En Huai Christian Innkuan ~ Bishop Lian Khen

En Huai Christian Innkuan ~ Bishop Lian Khen

Nupa kitenna leh Innkuan pen Pasian in Eden huan pan in hong patkhiat ahih manin Pasian deihna tawh kituakin, zahtak kaaitak aa, i thupi’ bawl ding ahi hi. Pasian in kitenna siangtho le innkuan nuam pen mu nuam mahmah hi, mi khempeuh in kitenna thupi sim ta uh hen! ci hi (cf. Heb. 13:4).  E.G. White in” khantawn koppihding na telna ah na kalsuan nawhlua kei- in, leitung innkuan in vangtung innkuan dong huam hi”….ci hi. Kawl paunak khat ah zong…Lo zongkhialte’n kum khat zawnlawh uh aa, zi zong khialte’n khantawn buaipih hi… na ci hi.

Tua mahbangin tuhun mite, nuntakzia i et ciangin innkuan nuam kilunggulh tek mahmah ta hi. Biakinn sung le khangno kikhopnate ah zi hoih, pasal hoih, ka ngah na’ng uh thu hong ngetsak un kici ta hi. Bang adeih na uh hiam “…Innkuan enhuai/nuam adeihna mah uh ahi hi. Tham lo-in inn kongbiang tung khawngah Home Sweet Home, Christ is the Head of this Home, Christian Home, cih kammal hoih nono, thu hoih nono te lai-in suang uh a, hite pen, innkuan nuam, inn siangtho deihna mah ahi hi”. Thuzui u leh nau, nu leh pate, Pasian in leitung innkuan pen, nuam bel vantung innkuan alak dingin atel mun ahi hi.”(Deih sakna tawh Pu. Sian Cin Zam, ii laibu bawl   90% of human life sung pan, partially adopted).

Ngaih suthuai thukhat leuleu ah, ei khangthak hunah aituam suahtakna bek kithupi sakin, Pasian deihna, Nu leh Pate’ thuhilhna le Siate hong makaihna te kithudon phamel nawnlo ahih manin, i nuntakziate hong hi zelzul pah hi. Nungak tangvalte’n, “Kei pumpi kei thu, kuamah tawh kisai lo, numei leh pasal kithukim peuh leng mawhna hi kei”, kici ziau lel hi. Nupa lopi, ut tantan ki omkhawm zelzul lel hi (living together). Nungak tangval kiten/kipi ciangin zong, ngeina cing tawh kipi kiteeng, biakinn ah siangtho kiteen’na nei, cih bang om nawn phalo hi. Zi kinawh zon mahmah in, kiteen kipi khin asawt lo-in, nausuakpawi kibawl in kipaal mahmah hi. Kiteen’ lam a kibaih ngaihsut mah bangin nupa kikhen ding zong haksa kisa lo hi.

Theihlo kalin lampaam/kal khawngah kiteeng ziau-in, theihlohkal mahin, kikhen ziauziau lel hi. Nupate’ ki-itna, kidonna, kikepna, innkuan siangtho nuntakna cihte om pha mel nawn lo ta hi (cf. GS Pau, Akhang, a Khangin, ZOLUS Magazine No. 19, 2016, pp. 14-15 partially adopted). Hibang pen, a enhuai innkuan nuntak zia hilo hi. Satan in Eden huan sungah, Adam leh Evate’ nupa kikal nuntakzia a suksiat mahbangin, tuni-in zong, Christian baangkua sung, nupa kikal leh innkuan sung nuntakziate lampi tuamtuam tawh hong susia leuleu hi. Dahhuai le khasiathuai mahmah hi. Ei Christian innkuante’n zong telzo nailo hihang.

Amasa pen in, enhuai innkuan ihih zawh nadingin, Pasian a zahtak innkuan, Jesu Christ tungah a kilam innkuan ihih ding kisam hi. A sangpen ah, Jesu Topa, a nuai ah Nu leh Pa, tua khit ciang, tate cih bangin kizom kipeh diimdiam in, innkuan siangtho Jesu, Maria Josephte’ nuntakzia ettehin neileng, a enhuai innkuan ihipah ding hi. Topa tawh zingvai nitakvai hawmkhawmin, amah zahtak, ki-it kilem in, khat leh khat kitheihsiam kitelsiam, mawhmaisakna tawh i nuntak leh a nopci, Vantung gam malep innkuan ihilai ding hi. Pasian a zahtakte in, mite phattuamna apia  nuntakna tuikhuk tawh zong kibang hi.

