Dimno’ Nu laikhak – 3

Dimno’ Nu laikhak – 3

10 September 2010
Friday

Itluat ngaihno,
Thangpi te unau zong alai huan ding nai kik ta in teh maw?Thangpi in e leh asang lai te azozo mah hia? Amah bel kimawl uuk lua mawk in alai alelh khak ding kalung patau peuhmah.

Dim, i tano te nitak in khat veivei a vaknop uh leh na kham peuhmah kei in maw. Nitak avaknop sim in vaksak den ding hong cih lah hilo leuleu. Ei hunlai in i nute in khat vei sunsun i vaknop mahmah nangawn vakding hong phal peuhmah lo-in, “nalai uh en un… nitakin naupang vak ngei kei,” ci-in hong kham zelpen mangngilh ding hanciam taleng mangngilh thei nai mahmah keng.
Khua sung ah khatvei sunsun vedio amawk na in kilak in i nute kiang ah; “ Nu… tu nitak vedio hong en sak ve… tualpi ah ABM te’n amawkna in lak hi ven…,” “Kul nai kei ei tuangno… na lai uh en peuh un…no sangnaupangte nitak vak dah un…nalai uh simzaw un maw….

Kumkhat a khatvei hongtung kumcin khawmpi ah, atawp ni pai nuam in; “ Pa… tunitak hong kikhawm sak ve, khawmpi atawp ni hita hi ven… lasiamte zong sam uh ci… ka lawmteng zong apa’ te’n paisak ding uh hiven…keizong pai nuam tak ing e…,” “Kul kei! Nalai uh sim peuh… na ci uh a damnak leh nidang ciang hihsanga anop ci zaw, pawi hong tungtung lai mahmah teh…” ci-in i pa te’n nitak vak ding peuhmah hong phal lo-in, laisim ding bekbek ci ta lawmlawm uh. I pa te amawh sak nuam hilo in, amau i lungsim dan hongtheilo in, i mai ah laibu koih in laisim limlim peuhleng lai a lotngah theih pahpah ding hongsa hita zen. I lungsim lah i mai a om laibu ah tung mahmah lo, hua khawmpi bekbek ah om in, mandat sung bangah i lawmte bang tawh ki mawl keei liang…

Pawi lah ki pai kha lo, lai lah ki lotngah tuan lo ahih manin ei pen tha nih tak a sum suak mawk! Bang hanghiam cih leh i lai pen khat vei sim kik kul in, khawmpi lah manta kipai thei nawn lo hi ven! Tua banghun laitak in i pa te’n, “ Pawi ah vapai pak un la, hongciah baih in, nong tun kik uh ciang nalai uh sim un,” ahong ci hi le bel bangzahta in anop zen tam …pawi ah lah apai kha hisi…lai lah a lotngah sa-in sanginn aki tung ding lah hisi …

Thangpi te unau zong ei danmah abat khak ding patau mahmah ing. E’n hoih i saklohte i tate tungah va zanghzangh lai mawk le hang, leitung ah eigel nupa sangin ahai zawding mi aom nawn tam ci-ing. Pawi ah apai uh leh zong nuamtak in pai-in; la ki sate ngai , thu kigente limtak angaih theih na ding leh vedio a en zongin nuamtakin a et theihna ding, feeling tak tawh a et theihna ding limtak geelsak in maw. Pawi ah apai zong, vedio en in apai uh zongin phalbuang phallo buang khat in na om het kei in. Phalbuang phallo buang, pianuam buang pianuam lo buang khat a aom khat pen keibang in ka zakdah mahmah a hih lam i tan sawm kah khoplai pek pan a nong theih sa hi ven, tuate hong gen kikkik nawn se kei ning! Na vakkhiat sak leh lungkim tak in inn pan un paisak in la, tua ai kei leh vak sak vek kei zaw in maw, Dim. Lungkim lo pipi leh phalmeello pipi in pai sak le cin i tate aom na peuh ah alungsim uh suakta lo-in, alawm agual te mai ah amai khing lua ding uh hi ven! Mi lak ah a ki hel sunsun uh Mai mial ngeungua in aom khak ding pen phal keei lua mahmah in, ngaihsun zo mahmah keng!

Pawi ah apai laitak un asangkah lam uh mangngilh in, lai asim uh ciangzong ih mut ding mangngialh zah khopin alai bek ah alunglut theih nading pen ka lunggulh lian penpen leh ka hanciam pih penpen hi a, hih zong nanglo tawh apiang zo ding ahih loh lam, na thei sa ban ah hong theisaksak nuam lai ing.

Lai kasim ciangin vedio en nuamin, vedio en phialmah lengzong ka nute’n banghong citam kalai sim loh, ci-a lungnuam lo in lai hunte… ka ngaihsut khak kik nangawn ka lungsim sungah hong patau sak khat om lai! I tate tua bangdan hisak nawn kei ni maw, Dim! Vedio en in, pawi apai uh zongin nuamtak in en in, nuamtak in thu a ngaihtheih na ding pen ei anu leh apa tung ah ki nga pen a, adiakdiak in nang tawh tu laitak om khawm na hih manin nangtung ah avek pi in ki nga ahi maw.

Hongit,
Utuang
Tuipi Galkhat pan

By,
Pau Khan Kap
12 September 2010