“Down Syndrome” natna ~ Hau Lun

“Down Syndrome” natna ~ Hau Lun

Genetic mutation a kici pianpih damlohna hangin pumpi le lungsim, a ngeina batzawhlohna khat ahi hi. A ngeina zah sang chromosome ki behlapna hangin hong piang natna ahi hi.

Pawl khat te in Down natna nei mite pen Mongo te ci-in sam uh hi. Mongolia mite tawh a meel uh ki suun ahih man hi. Khut le khe ngeina banglo nei thei uh a, pumpi a khan zah dingin khanglo in a tun tom uh hi.

A khuak uh zong, mi cidamte zahin hatzo lo uh hi. IQ 50 kiim ciang bek pha thei hi. Pianpih lungtang natna le pianpih gilpi damlohna te nei thei sawnsawn uh hi. Kumtam khit a ta neite in Down natna nei hong piang thei hi.

Down natna pen zatui tawh ki bawlin a damsiang thei natna hilo hi. Ahih hang a damzaw, a pil zaw dingin pilvang tak in kep theih ding ki sam hi. Mi cidamte zahin a khuak uh a hoih zawh loh hang tan 10 a ong zo Down natna nei om hi. Tua ahih manin inn sung pan limtak makaih ding le thapiak zawh ding ki sam hi.

Down natna nei veve, khat le khat a thahat na le a thanemna lam uh ki banglo thei hi. Mite tawh ki kholhzia, pilna lam sinna, nasep zonna lam cih bang amau ki sapna lamlam telsiam a, huh ding ki sam hi. Gilpi natna, lungtang natna cih bang natna te zong nei thei deuh ahih manin a hunlap in natna muhkhiat nadingin hunman in Siavuan te kiang ki lak zeel ding ki sam hi. Deihsakna tawh, Hau Lun Lam-etna