Tua khit ciangin, Lai Siangtho, nuntakna Pasian’ kammal sim dending hi a, tua in, leitung thupha leh vantung thuphate omna gogilpi ahi hi. Pasian deih innkuan nuntakna i neih zawh nadingin, i gilkial i dangtak ciang, an leh tui i lunggulh mahbangin, i kha nuntakna ah zong Pasian i lunggulh dending kisam mahmah hi. Topa’n bangzahin hong it cih theihsiam telsiam ni. Topa’ hong itna theitel semsem leng Topa itsiamin ama’ deihna bangin i nungta zo pan ding hi. “Note in a suaktung naungekte bangin kha tawh kisai a siangtho nawizu na lunggulh un; tua hileh kha tawh kisai nawizu hangin na khangto ding uh a, hotkhiatna na ngah ding uh hi. Banghanghiam cihleh note in Pasian’ hoihna na ciam khin zo uh hi ” (1 Peter 2:2-3), hong ci hi.

I Christian nuntakna ah, Misiangtho Paulu in Ephesus thuzuite ading thu angetsak mahbangin, tu ni-in eite adingin zong, hibangin thu hong ngetsakna phawk ni: “Upna hangin na lungsim sunguh ah Christu a hong teentheih nading leh itna ah zungkha-in, na kipna dingun thu kangen hi…Christu’ hong itna, a dung, a vai, a sang, a niamna cihte na theikhawm ding uh hi…Christu’ hong itna thei-in Pasian’ kicinna tawh note na kidim nadingun thu kangen hi” (Eph. 3:17-19) hong ci ngeu hi. I innkuan sung nuntakna ah, Pasian’ gam le ama’ dikna zong masa leng i kisapna dangte khempeuh zong, Topa’n hong piak thuah lai ding hi (Mt. 6:33). Tua banah, nisim naisim i nuntakna ah, lawm hoih gual hoih, veng le paam hoih i zon siamding kisam mahmah hi.

Kawlte’ paunak ah, “Sabengte’ kiangah om leng sabeng kisuak, ngabengte kiangah omleng ngabeng kisuak”, a cih mah bangin, thu umte tawh omkhawm leng, thunget leh biakinn paiding kihan ciam pah hi. Nasep hanciam, pilna kinte’ tawh kinai leng, nasep hanciamin pilna zong kideih pah hi.Tua ahih manin, “mi hoihte’ lampi tawn inla, thu man mite’ lampi na zui ding hi” cih (Pau. 2:20) i hong thuhilhna zuisiam mansian siam ni. Topa a kihta mi kua hiam? Topa in ama aadingin a teelsaksa lampi a lak ding hi (Ps. 21:12) in hong ci lai hi.

Paunak khat ah, “Nute a damna innkuan cidam a, pate a damna minam cidam hi….” ci-in kigen hi. Baangkua sungah Nute’ makaihna nuai ah a khang khia naupangte in, lungmuanna leh  khalumna tawh hong khang toto pah uh hi. Pate’ makaih/cil siam tate in, minung mimaa banin gual tawh tanbang kimzo pah uh hi. Midangte phattuam nading nakpi takin semin, tate adingin ahoih apha i deih laitakin, eimahmah i nuntakzia cidamlo thei hi. Pasian zia tawh nungta in,  Nu hoih Pa hoih, makai hoihte’ nuntak, luhek kampau ziate i etteh siam kul ding hi. Nu leh pate in limtakin ngaihsut huai hi.

‘Thankik ta neih,’ cih dan in, nei napi neih zawh ciang mangngilh pah dildel cihdan pen, Pasian hong piak vai puak a thudonlo tawh kibang hihang. Tua ban-ah, tate a dingin nu leh pate pen, kha lam leh tahsa nuntakna ah lam hong pui in hongciil masa leh etteh ding masapen ahih manin a maute zuih, sep leh kalsuanzia dinga a hoihlote zat hetloh ding ahi hi. I kideek zawh kei a, phamawh kei e ci a, i om khak a i nuntaktak leh, tate in hong etteh a, nu leh pate sep hoihlo, zat hoihlote hong luahsuk khak uh leh midang mawhsak loin, ei nu leh pate hang hi cih sansiam ding kisam hi.

