Dear Dr. Do Khan Khup,
Andersonville Theological Seminary,Georgia pan Doctor of Theology (summa cum-laude — 4.0 GPA) gualzawhna sangpi nong ngahna hangin lungdampihna kong khak hi.
USA gam leh Europe gamte Education System ki lamdang lua dingin ka lamen kei hi. Germany gam sung ah Doctorate Degree a kipak ciangin mite lai zawhdan khenpi 4 in ki khen hi. Laizawhna a sangpenpen pan in a niampenpen hih a nuai a bang a hi hi.
1. Summa cum laude
2. Magna cum laude
3. cum laude
4. genügend ( good enough)
Zomite sungah Ph.D, Th.D ngahsa te sungpan in ”Cum Laude” tawh Doctorate man Pu Dr. Vum Kho Hau bek a hi in ka thei hi. Gam khat leh khat, sang khat leh khat a kibang lo zong hi kha in teh. (Ka theihkhelh leh hong maisak un).
Tu in, Th.D hong ngah Dr. Do Khan Khup a pen, cum laude, Magna cum laude zong hilo in, laizawhna ah a sangpenpen Summa cum laude tawh hong zawhngiatna thu ka simciangin, lungdampih lua in ka cimul bang a tholiang hi. Germany gamah mite in Doctorate aman uh ciangin ”Cum laude” a ngah zawhnak uh leh lungkim mahmah ta uh hi. Mite in Magna cum laude na ngawn zong haksa sa mahmah in a om laitak in, ei Zomi te Pasian in hong tuambawl a, Summa cum laude tawh Th.D zo ih omna in Zomite’ Pilna lamtawh kisai Tangthu sung ah ciapteh tak ding hi ci in ka mu hi., Pasian in Zomite honglap tohna lianpi khat hi ci in ka pom hi.
Dr. Do Khan Khup, Sia Khup aw, na gualzawhna ah lungdampihna, angtanpihna leh zahtakna Zonet leh Tonsan tung tawn in kong pulaak hi.
CSKhai
Ph.D (Theology) Student
Universität Hamburg
Rupertistraße 67
22609 Hamburg
Germany
Comment piaknop aomleh...