Ebola natna leh Leitung

Ebola natna leh Leitung

Ebola natna tawh kisai atheinuam i om leh keithei sun tawm hong hawm sawn ing Dallas pan. Tu laitak a aminthang mahmah natna hoih hetlo Ebola pen leitung bupah kilau mahmah hi.

Ebola natna hangin Africa gamah mi 4000 kiim sikhin a natna nei 9000 kim bang om ta hi cih WHO leitungbup Cidamna lam ten genkhia uh hi. Hih natna bawlna ding tudong ciang Zatui kimu nailo hi. Lai Siangtho sunga te atang tungtung ta ahi tam maw ci-in kangaih sun hi.

Ebola Natna leh USA

Ebola natna ading Zatui a om nailoh hangin nungla pek in Africa gam a huhna apia ahi USA gammi Dr.Kent acih khat in Afica gampan natna ngah ahih manin US kumpi in special Vanleng tawh la-in USA ah hongciah pih a tuni ciangdong dam hi.

Ebola Natna leh Dallas, Texas

Afica gam Liberian gampan hongzin Mr. Thomas Duncan (Ivy Apartment, Dallas, Texas, USA) hangin USA gamsungah Ebola natna hongtung hi. Duncan omna Aprtment leh akilahna Zatopi pen khetawh minute 10 khawngbek kipai dinga Texas Presbyterian Hospital ahi hi. Tua Zato pi Emergency inndei sungah Sept 26, 2014 in tung hi. Amah pen Oct 8, 2014 ni-in anuntakna bei ta hi.

Tua Ebola natna nei pa anat lai a akem nurse numei Nina Pham kum 26 (Ei Asia mi) khat Ebola natna hongnei leuleu hi. Texas Zato pi ah tawm vei alup khit ciangin Oct 16, 2014 ni-in Bethesda, Maryland ah Zatopi ah special vanleng tawh kipuak hi.

Pham anat khit leuleu ciangin Amber Vinson kum 29, numei nurse khat mah Ebola natna nei cih hong kilang leuleu hi. Tua nu Texas pan Vanleng tawh azin khia hi a Atlanta Zato khat ah kikoih hi.

Dallas, Texas ah Zomi

USA gamsung gamtaw lam Mexico tawh gamgi alum hieuhiau namun Dallas, Texas ah Zomi te mimal 200 kiim ki-om hi. Tu a Duncan Zato lupna Presbyterian pen Zomi te omna tawh tai 1 khawngbek kigamla a, khetawh Zato kilak a kana pai ziauhziauh na uh ahi hi. Inn tawh hong kinai peuhmah a kilung himawh mahmah hi.

Zomi te sangkahna tawh zong kinai mahmah hi. Kumpi lampan bel hihnatna kilawh ding lauhuai lo hi cih Cidamna zumpi lamten genkhia zel uh hi. Ei thu-um mi Zomi tezong hih Ebola natna tawh ikipelh nading thunget na ah hongphawk tek un. Leitung bup ah abei nading zong thungen tek ni.

Kawlgam Chin State sungpan hih Dallas kuam sungah mimal 8000 kiim ki-om dingin kilam en a, Kachin, Kayin te zong tam mahmah hi. I sanggam Haka lamte pen Indiana khit ciangin mi tam a om penna uh mun ahi hi. Asia mi Vietnam, Korea cihte pen tawm hetlo a Company anei bang tam mahmah uh hi. Kumpi Zum sungte nangawn ah amau mi Vietnam te bang tam mahmah ta uh hi.

USA Kumpi te Nasepdan

Hih Ebola natna om cih akitheih a kipan kumpi lampan deihtakin nasem pah uh a, tua natna neipa omna tungah Helicopter 2 sun thapai in khawl gige in lampi dungah palik te dim zihziah hi. Tua natna akithei phetin kumpi ten tua Duncan natna neipa tawh akizom zawdeuh mi 100 bang a omna na mun ah vadelh pahin akisam bangin sitna nei pah uh hi.

Duncan tawh akizom mi 20 kimbang nipi nih sung amau kia tuam omding in thu piapah uh hi. Banghang hiam cihleh tua natna pen nipi 2 khawng teh zong kilang pan thei cih thei uh hi. Sangkah tezong sangsungah zongpah uh a nawhtak in nasem uh hi.

Dallas khuasung Zato khempeuh ah Zato pai leng tuma kaalnih sung gampua lamah khual nazin hiam cih dotna himasa den hi. Tua nantna nei te inn sung Kumpi ten deihtakin hahsiang, Zatui kap pah uh hi. Tua nantna neite kipuakna Zato mawtaw tawmvei sung peuhmah zatloh dingin kikoih cip pah lian hi.

Cina pa mawtaw zat tezong zatloh dingin tuamcip uh hi. Cina tetawh kizom Ui (Dog) te zong sitpah uh hi. Hih natna nei akitheih akipan Biakinn te ah thungetna ah kihel den hi. Daniel Mangpu (Zogam Laaizom) Nadeih lianpen uh ki-itna nahi sak un…. 1 Kor 14:1