huh na leh atuamtuam te ki panpih hi.Tua bek thamlo in pawlpi-in Tulsa khuapi sungah biaknalam hita leh Zomi kipawl na tuamtuam te ah zong biakinn ahi zong,asung a vatzat Music,Media leh thagui thatang mahmah tawh zong gam leh minam ading ma kipan pihhi.

Pawlpi kum cinsim kumkhat sung sum lut leh apusuak te gen khiat na ki neidenin,tukum in zong Pawlpi sumkem ahi Pa Khamno in reportna ongneih na sungah pawlpi sumlut khempeuh Avekpi gawm $518,783.49 ki ngahhi.Kawlgam ah Mission nasepna leh biakinn bill aki pan akisam tuamtuam ah abei vekpi $382,966.55 ki zanghi.Acing zaw in athei nuamte ading in pawlpi sumkem pa kiangah suakta takin ki dong dongtheihi.

Kum 7 cinpawipi ah Rev.Pau Khan Mung in hun ukin,Rev.Vung Niang in thuzaksak na,Siamah Bu Kai in sumpi apna leh Rev.Dr.Dam Suan Mung in Pasian kammal tawh hanthot na ongnei-in Pawlpimi khempeuh in Pasian tungah lungdam kiko ziahziahhi.Tulai takin pawlpi sungah minam ki dendanna omlo -in suakta tak in Pasian ki bia ziahziah hi.Nipi simin Zomi,Kawlmi,Kachin,chin,Shan,Spanish,Mikang leh minam tuamtuam ki hel in suakta takin Pasian kibia khawm ziahziah hi.Nipi simin zingsang nai 8:30am-9:00am dong thu nget khopna,9:00am-9:45am,Laisaing tho sinna,10:00am-1:00pm Zomi Service, 2:00pm- 4:00pm, Myanmar Service leh 5:00pm-7:00pm English Service ki neidenhi.Nisimin ki khopna te Online ah Live leh et kik theih dingin ki koih den a,online ah Live a en nipi simin mun 40 pan mi bangzah hiam khat in endenhi.Tua bek tham lo in aen kik nuam te ading in,website leh youtube ah ki koih kik hi.Pawlpi kum cinni-in kawlhun leh Zohun helkhawm in hunkhat bek kinei a,Rev.Dr.Dam Suan Mung in anleh tui ading thungetna ong neih khit teh a kikhawm mimal kim in mangan lim mahmah duhzahzah kine in kha lah kitai taksa tai in gil vah sa in inn lam ki zuan ciat hi.

Tu tungpen nekleh dawn tawh ki sai ah inntek te ahi Mangkang nungak tang val te in tanu ongsem uhhi.

Kum 7 sungtawntung ong tonpih ibiak Pasian tungah genzawh loh in i lungdam a,pawlpi ongkem ahi sia/mah te leh hih pawlpi tawh khut ki len khawm a pawlpi mi asuak mi mal kim tungah zong Topa’n thupha ongpia hen la Topa’n apawlpi onglam in Pasian gam leh minam ading api ding zo semsem dingin thupha ongpia ta hen.

FGATulsa Media Group