I paunak ah, “Sakhi a pi san, a no san” cih om a, i mihing nuntakna ah zong, a tawm leh a tam in man mahmah hi. A hihna ciang khat om hi. Mi khem peuh tungah a dik kimloh hangin, a tamzaw-ah dik mahmah hi. Lai Siangtho sungah zong, mihoih lo tung panin gah hoihlo gah ahihna leh, singkung cidamte a gah zong limci ahihna thu kimu hi (Mat 7:15-20).

Mipil leh kumpilian Solomon’ Late 127:3 sungah, “En un, tate pen Topa tung pana gogil (heritage) hi a, suanlekhak pen thaman ahi hi” ci’n na gelh hi. Hih munah, tate pen Topa’ letsong manpha pen ahihna kimu hi. Topa hongpiak ahih manin Topa deihna banga, kep leh pattah ding pen nu leh pate’ vaipuak ahi hi. Tua ahih manin Jesu mahmah in zong naupang kep, lampi dik/ maan tawnsak a kisapzia, Jesu a upna uh pan a lam pialsak, leh naupang limtak kemlo a, siatna lampi a zuisak mipen leitungah nungta keizaw leh ama adingin hoihzaw ding ahihna gen a, “…a ngawng-ah an gawina suang lianpi khat ki khihin, tuipi thuk sungah kikhiasuk leh ama adingin hoih zaw tham pek ding hi” (Mat 18:6) ci liang hi.

Tua ahih manin, a manpha i tate kep leh khoi ding pen vaipuak thupi mahmah khat leh Pasian deihna ahihna i phawk ding kisam hi. Ahi zongin, mihing pilna, siamna le hatna bek tawh kep zawh ding peuhmah hilo a, Pasian panpihna tawh, ama thu leh lampi maan tungtawna makaih bek ding ahi hi. Tua hih manin, ei nu leh pate mahmah in Jesu mah tawh maa paangkhawm a, thumaan lampi i tot ding kisam hi. Banghanghiam cihleh mitttaw leh mittaw lampi maan ah kimakaih theilo, lampi maan kilak theilo ahihna thu Jesu in genkhin hi (Mat 15:14b).

Nasep hanciam mahmah, ihmu theilo liangin tate’ khantoh nading thu ngaih sunsun, ne ngamlo, ta ngamlo liangin sum tampi bei-in, tate hoih nadingin i hanciam hi. Ahi zongin, khat veivei Jesu Christu mah masak khalo ihih manin i lamet leh i gimna zahin lawhcing lo thei hi hang. Lamdang lo hi. I hun tampite ah, Pasian nusia liang-a pilna zonna; kikhawm manlo liang-a sum leh paai zonna; Lai Siangtho sim manlo liang-a TV, Video etna le; thungen manlo liang-a phone khoih niloh nate leh Facebook bekbek tawh buainate’n lampi man hong tootpih lo-in, Pasian deihna hong tunpih lo kha ding hi.

Tate hangin lunggim, khasia in na kap hiam? Na tate hangin maizumna leh mindaina na thuak hiam? Lim takin ngaihsun in. Aipi pai zia a note’n a zuih dan zong hithei hi. Pasian lamah makaih ngeilohna hang, lampi maan a tot theih lai-in hilh lohna gah a lo zong kihi thei hi. Tua hi a, thahatna sangin, lungduaina hoihzaw a, khuapi khat ukna sangin, eima pumpi ki-uk zawhna hoih zaw hi (Paunak 16:32), i hong thuhilhna zuih siam ni.

Lai Siangtho sungah ‘Topa zahtakna pen pilna kipatna hi’ ci a (Late 111:10; Pau 9:10), Jeremiah laibu sungah, ‘Topa a muang mite thupha ngah hi a, amau (thupha ngah mite) pen guun gei a kisuan singkungte,  a zung tui omna ciang a thukpi sungah a tum bang hi a, tua singkungte pen nisa lua leh guahzuklohna hangin bangmah nawngkaina om loin a tehte hing denin, gah limci a gahkhia tawntung hi’ (Jer 17:7-8) ci hi. Tate makaih siamna ding pilna, tate tungah gahpha gahhoih gahkhia dingin zong Topa zahtakna, amah muanna kisam masa cih kilang hi.

