Eima Hun (Our Time) ~ Bob Tuangpi

Eima Hun (Our Time) ~ Bob Tuangpi

Eima hun ka cih ciang in tulaitak i hun kacih na hilo phot in, ni khat ni ( hun khat ) ciang ong tung ding eima hun khat cih nop na hi. Eima hun hong tung theih nangin, ” tulaitak i hun i zat siam ding kisam ” cih theih loh phamawh ding hi. Tua tham lo in,hanciam na, cihtakna, thasanna leh lungkiat loh ding cihte kisam ding hi. Eima hun ong tung nangin eima tha leh eima tha kimuang ding, mite’ tung ah kinga lo ding, lungtang khauhsak ding, lungkia ngeilo ding zong thupi mahmah hi.

Tua ahih man in mikangte’n bang naci hiam cih leh “You are the master of your life and the captain of your soul ” naci zawzen uh hi. Kawlte’n zong Pali kamin hi bang na ci uh hi, “Attahih, attahnaw, nathaw” na ci uh ni. Hih i leitungah i nuntak lai teng ih pumpi ading eimah sia (master ) ei leh a kibawl (create) ih hi hi. Ei leh eimah sia i hih lamtak kiphawk den a, han ciam tentan leng i lungtup ahi Eima hun (Our Time) hong tung pelmawh ding hi.

Tuhun ( nowadays ) ciang hih i leitung ah pilna, siamna, hauhna, minthanna leh a tuam tuam a second phialin khangto mahmah aa, zanni leh tuni kibang lo a tuni leh zingciang zong ki banglo ding a a nini- in pilna leh siamna te khangpi-in khang hi. Tualaitak thupi i sak mahmah ICT ( Information and Communication Technology ) vante khong tu zawh kum 30 ciang naupang ki mawlna bang ta lel ding ci’n mailam thu gensiam ( futurist ) te’n gen zo uh ni.

Tua hi a, hanciam a, tulaitak i hun i zatsiam kei leh mite’ nungah eiguak bek omin mite’ hong kheng mang dinga, i luzang ah a khe uh hong nga ding uh hi. Kong it lawm aw, aman tak hong gen leeng, thasanin, hanciam lo a, na ki puan phat kei leh mite’ netniamna dinmun na tung takpi dinga, thuaklahin naha nagawi dinga, lei bek mah nasik tading hi. Hih i ten na leitung pen a lau huai mahmah mun ( gam ) hi cih phawk in. Nuntak na nei khempeuh a tawntung in a ki do na mun hi. A zote’n a guallelte uk aa bawl siagawp uh hi.

Vasate in lungnote ne uh a, vasate mupi in na nei to zel hi. Leitung pen zawhna mun pepeuh akinek tumna mun cih phawk phot lecin na om mawk ngam kei ding hi. Tua a hih man in mite’n netniamna dinmun i tunkhak loh nadingin tulaitak i hun zatsiamin, thasan aa, kipan leng zekai lo ding hang a hunlap lai ding hi hang, tun a kipante zekai ngeilo hi”If you start now, you’ll never late,if you don’t start, you’ll be late” Mikang te’n zong na ci uh hi. Tua hi a, tuni-in ih kipat leh zekai lo ding hang a, ni khat ni ciang gualzawhna, pahtawina le minthanna hun ahi ” Ei-ma Hun ” hong tung takpi ding hi.

Ei leh ei ih kipuah phat ding ei thadah lehang kuan ei hong puah peuh mah ding hiam? Tualaitak na en mahmah hi mihaute, mi minthangte, migualzote leh leitung makai minthangte zong eite mah bangin a gualzawh ma (agentheih hun) lai uh haksatna tampi mah na phuto uh hi. Tangthu (history) sunga, mithupi pen pa in, mizawng penpa hi, ” The greatest man in history was the poorest “” cih phawk in. Lung kiakei ni maw. Haksatnate pen i gukalzawh nang kahleite hi. Haksatna om kei leh gualzawhna omlo dinga, hih i leitung pen ciimtak huai ding hi.

Tua banah, paunak hoih mahmah khat nei hi hangh, tua in, “Tui bua sa ki luak ki thei lo (spilled water couldn’t be recollected )” ci hi. Hih paunak in bang hong phawk sak aa? Hun manphatna hong pulak hilo maw. Ama hong thuhilh na donloin khantoh sawm nailo na hiam? Hih paunak na lungtang sungah vom tinten inla, na hun zat siam leteh Eima Hun (Our Time) i cih cih hauhna, gualzawhna, minthanna leh vangliatna ahi i lungtupte libang hong cing thei pan ding hi.

Mikangte’n zawng hun manphatna hih bang in paunak na vawh uh hi,” Lost time is never gained again,” Hun in nuntakna hi a, nuntakna in hun tawh kiciangtan hi. Na nuntakna (na pumpi) na it hiam? Na it leh hun mawk bei sak kei in. Bang hang hiam cih leh na nuntakna pen hun tawh kilam (kiciangtan) hi ci’n Benjamin Franklin in zong na gen ngeungeu zawzen hi.

Tua hi a, hun manphatna phawk in, ih hun zatsiam leng Eima Hun (Our time ) i cih cih e! Eh lawmte i phawk ding khat om lai, tua in, kei pil keng, ka khuak mite’a bang kei, mi ban zo kei ning cilo ding hi hang. Leitung bup zankhuamial pen mei (electric) tawh sun nitaang abang sak Thomas Alva Edison ( inventor of electric bulb ) in hih bang na ci hi, ” Gualzawh nadingin pilna 2% hi a, hanciamna 98% hi. ” na ci zen veh aw ! Han ciam ni apiang zolo omlo hi. A piang nailo bek hi Napoleon in na ci buang hi ven maw.

Lung kia pah kei ni. A tawpna-ah kong gen nop khat om lai. Tua pen Sente’ paunak hoih mahmah khat hi, limtak ciamteh inla hih paunak tawh tha lain, tua paunak min in hibang hi. Tung solkhapi’ ong hehnepna aw nem, kei ( khapi ) pen ka tan phat mahmah laitak amial lam manawh kahi ta a, ka mial mahmah laitak a taang pha mahmah ding lam manawh ka hi hi, ci’n tungsolkhapi’n thu hong gen buang hilo hia?

Tua bang tektek mah in tu laitak i mial mahmah hang tung solkhapi bangin a tangpha mahmah ding lam ih mahnawhna phawka, lungkialo thasan in i hun zat siam a, i lungtang phasak le eima tha leh eima tha suang in mainawt tazen leng hualai ah mualdawn ah hong tang ciciai ta ahi Eima Hun (Our Time) hong tung tak pi ding hi. Tua hun ciang…….. Agelh: Bob Tuangpi