Dimno’ Nu laikhak – 2

27 August 2010 (Friday)

Kongit Dimno nu,
Nasep tu laitak atamsim tawh tutung kong sum khak zekai pianin, thulam dangin hong na ngaihsun ke’n maw. Inn lam ah zong buaisan laitak keei loding nai vua. Kei zong kong ciahding hun hong nai mahmah ta mawk in, ka mang bangin inn lam bekbek mangmat thapaai keei ing.

Dim, tu tunga kong sum khak tawh vangil ding khat peuhmah na lei hamtang le uh cin lunggulh peuhmah ing. Banghang hiamcih leh ka pu in ka naseppih ka lawmteng lak ah hong itpen hi ding hiam, khat vei nasep man khit ciangin hong sam simin, lai-ip khat hongpia in’ inn ka tun ciang ka et leh asungah sum tawm na om. Tuateng peek khat zong zangngamlo-in kong khak pah hi. Tua ni mah in, ka lawm tawh ka kimu dihdih vua, “Ka innkuanpih te’n sum koi-ah zangzang hi diam, inn lam ka hopih simin tu kha sum tua zah…tua zah… hong khak in maw…i naute dam lo-in zato paina tua zah bei…khua sung panin tang sum don tuazah tuazah…pawlpi pan mission ading tuazah tuazah..etc…ci den…hiimm… kei lah ka senpi mel loh tawh haksa sa peuhmah ing. Innlam ciah ni ci leng lah innlam ah i manawh ding bangmah lah om lo, hitak ah lah omom lai ni cileng mi’ nasem in a kiteek ding hiliang mawk in, mailam nuntak, kalsuan zia ding ka lungngaih ciang ka lunggim lua in ka sihnop hun bang tam vei pi om,” ci’n ka lawm in khuisa ngeungeu in hong gen dih zen! “I innkuanpihte in heuh i sum khak te tawh a kisap uh na lei masa lo-in adeih teng peuh uh na lei masa ai tam, peuh ci zanzan veng aw!

Kong gen nop bulpi taktak bel na sum zatna uh ah bangmah ngiahsutna meel neilo-te bangin na deih peuh uh lei kei un la, na kisapte a masa penpen in nalei zaw un hong ci nuam ing. Gentehna, na neih nai loh bilbah khat lei-a na bah pen na kisap hi-in, ahi zongin numei pawlkhat te’n, a bil uh mun nih mun thum bang vut beh-in bilbah nih leh thum bang a bah uh pen aval ahi aw! Khut meelaizom ah zungbulh na bulh uh pen kilawm mahmah napi khemee, khepi khawng ah a kibulh se pen kei bangin kisam sa lua keng. Ei dinmun tawh zong kituak sa nai kei ing. Samkang seel nadingin sam vomza na nuh pen ahi dingmah hi-in, ahi zongin sam sanza nuh… lungkim tak zo lo in sam kiilsak leuleu… tua tawh zong lungkim zo nai lo in, sammet sai ah pai in meepho (Hair straightener) tawh taih in sum tampi bei lawh liangin na tangh sak uh pen i kisapte ahi kei kha tam maw ci ing. Maingo nadingin tanakha, powder, make-up…cih te na nuh uh pen khial hong sa keng. Ahi zongin na mai uh hoihsak nuam lua in Beauty Salon ah pai in, mei (Electric ) tawh pawng’ na te’n pen limtak ngaihsun pha kik le’ng sum amawk zat taktak tawh kibang sa ing. Khii lei in na ngawng ah na awh uh pen na vang’ neihna khat uh lah hi, zong na kilawm mahmah uh a, ahi zongin na khengawng, na khutngawng khawng vuah na awh se uh pen kilawm sa na hi uh tam ci sam ing! Adang a lei huai zaw om nawn lo maw!

Dim, hih atung a kong gente tu laitak no numeite asimtham a na kidemdem lamtak uh, na deih mahmah leh na uuk mahmah uh ahih lamtak pen hong thei ing. Ahi zongin, nang tuadanin gamta pah niteh hongci ka hi kei a, na gamtak ding zong ahong kham nuam hi tuan keng. Na hih khak lehzong bangmah mawhsakna konggen kei dinga, zong kong mawhsak kei ding hi. Banghang hiam cih leh no numeite’n kizem lamsang na uuk phatdiak uh pen kong theih sa hi.

Ahi zongin nahih leh zong na hih ma-in, hih ka hih sawm pen ka kisap takpi mah a hiam… tua ahih kei leh ka ut ahi lel tak hiam… cih limtak na ngaihsun masa le cin ut ing. Ka kisap hi ei na cih leh lunghiang lo takin na hih in, sum ding a kicin kei leh zong naleitawi’ liang in. Ahi zongin na ut ahih leltak leh bel, pia’ khat na ngawn mawk zat ding hoih sa keng.

Hihdan a kongcih ciangin na kisap bekbek, na kisap bekbek… na lei-in la, na deih mahmah, na lunggulh mahmah a om zongin na lei kei in, a hong ci hi tuansam lo ka hi maw! Nong tel khial kha deh! Puan nei ngawn ing, puan kisam kengh ci-in, lo kuan puan tawh khuasung vakin, nipi ni-in tua mah tawh biakinn ah na kikhawm liang kei in maw! Kuang kisam kei ing ci-in, zin zahtak khat peuh i neih ciang’ ei zatzat ngei te tawh an na thuk’ liang lo-in, ahoih zawdeuh mi’ lak ah a kilawm zaw deuh ding kuang li leh nga beek lei sa in koihkhol le teh! Ko, hihtak ah tui hai tawh an ka ne phial uh zongin zin zahtak, lengna zahtak a nei ding hisam lo hi ve ung.

Ka zi na hihna hang, innkuan khat i hihna hang tawh hih thute a hong gen hi ke’ng. Numei khat na hihna, inn nupi khat na hihna leh lawmta taktak i hihna hang tawh sum zat zia leh sum zeek zia dinga hoih kasak tawm a hong gen hi zaw. Nitak nai 7 a sat ding hita, ka nasep pai hun leuleu, hih zah hong gelh phot ning. Thangpi te unau zong ka gennop tawmkhat om mah hi ven, mai ah ci kik mai lo dia! Hih kong laikhak nihvei, thumvei bang na sim le uh cin ka ut hi ven, atawp dong na sim sak uh tam ci-in, lunghiang kawmkawm sa in…

Hongit den,
Na Utuang
Tuipi galkhat pan

By,
Tg. Pau Khan Kap
28 August 2010