Tate kep siam pen haksa lua mahmah ahih manin, mihing pilna leh siamna bek tawh hih zawh ding thu hi lo hi. Kem zo ning, pantah zo ning, mi lian mi thupi suaksak ning, ci-in kuaman genkhol thei lo hi.Hoih tak leh pha taka Pasian deihna leh Pasian thu tawh makaih pen nu leh pate vaipuak hi a, a gahkhiasak ding, a lawhcinna pen Pasian’ thu ahi  hi. Tua hi a, kician takin Lai Siangtho in,“Naupang khat a neu laiin lampi maan tawnsak lecin, a teek dongin lam pial nawn lo ding hi” (Pau 22:6) ci-in hong hilhna bullet tinten ni (cf. T. Sawm Lian, Daihna Cabin, ACA- ETS, May 2016, adopted).

Innkuan sung nuntakzia ah, Christian biakna bek hilo, biakna khempeuh in apicing/acidam kizopna thupi sak mahmah hi.  Ei mite i khantoh lahna pen innkuan sung tek panin lunghin suangpo, gamtat luhek, kampau mukpau, din mun lakzia, kipattah dan leh i vaipuak dante picing zo nailo (zuihding kician ngeina hoih ineihzawh nailoh hang ahi hi.) i neihloh hang ahi hi. I kipuahphat mahmah kul ding hi.Tua ahih manin, i minam a khantoh theih nadingin, a picing zonailo innsung nuntakna panin apicing innsung nuntakna lamah galkah ding kisam mahmah hi.

Innkuan nuntakziate picinna in, i minam khantoh nadingin, thusim hoih, pansan hoih, siksan kip mahmah khat ahi hi. Innkuan sungah, Nu leh Pate kizopna, Nu leh Pa leh Tanu Tapate kizopnate cidam zonai lo! kimakaih ziate zong picing zonai taktaklo ahih manin, khua le tui le mipi, tangpi tangtate tawh kizopna-ah zong akitangsam leh akibansam lai tam mahmah hi. Mopawi nopci ding kihanciam tek naven, innkuan nopcit ding kivai hawm zonailo hi.  I innkuan sungte-ah, teek le mote kizopna cidam zonailo hi. Tate’n zong nu le pate’ thu mangnuam nawn phamello ahih manin, innkuansung limcit lohna in pawlpi sung le kiim leh paam hong lawhto hi.

Pasian in amaa’ lim leh mel sun dingaa hong bawl ahih manin (Gen. 1:26) Mailam ah minam picing i suahzawh nadingin, tulaitak innkuan sung kipattah zia le kipuahzia tawh kisai mahmah hi. Tua ahih manin, innkuan sung nuntakzia le kimakaih ziate i thupitna le manphatzia pen, German mipil Max Webber in hibangin nagen hi. “Innkuan i cih pen leitung neu (microcosm) bang hi-a, gam khat i khantohna, thupitna, nopsakna, kiamsukna, ginatlohnate, hauhna le zawn nate na theihnop leh tua gamsunga teng innkuan nuntak ziate etna tawh kithei thei hi”, ci ngiat hi.

Billy Graham in zong innkuan nuntakna pen Pasian gam a malepding a hihlam nak tellua ahih manin, ‘Vantung gam nopsakna naciap nop leh ko innah hong hawh un’, naci zen hi. I paunak khatah zong, nupakop kipumkhat kithutuahna athupit zia hibangin hong gen hi. “Putu kilungtuak, Sahangin kikta, Nupa kilungtuak, khuakhat in zolo, khuakhat kilungtuak khua kua in zolo” na ci hi. Tua banah Buonaparte Napoleon in zong, “Nauluai avei khut in, leitung uk hi”, naci hi. Tua ahih manin, bangkua sung khantoh theih nading, adiakdiakin i minam a picin nadingin, i muan i suan tuailai khangnote a khuasuah zawh nading, mipil, misiam, ulian, gamnu gampa leh biakna makaite asuahzawh nadingun, Nu leh Pa te panmun, dinmun leh naupangte makaih zia pen thupi mahmah hi, cih thu hong phawksak sansan hi.

