Dimno’ Nu laikhak – 18

Dimno’ Nu laikhak – 18

Haksatna tampi tak leh nat leh sat tampi tak te kawmkal panin kum 2012 hong zawh pih in kum 2013 sung ah hong kalsuan tohpih ih biak Pasian hoih sa ing, Dimno’ nu! Topa ei innsung baangkua ah hoih sa diak lai ing!

Dimno’ nu aw, kum hong paipai in ni leh kha te hong beibei hi. Mi pawlkhat te a ngei mah bangbang in, ahi zongin pawlkhat te leuleu a nuntakna uh thaksuah sak in ki lamthak uhi. Eizong tua aki lamthak te lak ah kihel zo leng lunggulh mahmah ingh.

Tukum in Pasian kiangah ki-ap na kanei a, “ Pa Pasian aw, tu 2013 kum sung peuhmah a hoih lo zuu leh beer ka sawk nawn loh na dingin ka pumpi hong kem in, hong makaih in” ci-in ka ki-ap hi. Pasian in lunggulh nawn loh na lungsim hongpia ding ahih manin ka lungmuang mahmah hi. Nong theih sa mah bangin tuni ciangciang a hoih lo-a ih theih kunza, sahdah, khainii te ih kiteen mapek pan a ka zat loh sa hi ven. Ahi zongin zuu leh beer pen innlam ah kasuk loh hangin khualzin in migam milei katun ciang’khat veivei gualnop na’ng ci-in lawm leh gual te tawh dawn thei zel hi’ng. Ahi zongin tu in tua zuu leh beer dawn nawn loh dingin khentat khin ta ingh. Kei ut thu in ka zozo kei zongin Pasian in hong zawh pih ding cih thei ka hih manin ka lungdam khin hi.

Dimno’ nu aw, nang zong Pasal thak khat hong nei hi ta cei! Nidang in na Pasal in zuu leh beer te dawn thei a, ahi zongin tu a na Pasal thak in zuu leh beer te dawn nawn lo, zangh nawn lo hi. Nang’ na lungdam lo maw! Kei ka lungdam lua! Lungdam na thu Pasian kiangah ko khawm ni ei! Hih bang lungsim hong guan pen kua mah dang hih tuan kei, Pasian mah hi. Dimno leh Thangpi te kiangah na gen in la, “Tu 2013 kum a kipan in nidang a na Pa uh ahi lo Pa thak khat nei ta uh teh!” ci-in na gen in. “Banghang maw, Nu?” ci-in hong dot leh, “ Nidang a na Pa un zuu leh beer dawndawn a, ahi zong tun tua ahoih lo zuu leh beer te na Pa’n dawn nawn lo hi! Tu’n Pa thak nei ta uh teh” ci-in pelh lo-in na gen in maw.

Ken zong tu 2013 kum aki panin Lawmnu thak khat deih sing e maw, Dimno’ nu! Na muam theih zel khainii leh nateep thei zel zaate’ kei ading leh ih tano te adingin tu 2013 kum a kipan in paisan in hong nusia ta ve! Tua hi leh Thangpi te unau in Pathak leh nang adingin Pasal thak nong neih mah bang un, kei ading leh tano te adingin zong Lawmnu thak leh Nuthak a hong nei hi ding hi ve ung!

‘Tua ni ciang’ bangzah tak in a nuam zen ta maw, Dimno’ nu!

Hong it mahmah,
Na U ( Dimno’ Pa )

January 2, 2013