Dimno’ Nu laikhak – 10
Dimno’ nu, sum tawm kong khak kawmin lai tomno khat hong gelh kik ing. Pasian in damna hongpia in hunpha hong ngahsak lai ahih manin hihcibang in lai ahong khak theih zelzel kahi a, i biak Pasian tung lungdamna ko hang!
“U aw na nasep bang hiam, na nasep dan hong gen ve?” ci-a nong dot zenin ka lungsim hong phawng kinken ahi manin ‘hong gen lo ding’ ci-a ka khensatsa hinapi-in, ahi zongin tu-in hong gen ning!
‘Zingsang khuavak madeuh in tho in ka zingan ding nitak a kadiah kholh sa buhtang, ka huan hi. Ei lam bang sam lo-in electric tawh ahih manin naikhat sungin ka mehding leh ka anding ka min khin a, tazisa ding zong saipanin ne ngam lo kahih manin ka zingan ding sungpan in tawm khen beh in ne kawm pah hi. Nai 8 a.m. lapin na sepna mun tungin nasep puan, safety boot, luku ( helmet) cihte akipan ka nasepna vua uniform teng tawh nasep ka kipan pah uh hi.’
‘Eilam lokuan bang lo-in sun nisat sung ‘niliim ah khawl ni e, guahtam in guah theu ngak ni’ cihte om lo-in, nisa guahzu nuai ah sun 12 dong kasem tan suak uh hi. Ni hong sat ciang bangin ka lungtung pan a ataak, ka khua-ul pen ka khut a katawi sik tung tuin minutes 2 zong pha nailo in keu pah liang hi. Tua zahta in ni a sa hi. Ka uang gen hi kei! Ka cihtak pi mah hi.’
‘Khua hun bel ei lam bang lo-in, tuk leh khal, phalbi cih bang omlo in, khat vei le nisa, khat vei leh guah zu cih hi ziau hi. Ni hongsat mahmah laitak in thakhat thu in meeipi hong ki kaikhawm in guah hong zu vat thei lai hi. Tua bang hun ciangin kitai thei tuan lo ahih manin lutang khawng na-in nap khawng tui thei zelzel hi. Annek hun ci-in sun 12:00 – 13:00 sung teng ka tawl ngak kawmin ka sun an puak ka anpheeltuun ka ne hi. Nitak naikhat hong satkhit ciangin nasep ka kipan kik leuleu vua, nitak 17:00 ciang sem ung.’
Tua bang teng tawh nisim in semin kana om toto a, tuin in innlam ah i zattawm ding leh naute kisap nengneng na leitheih nading in sum tawmno hong khak thei hi ing.
Hih atung a konggelh lai te nasim ciangin na lungsim sungah bang na ngaihsun kha tam gen thei kengh. Ahizongin ke’n kagelh cilin ahih leh laikung khat leh laidal khat tawh innsung niliap nuai ah kagelh hilo hi!
‘Kagelh cilin nisa nuai ah ka pumpi khua-ul tawh dimin khua-ul tawh kagelh a, khat veivei ciangin sik sa, meei sa katawi na hangin liam zelzel ka hih manin ka sisan tawh ka gelh hun zong om zel hi. Nasep khial thei zelzel ka hihman in tot kangah hun zong om thei hi. Tua hun ciangin dahna leh patauhna tawh kagelh hi! Tupeek tawh gelh in, sikmolh tawh zong gelh zel ing.
Guahtui tawh kagelh hun zong omin, khitui tawh ka gelh hun zong tam veipi mah om hi.’
Nisa guahzu khawl lo-in a zu-aham thuak in kagelh ahi manin hih laikhak pen adangdangte sangin ka nuntakdan kilang zaw dingin um ingh.
‘Tu-in ahi leh nang’ simtheih dingin laikung khat leh laidal khat tawh innliim niliap nuai ah kong gelh kik hi-in, kagelh cil lai-a ka khua-ul sa tawh kagelhh te, ka sisan mahmah tawh kagelh laimalte leh ka khitui tawh kagelh te kimu thei nawn kei mawk ei, Dim!’
‘Midangte bangin laigelh siam hi leng hih kong laikhak sung ah ka khua-ul sa, ka sisan te, ka khitui te leh no ading a kagim thuak nate, no anlim zaw deih na nekzawh khak ding vua leh ci-a kanek an te, no kongkhual manin na tuah haksatna teng khempeuh avekpi in na muh kik theih dingin hong gelh thei nuam sam ing ei maw!’
Nitak lumhak in hileng, sun in tawl lua zel ingh.
Hongphawk tawntung,
UTuang
bY,
Pau Khan Kap
21 November 2011
Comment piaknop aomleh...