Dimno’ Nu laikhak – 4

Dimno’ Nu laikhak – 4

Kongit Dimno,
Tunung kong hopih lai-in, “ka omdan nuam meel kei,” nong cih-in ka lung hong nuam sakmeel kei, tua nitak mah in laikhak hong gelh pah ding ka cihmah hi ven, nasep pih lawmte hong hawh dihdih in tua teng tawh hong gelh pah thei lo suak ing. Thulamdang in na ngaihsun kei in maw. Naute e leh hoih tek in teh maw!

Kong hopih lai-in Thangpi in, “Pa…ke’n ka gol ciang i gam puah nuam ing… i gam sia lua… eimi te zong midang te tawh ki bang kei… hai pha deuh leng ki lawm…sanginn ah kalawm te’n zong no Chin te… mi zawng te…, mihai te… ci-in hong koko……,” cih hong gen mah ei. Tua Thangpi hong cih in ka lungnop loh hong beh lap lai ei, Dim. Hih kong laikhak zong na sim khit phet in Thangpi na sim sak pah in maw. Thangpi zong thu tawmkhat hong kuppih nuam ing.

Thangpi, tunung i ki hopih lai-a nong cih kammal in ka lungsim hong su kha peuh mah ei! Nang’ tuabang khawng ngaihsun nai kei niteh kong cih hi ven! Hoih ei tuabangdan in Zomi (Chin) na hihna hangin mai zumna na thuak khak pen, deih ing. Ko zong na nu tawh ka sangkah lai un, Zomi i hihna, mi namneu i hihna hangin mimai ah neu etna leh sim mawhna tampi na thuak khin hi ve ung. Ahi zongin kong gennop khat, ka tuah khak thu; na ngaihsut dingin hong gen nuam ing. Kei; napa zong kum (14) kiim ka phak lai-in, khat vei sanginn sung ah Zomi i hihna hang leh mi namneu i hihna hangin ka lawmte mai ah neu etna leh zahpihna ka na tuak a, cih nading thei lo maizum lua-in ka khiluang hi! Tua nitak a kipan in Zogam puahin Zomi te mipil misiam asuah theihna dingin hamciam in sem ning ci-in ka khensat hi. Tua hunlai-in tangiat akah hi pan ka hi aw!

Ka tansawm tun tak ciangin Zogam leh Zomi te ci nai kei ning in, ka khua leh ka khuapih teng a masa in ka puahzawh na dingin hanciam phot ning ci leuleu ing. Ka hihtheih zah in i khua a khan toh theihna dingin, ma ka pang hi. Tua zawh kum (5) khit, ka tangval no tak ciangin i khuapen koih phot lai ning in, i veng teng, i tanau i nai huai teng mihoih asuah theih nading leh mi etteh ahih theihna dingin hanciam ning ci kik leuleu ing. Ka hihtheih zawhzah mah in hanciam ing. Ahi zongin ka upmawh hong bang lo-in, tua bang pak tawh a ki puah zo ding ahih loh lam ka nasep kawmkawm in ka phawk sansan hi.

Na nu tawh ka kiten khit, nang hong paai ma deuh in khat vei limtak ka ngaihsun pha kik a, bangbang hi leh, i innkuan sung mahmah ahoih theih nading, pawlpi sung ah hong ki etteh in, khua sung ah hong kipak ta-in leh veng leh paam in zong hong etteh theih nading hanciam ni’ ci-in na nu tawh ka hamciam kik leuleu uh hi. Ahi ciang ding khat tung teei napi-in, ka lungkim bang taktak leh mite in hong etteh taktak ciang dingin tung zo kei ung. Thangpi kong gen thu te limtak na ngaihsun pha kik kik in maw. Bang hangin hih ci bang in ka lunggulh na leh ka hanciam na teng tang’ tun zolo ka hi tam ci-in tu’n kalung ngaih kikkik ciang ka phawk thu khat in:-

Tangiat ka kah lai hun, Zogam leh Zomi te’ khangtoh na ding ka hanciam laitak in, kei mahmah ki puah masa zaw in, kei’ ka hoih khit ciangin i innkuan sung puah in, tua khit teh i veng i paam, i khua i tui puah in, i khua i tui a khang toh khit tak teh i gam leh i minam te a khang toh nadingin han ciam masa zaw leng a hoih zawk lamtak ding phawk kha pan ing. Ahi zongin tun bel kei lah a teek hi ta, bangmah asem zo ding hi nawn lo kahi ta ve! Nang kabat lai, ka khangno lai-in hih thu aphawk hi peuhmah leng ut buang in ei! Tun lah ka lunggulh hang in ka tha leh ka ngaihsut na mahmah in hong pia nawn lo! Abei sa ka hun te khat vei ala kik thei hi leng ……

Nang kong deihsakna kong gen loh hangin thei pah dingin hong lam en ing. I pu leh pa pianna i leitang napuah ding hong phal lo hi keng. Hoih a sa lo zong hi keng. Na kipat ding leh zong ka hihzawh zah in hong panpih lai ning. Napa ka hihna tawh hi lo-in, Zomi khat ka hihna leh ka itna, zogam ka itna tawh hong panpih ding hi ing. Ahi zongin i gam i lei na puah ding na hanciam ma-in, nang leh nang ki puah masa in, tua khit teh i innkuan sung, veem leh paam teng hong puah in la, aban ah i khua hong puah in, i khua na puah khit ciang, mi etteh leh mi’ muan mi’ suan in na om khit ciangin, i pian khiatna , i pu i pa len na, tunnu Zogam leh Zo tate hong puah pan le cin ut ing.

Ka deihna bulpi taktak bel nang mahmah mi’ etteh theih, mi’ muan mi’ suan dingin hong om zawh sawm phot in, mi’ muan leh mi’ suan in na om khit ciangin nasep nop, na lunggulh teng a banban in hong sem pan le cin! Tua hi leh na nasep ah na mavang in, daupai zaw kha dingin hong lam en ing. Na lunggulh te tangtung zo zaw dingin honglam en ing.

Dim, Thangpi’n atel zawh pak kei leh a tel theih nadingin nih vei thum vei na genpih le cin ut ing. Tuhun natna lamdang dang aom si leh khua hun ki laih tawh na vatsuk na vak tohna vuah na kidawm zaw deuh un maw. Kei bel tawm khawng khuh lai-ing in, tua bek bukkhuhza tang nih tang thum khawng ne le’ng hoihpah lel in teh!

Hongit,
Utuang
Tuipi galkhat pan

By,
Pau Khan Kap
26 September 2010