Ettehpha Hi In ~ Hau Za Cin

Ettehpha Hi In ~ Hau Za Cin

A lamdang mahmah khat bel ahoih in na gamtat sangin a sia in gamta lecin mite in hong mitsuan baihzaw hi. Ahi zongin a hoih in gamta lecin mite na mulo tuan hetlo hi. Mulolo bek hilo in mangngilh nawnlo uh hi. A mitkha vuah, a lungsim vuah thaam den a, ettehpha na suak hi. Good example, model, hero, or influencial na suak hi.

Khangkhat nuntak ding ciatciat ah tua banga mite ettehpha hih ding na ut hiam? Na ngaihsun ngei hiam? Nang zong na ut hiam? Mite nuntakna ah a hoihlam in hong ki etteh hi ciin na kithei ngei hiam? Mite in nang hong et ciangin nang nuntakna pan a hoih nuntakna thak a lak ding uh a om in na thei ngei hiam? A kilawm, a siangtho, a hoih nuntakna a lak nuntakna na nungta hiam? A hoih lamin mite nuntakna na khel thei hi cih na phawk kha ngei hiam? Tua banga nuntak gamtat ding na sawm ngei hiam?

Mite tawh na kiho ciang mite lungsim a hoih lamin na zeel zo hiam? A hoih a pha dingin na ngaihsunsak thei hiam? A hoih ngaihsutna nei dingin a lungsim na hei thei hiam? Nang hong kimuh ciangin mite in ‘lametna’ a nei uh hiam? A hoih a pha sin ding, zil ding, theih ding lametna a nei uh hiam? Mite in nang tawh kimuh ding, kiho ding, kikholh ding a lunggulh uh hiam?

Mite in nang tawh nasepkhop ding, kikupkhop ding, vaihawm khop ding a lunggulh uh hiam- tua bang mite itna, angtanna, lunggulhna nangma nuntakna ah a om hiam? Mite in nang tung pan theihnop, dotnop a neih uh leh mite in hong muang, hong it, hong pakta, hong etteh cihna hi a, na nuntakna etlawm in ettehpha suak hi cihna hi. Tua bang na neih leh mite adingin lamlakpa, ettehtaakpa, ettehpha na hi cihna hi.

Zahtakna, itna tawh mite in hong hopih leh mi hampha na hi a, mite adingin lametna na hi hi. Tua bang dinmun na din khak leh na kiniamkhiat mahmah ding kisam a, na thudikna, na thumaanna na khahsuahloh ding na hanciam den ding ahi hi. Mimal hamphatna sangin mipi hamphatna ding na nuntakna ah kimu cihna hi a, tua manin mi khempeuh in hong pakta cihna hi. Thudik, thuman deihte in hong pakta dinga, angsungthei leh mimal hamphatna bek a ngaihsun nuntakna in hong paktalo ding hi.

Mite ettehpha suak cih pen amau pau siam kul cihna hituanlo hi. A vom, a kang lakah zong na gamtatzia in mite mit ah etlawm suak thei a, laikung laidal tawh gelh kul tuanlo hi. Hong et dan, hong hopih dan, hong maitai dan panin mite in nang pen ettehpha maw phalo cih tel khin pah uh hi. Mithak khat peuhpeuh tawh kimuh ciang koi bang mi hiding cih pen theihna dingin second nga sung bek kisam hi ci uh hi.

Mit tawh kimuh, kampau masa pen ah a mizia ding kitel pah hi ci uh hi. Tua bang hun ciang mite in nang tawh kizop tohtoh ding alunggulh uh hiam, ahih kei leh hong ngelsan bawl pah uh hiam? Mite mit hek, lu hek tawh kituak in telsiam, zuisiam peuh leng mite tawh kikholhna, kizopna kizom toto thei hi.

Mite etteh, mite thudot, mite zuihnop mite in a kim a kianga om peuhmah ama pumpi bangin ngaihsun in thusim in thupi bawl ciat hi kici hi. A thugen khat peuh uh lunglut takin bil dawh, a thugen khempeuh uh hoihtak ngaihsak, a dotna khempeuh uh lungsim takpi tawh dawngkik, kamnem, lungnem takin deidan neilo in lungkimsak ciat thei uh hi.

Mite tawh kikholh theihna ding, kizop theihna dingin a thupi penpen lungduai taka mite thugen ngaihsak, bil dawh hit hiat theihna hi kici hi. Kiho ciang mite thugen tel hi hang cih lahna in a gennop uh eima tel danin khatvei genkik pen a thugen ngaihsak hihang cihna hi. Tua pen mi tawh kikhawl siamte holim dan hi kici hi.

Mite in ettehpha in hong neih ciangin i hopih dan, i kholhpih dan, i awsuah leh i gamtat khempeuh ah ahoih, a etlawm in i om theih den ding thupi mahmah hi. Mite lunggulhna zaksak ding, mite deihna telpih ding, mite kisap khualpi zo ding. Tua bang kawmkawmin nang deihna leh nang hoihsak a hoihzaw ahih leh tua banga amau nuntakna hei zo dingin na pattah siam ding ahi hi.

Ut in utta kei leng mi khat beek in hong etteh a, tua hong ettehte tungah limpha, ettehpha i suak nak leh leitungah mihing khat a hoih a kilawm in a gamta kibehlap cihna hi. Tua manin a hoih, a ettehhuai, a thudik a nuntak ding hanciam huai hi. A tawpna ah thudik, thumaan bek mah to pen ahih manin. Mite ettehpha suak ciat ni. Hau Za Cin