Khattang biakna (Private Worship) le Midang tawh biakna (Public Worship)

Khattang biakna (Private Worship) le Midang tawh biakna (Public Worship)

Pawlpi Church ih cih pen thu-um mite hi. A inn hi lo hi. Keima’ min tawh nih le thum na kikhopna vuah kei ka om hi ci hi (Matt. 18:20). Sawltak sung en lehang inn ah kikhop (house church) na zang mahmah uh hi. Hih (house church) pen (local church) a kici a phualphual-a om Pawlpite cih bangin zong i muh theih ding kisam hi. Local church ih cihteh mun le mual zui-a kikaikhawm thu-ummite genna hi.

Jerusalem Pawlpi, Thessalonika Pawlpi, Korinto Pawlpi cihte pen local Pawlpi vive hi. Tuhun ah local ding kimlai kipawlna kithupi sak lua ta ahih manin pawlpi (local church) ihih ding panin kipawlna pi (institutional/ organizational) daanin kipai gawp ta-a, khasum sanna, pension sanna, nuntak zonna, minam vai zonna, nai-ganzi vote zonna, tutna, lutangpi, panmun kituhna, sum le pai vai, min le za vai gawp-in kipawlna buai-in kibuai gawp ta-a Khris thu kibuaipih lo to semsem kha ding ahih manin kipawlna buai-a buaina a kithuak ding hi ta hi.

Tua ahih manin hih lockdown biakinn ah kikhop khak loh hun sungin Thuciamthak Pawlpi kalsuan zia, biakpiak zia ahi inn kikhop (house church), a phualphual a om Pawlpi (local church) kal suan ziate a lungngai pha dingin Topa in hong deih hi.

Ih kipawlna ABC te sangin i local church a thupit zawkna, biakinn bek ah kikhop hi sak loin innkuan thunget, innkuan kikhop (family worship) zong Pasian in biakpiakna mah-in hong sansak sem zaw kan lai hi cih ih muhlawh na ahih ding kilawm hi.

Khat bek in zong biakpiakna a kipia thei hi a, ahi zongin leitung khua hun a hoih nak leh midangte tawh biakna pel lo neih khop a kul ahi hi. Midang nih le thum tawh biakna pen kikhopna kikaih khopna hi. Biakinn beka kikhopna pen kikhopna hi lo-a na inn ah nih le thum na phak lai teng zong kikhopna (public worship) nam mah hi cih dongah ih upna ih kan suk ding hun ahi hi. Inn ah a kita lo zah dingin Pawlpi mi a tam teh inn lianzaw khat kilam-a tua pen biakinn a kici ahi hi.

Khua hun hoih napi, biakinn hoih mahmah lian mahmah nei napi, biakinn khak cip liang-a area Pawlpi neu khat khawngah Pawlpi bup-a va pai ngeingai cih zong kipawlna vai mahmah ta ihihna khat hi zel kawikawi hi. Tua ahih manin khua hun hoih-a biakinn nei khin ihih nak leh i biakinn khak lianga Nipi Ni sese-a pawi bawlna, ki fellowship na, kikhop lawmna cihte i zat loh ding zong local church ii hong kalh thu lianpi khat hi cih phawk huai hi.

Ahi zongin hih banga Covid=19 hanga kikhop theih loh hun teh, biakinn bek ah kikhopna na bulphuh phuh leh na upna, na gupna pen Pawlpi tungah, mihing’ tungah, mi tamna ah a kinga pha mahmah pa/nu na hi hi. Nih le thum tawh na inn sang nuai ah kikhopna a bawl thei na hi hi. Kikhawm cih ciangin kipawlnate le ki fellowship nate ah pawi bawl (entertaining style) banga a gam lum theithei a kisam hi lo-a, Thuciam Thak hun-a local church, house church te banga, a dai theithei kisam zaw hi, cih zong ih muh theih ding kisam hi. Tawmvei Covid=19, 2020

A tuamtuam

1. Na cih sam hangin, na kiangah mi tulkhat, na kimkot ah mi tul sawm hong tuk nai sam lo hi ven (Late 91:7), tua na-ngawn zong a kidawm penin na pang pah-a, na kua tawng lamah na tumcip pah ta veleh.

2. Khua khat ah Covid=19 hangin milom om khop lauhuai hi cih thu a zak phet un, lau lo lua kisa, a khuazang vua tualpi ah thu ngen khawm zikzek pah a ci veleh kici vial a, kei zong a natna taktak hong tung nai lo ahih lam thei gige uh ahih man-a lai lo uh hi in, a natna taktak khat le nih bekbek a khua vuah tung leh kuamah a kua uh pan sap khiat zawh nawn loin a lau kheng val ding teng hi ka cih pen hong maan toto hi. Gaal han le gaalphual kibang het lo sam hi cih thu phawk ni maw kheeite.

3. Tuhun pen a natna nei zong hipah keiteh, ahi zongin a thu hita ahih manin thu na man kul hi. Eimah tawm khuh theuh bek lehang zong kisuang pong pian pah hanga i gei-a te in zong a thu-in hong muangmawh pian pah hi. Natna nei teh zong hi pah kei veh aw, a thu hi veh, a thu…thu mang in.

4. Hong uk kumpite thu na mang in (Rom 13). Hih Coronavirus tungtangah kumpite thu na man leh khial lo ding hiteh. Kha thu tawh kisai taktak thute ah a hawm tata teng ki umsakin kumpite le cidamna lam vaisaite thu hilhnate mang loin Pasian’ min le pianthakna khawng paulamin ki umsak kawngkawng sedah un, hong muh thadah mahmah lel ding hi…

5. Kigin kholhna pen kikhoina sangin hoih zaw hi (ကြိုတင်ကာကွယ်ခြင်းသည်ကုသခြင်းထက်ကောင်း၏။) a cih mah bangin hih kigin kholh gamtat pen bangmah kici keitah ci-in ciamnuih bawl le zang khai ngaih sut khak ding hi lo hi. Kiginkholhna pen bangmah ih cih loh nading hizaw hi. Prevention is better than cure.

✓Ei Tapidaw thu um te pen a thumang pen a kidawm pen a kiging khol pen dingte hi hanga, a kisap leh a kisap zui-in a kipheikham (sacrify) ngam pen dingte zong ihih kul hi. Evan. Suangh Dal