Ei-le-Ei kitheihsiamna ~ Dr. Sanga R. Laingek

Ei-le-Ei kitheihsiamna ~ Dr. Sanga R. Laingek

Thupatna: Kitheihsiamna kammal in a gen omzia bel i mihinpihte ngaihdan, khosakdan, lungsim putdan leh nek-le-dawn toh kisai chihte tengteng theihsiampih a eimah, mimal hinkhua pen mundang a om mite nuntakdan paizia toh kituaksak chihna ahipen mai hi. Tuni in gambung tuamtuam ah nungta in, Zomite leitung buppi dapsuak a kithehzak in i khosa uhi. England, USA., Australia, Malaysia, Singapore, Thailand, South Korea, etc., etc., chihte ah Zomite in neek-le-dawn diing ngaihsutna ziak a sum bawl in kithehzak suak hi hangh…

Leitung nuntakna leh khosakna haksat luat ziak leh khanvual enna uang tektek ahihman in Kawlgam-Vaigam kia hinawn lou in tongsan theih louh sing gam, Mangkangte tualleenna gamte nangawn ah sawlbang hei in sesum vang a vai loukuan in Mangkang-Mangvom thunuai ah munchih-mualchih ah Zomite kithehzaak in om suak hi.

Tunnu Zogam Nuam:

I pu-i-pate, nidanglai hunte in niang-le-tai in Zogam vangkhua tualnuam ah ngabang leeng in kua dang ngai lou in ana khosa uhi. Mahni kitoudelh zou leh India gamsung ngalsaute leh gamdang mite in huchibang a mahni kitoudelh leh kivaihawm a khosa Nam khat om uh ahihlam himhim phawkpha lou uhi.

Tua mahbang in amaute (Zomite) in zong leitung ah midang khosakna nuam leh khovel ah mihing om uh ahihlam phawkpha vet lou uh suak hi. Tulai hun bang a kikawmtuahna mumaltak om lou ahihna ah khua khat-le-khat nangawn kikawmtuahna haksat ziak in suangtu khat hinapi in midang, melmak bang mai a kidou leh khua-le-khua kisimtuah a ana khosa nilouh uh ahihman in neektak zonna, siamsinna leh laizilna lam ah ana tuantual petmah uhi.

Gam leitang hauhsakna leh sing-le-gua, gam-maang hauhsaknate leh leitung-leinuai a gou manpha Zogam huapsung ah om ahihlam himhim angaihsutna uah ana om pha baan lou kia tham lou in, phawkpha vet lou ahi uhi. Nidanglai Louneihdan ngeina (Jhum cultivation) tunitan dong in Zogam ah neekzonna omsun asuak lailai hi. Huchi ahihman in Lengtong – Pauno in hiai anuai a bang in Lavui ana gelhkhia in zaila in awi ngiahngiah mai hi:

NIM NA DILDIAL E ~ Lengtong Pauno

• Tunnu Zogam vangkhua tualnuam angai lou lah hi lou,
• Tun-Zua Laizomte angai lou lah hi lou;
• Lungdeih thai-kawi leh von nih-thum toh gibang khen in,
• Tongsan theih louh sing gam ah sawlbang ka hei.

1. Taikhua hong val zang ni hong suah sial vai lou-kuan in,
2. Sun nitum in muikhua hong zing mah zongleh;
3. Sun-le-zan mial-le-vak Mangvom Mangkang thunuai ah,
4. Tou-le-salbang sesum vang maw ka zaitha.

• Tung Sianmang aw na bawlsa tung sun nisate lah,
• Sou na vingveng e, sou na vingveng e;
• Ahihhang no’ng piak thuphate khat-khit-khat simkiik le’ng,
• Nim na dildial e, nim na dildial e.

1. Sesum aw kei a ding’n na leenna vang in la e,
2. Na tuanna batlah tulleel dawn saang mah ei;
3. Kei a diing in na zaalna kul in thuk mah sa’ng e,
4. Chikchiang pakbang kong lou, kong bat, kong tawi diam?