Alianbel Siampipa, St. John Paul II, in bang naci hiam cihleh, “Mailam khangthak khempeuhte in innkuan sung tawnin pai ding uh hi”, naci hi (The future generation passes through the family, John Paul II).Tua ahih manin, innkuan hoih, innkuan picing te pen, khua le tui leh gam le lei khantohna hong piangsak thei, makai hoih, mipil misiam le mihaute i pianna naakpi ahi hi. Tua ahih manin, tulai innkuan sung nuntak dan leh khangnote omzia enin, mailam hunding dan kimu khol thei hi, cih hong phawksak hi.

Atunga thute i et ciangin, Christian innkuan i thupitzia le manphatna kithei khia bek thamlo-in, i kalsuanzia ding zong hong telsak pah hi. Christian innkuan i cih in, leitung neu khat le biakinn nokhat hi-a, an nekhawm tui dawnkhawm bek thamlo-in, thu ngenkhawm la sakhawm innkuan i hih ding thupi hi. Tua ahih manin, Nu leh Pate in, tate adingin, Pasian thu hilh masa, sia masa, leh tuucing masate hipah uh hi. Tua hi leh, mite etteh theih ding leitung ‘khuavak’ le leitung ‘ci’ bang hiding hanga, tua innkuan sung panin Pasian gam leitungah atungsak dingte ihi hi. Topa’ lungsim puak zia, itna, apicing nuntakna, kipumkhatna, kithutuahna le kithumannate Pasian innkuan ahi ‘leitung’ ah i tunsak zawh ding kisam mahmah hi (cf. Thuhilhkikna 12:1; Eph. 5:1-20; Christian Khangnote, by Lal Run Piang, Samte).

Tua ahih manin, ei Nu leh Pate in, tu ni naupang, zing cianga i nu i pa leh biakna le gam maikai dingte maikaih vaipuak sangin a lian zaw vaipuak om lo hi cih phawk ni. Pasian nasepna a lianpen leh inn sung mission nasep hoih pen zong ahi hi. Job in zong, ka tate in Pasian mangngilh kha leh ci-in zingsang simin a innkuanpihte biakna piak pih ngiat hi (cf. Job 1:5). Galkap mang Cornelius in zong, a innkuanpihte tawh, Pasian kihta in mite tungah thupha tampi bawl a, Pasian kiangah thungen niloh uh hi (cf. Sawl. 10:2). Etteh huai innkuante hipah hi. Tate in zong, Nu leh Pate pen, i leitung Pasian ahih lam phawk siam in, Nu leh Pate thumanna in, Pasian’ thu manna hi a, khansauna, daupaina, lawhcinna le matun zawhna thupha naakpi hi cih zong phawk siam ni! (Sirach 3:1-6)

Khualzinna-ah kal khat pan a kipat mahbangin, mipi kikhel nading leh khantoh nadingin, mimal, nu leh pa leh tate, innkuan pan hong kipan khia ding ahi hi. Tua ahih manin, ei Christian innkuan sungah thu ngaihsiam, thuciin siam, thuzuih thuman zong siamin, nuntakpih zoleng i nuntak zia hong nuam mahmah pan ding hi. Lai Siangtho, nuntakna Pasian’ kammal, i bangkua sung ah, zin tangsak nawnlo-in, zualsakin zungkhasak leng, Lai Siangtho asimsimte bek hinawnlo-in, Lai Siangtho’ deihna banga anungtate ihih taktak ciangbekin i Christian innsung nuntakziate hong nosuah pan ding hi.Thuzui u leh nau, nu leh pate, i innkuan sungah, Pasian a biakhawmte, thu a ngen khawmte, Pasian’na asem khawm innkuan, mite’etteh huai innkuan i hih zawh nadingin, Topa’n thupha hong pia ciat ta hen! I Kalay Siampilian uk sungteng, lungdamna Pasian’ kammal tawh nosuah sak ni, paallunsak ni.

Lungdam,
Kalay Siampilian,
Felix Lian Khen Thang
Kalay Diocese