Diksakna pan diktanna, Justification a zom

Diksakna pan diktanna, Justification a zom

Diksakna pan diktanna
Pawlkhatte in hih dikna thu pen dikkisakna thu ci uh hi. Amau le amau dik a kisa mite’ tungah Jesuh in cidamte le midik a kisate adingin ahong pai ka hi kei, cinate le mawhneite a sam dingin ahong pai ka hi hi, na ci hi (Matt. 9: 12, 13). Tua ahih manin dikna thu tua “Justification” pen dikkisakna cih ding sangin diksakna ahih kei leh diktanna cih ding kilawm zaw hi. Pasian’ lam panin diksakna kivaihawm a, mawhneite lam panin diktanna kingah hi. Pasian a diksak pa hi a, mawhnei mite a diktangte ahi uh hi.

Kisakna pen diktanna tawh kizom a, diktanna pen diksakna hang ahi hi. Jesuh lo tawh midik na kisak laiteng sapna na ngah kei ding hi. Tua ahih leh diktanna ih cih bang hiam? Pasian’ lam panin ong sepziateng pen diksakna hi a, mihingte’ lam panin ih ngahziateng pen diktanna kici hi. Diktanna ih cih pen Pasian in Jesuh Khrih tawh leitung mawhneite adingin diksakna thu khen sak khin zo a, tua diksakna thu a um mi peuh mah in diktang zo uh a, tua pen diktanna kici hi. Pasian pen ong diksak pa hi in, Jesuh Khrih pen ih diktanna hi a, thu ummite pen diktang mite ih hi uh hi.

Diksakna thu masa a, tua khit ciangin diktanna tawh kizui hi. Diksakna pen Pasian’ ong hehpihna hang bek hi a, diktanna pen upna bek tawh kingah hi. Diksakna pen Jesuh ong tatkhiatna tawh a piang thei bek thu ahi hi. Jesuh le a singlamteh tatkhiatna bekin diksak zo hi. Jesuh Khrih pen eite hong kidiksakna Thu ahi hi. Diksakna le tatkhiatna pen a kikhenkhia thei lo khiatna nei kammal ahi uh hi. Tuamah bangin upna le diktanna zong a kizui pelmawh diktanna thu ahi hi. Mei a kicih leh a khu a om pelmawh bangin upna a kicih leh diktanna in zui pelmawh hi. Dik ong tangsak ahi tua upna (Justification by faith) bekin diktang sak zo hi. Tua pen tangmi/palai Jesuh Khrih hang ahi hi.

Tua upna ii a gah pen kisikna hi. Upna le kisikna pen a kikhenkhia thei lo sumtang tawh a kibang hi a, tua Diktanna pen upna hanga kisikna thu ah a piang thei bek thu ahi hi. Hehpihna + Diksakna = Upna + Diktanna. Hehpihna hanga Diksakna pen Tatkhiatna tawh kipia hi. Upna hanga Diktanna pen Kisikna tawh kilak hi. Diksakna pen Pasian nasep hi a, Diktanna pen Mawhnei mite’ vaipuak hi.

Diktanna ih ngah theih nadingin Jesuh’ ong tatkhiatna Singlamteh le a thawhkikna thu up loh phamawh hi. Up ding pen teel ding thu hi nawn lo hi. Up ding pen ei tawh a kisai cih ciang bek hi loin up a kul pelmawh hi a, tua pen sawlna ahi hi. Up lohna hanga sepna thamanh pen sihna hi bek hi. Faith is not an option. Faith is not just a responsibility. Faith is a duty. It is not a matter of choice. It is a command.

Evan. Suang Dal