• Phungching lian Lunmangte lah zinleeng doh-ai siam hiam?
• Genthei liangvaite lah mangbang semsem ungh;
• Kong thum hong za in Toupa Kawlgam vai hong hawm in,
• Nuntak suahtak zaitha damna ngai ungh e.

1. Tung Sianmang aw na bawlsa tung sun ni sate lah,
2. Sou na vingveng e, sou na vingveng e;
3. Ahihhang no’ng piak thuphate khat-khit-khat simkiik le’ng,
4. Nim na dildial e, nim na dildial e.

Gam Kipaikaan Minam Itna:

Tanglai akipan tunitan pau-le-ham kidang lou, tunsung khat pan piang minam khat hinapi in, Zomite lungtuak a kalsuan thei lou a hun bangtan hiam khat-le-khat midang bang mai a kikoih in lungtup lah khat hi ngal vaihawmkhawm thei lou a i om nilouh uh bangziak hi peuhmah diing hiam chih ngaihsuthuai petmah hi. Gam kipaikaan minam itna anei thei nai lou mah kihi lailai hi hiam chih ngaihsutna ah thuklut mahmah mai hi…! Tua ahihman in, Zosuante, mimal tek i kivelphat chiat uh thil kul-le-poimoh petmah ahi hi.

Mahni Kivaihawm Gam thum ah Zomite kikhenzaak in, mahni mummum a kitumbuzial in khosa chiat uhi. Chittagong Hill Track, Bangladesh; Mizoram & Manipur, India Mal-Suah leh Chin State, Myanmar (Burma) chihte ah Zosuante kithehzaak in khosakna haksatak leh mahni kivaihawm thei lou a koih a om in, melmakte thunuai ah suak-le-sal dinmun toh kibang a khosa hi hangh. Suahtakna leh Zalenna lung-gulh in Salpha mi bangzah hiam in leitung nuntakna nusia in, Gam-le-Nam a diing in ahinna uh ana pia zong mi hunkhop ana om khinta uhi.

Abiktak in, Myanmar (Burma) a om, Zomite Kawlgam kivaihawmna huaise lua ahihman in, munchih-mualchih ah kithehzaak in America, England, Australia leh mun dangdang ah tuni in khosa uh a, Tunnu Zogam vangkhua tualnuam angai lou lah hi lou, Tun-Zua Laizomte angai lou lah hi sam lou, Lungdeih thai-kawi leh von nih-thum toh gibang khen in tongsan theih louh sing gam ah sawlbang hei in, Zogam Nuam ngai vungvung in mi tampite khovel lehlam ah nungta uhi.

Sesum bawl in guhtui kang khop hial a kiloh tawm a khosa in zi-le-ta vakna diing ngaihsutna ziak in haksatna tuamtuam, lungzuan sial in khosa uh ahihdan Lengtong – Pauno Lavui akipan i theithei hi. Zogam Nuam ngai vungvung a, i minam itna toh anungta mite lungtup leh suangtuahna i phawkpih a, Gam kipaikaan minam itna toh mahni Inn-lum pansan a omte in lungpi geel hun petmah ahita hi.

Gam tuam leh mun tuam a om Zomite in Nam khat (One Nation) i hihlam uh kiphawkthakna leh khanlohna hoihtak Zosuan sung ah hong piangkheta ahihman in lungsim tawng ah kipahna liantak toh ‘Zomi Mainawt, Mainawt’ chi a kalsuan chiat diing in kihanchiam tek ni.

Sabiak Kikhat Biakna Paizia Kituam:

Biakna pen hon gawmkhawmtu hoihtak ahihlai in lungsim a kikhenna hon tuntu zong ahi thei leuleu hi. Banghang hiam chihleh, leitung buppi ah Kristian kichi sapsap sung ah sabiak kikhat biakna paizia kituam ziak a lungsim a kikhenna thuktak hon tuntu in pangthei veve hi. Tua ahihman in Biakna pen gawmkhawm diing hi het lou in; Biakna in hon gawmkhawm theileh chih pen ngaihsuthuai mahmah khat ahi hi.

Etsakna khat gen zual le’ng: Roman Catholic Church paidan ah biakna kichian anei khat ahi a; Protestant Groups tengteng zong biakna paizia tuam kineih chiat ahi uhi. Church of Christ in Biakna aneihdan pen tua i gente tengteng lak akipan akituam vilvel khat ahi leuleu hi. Tua kawmkal lak ah mi kimkhatte in Kristian kihi vek hiven – Biakna gawmkhawm diing ahi chih ngaihdan nei pawl om kha naak sek uhi. Huchibang ngaihdan neih pen midang khenkhatte lungsim ah kikhenna piangsak thei ahihman in thil hihtuak ahih louhdan theihsiam diing in ahoih mahmah hi.

Khovel in ahon theihdan a akibang Sabiak (Religion) anei Nam i hihman in Biakdan paizia atuam nei tek himahle’ng zong i minam thil toh kisai leh neekzonna ahihke’h Khovel kivaihawmna ah kigawmkhawm theih ahi chih kichiantak in thei kilkel chiat le’ng deihhuai petmah hi. Biakdan paizia atuam ziak a kituam bawlna leh hun paisate a lungsim a kikhenna ana om zel sek pen vuimang vek ahih masiah Zogam pallun thei lou diing asuak hi.

Zosuante sung ah lungsim a kituam bawlna ziak a nawngkaina tampi om thei ahihman in pilvangtak a kalsuan a pai khiankhian diing in Nam makaite leh Pawl tuamtuam a heutu hihna dinmun neite khempeuh kiang ah hasotna chidamhuai i pia hi. Biakna paidan kituam zongleh Gam-le-Nam itna pen kituam lou ahihlam phawk a, pau-le-ham kituam zekzek Zomi sung ah ana om mahleh Zogam itna kibang a it chiat hi hangh chih Zosuan milip in i pomsiam chiat uh thil deihhuai mahmah ahi. Innteek pan chiat diing ahihdan i theihsiam hunhun uh Zogam hong pallun diing a, kipumkhatna hoihtak i lak ah ahong omta diing hi.

Thukhupna:

Adetdou Zomite Kigawm-nawnna ngak in Khovel kilchih-mualchih a om Zosuante kiphatmoh thupipen ahihleh pau-le-ham tuam zekzek ahihhang a kitheituah vek Zomite sung ah “Kipumkhatna” ahi hi. Tunnu Zogam vangkhua tualnuam ah lungtuak ngabang leeng diamdiam a phungching kumtawn Suangpi beel peuh le’ng Zogam hong pallun diing hi. Nuntak-Suahtak Zaitha damna tuang hong tung diing a, Nun nuam sawlbang heina vangkhua tualnuam angai lou lah om lou, tongsan theih louh sing gam pan Zuapa’n sulhei in tuanglam hong zuan pelmoh diing a; Genthei-Liangvai huibang mau a kahtam sial om nawn lou diing hi.

Huai hun chiang in leinuai-leitung, gam-maang hauhsakna Zosuan sung a telsui mite’n gah tam seem suang diing leh adetdou Zogam khantouhna phungchingsak diing uhi; Ami zata Zosuante in pakbang lou a tawi in, Saulim tual ah von nih-thum toh ngabang leeng in lamtual sai in thum dildil pelmoh diing uhi.

Atung a i gente khempeuh ataksuah theihna diing in bel leitung buppi huap a Zomite pangkhawm a, “Ei-le-Ei Kitheihsiamna” hoihtak kepbit gige kisam hi. Dr. Sanga R. Laingek