Dictator i cih kuate hiam? ~ Hau Za Cin
Dictator in ama thu bek tawh vaihawmna khempeuh paipih hi. Ama thumang dingte bek panmun guan hi. Ama deihna leh ama thu a nial ding peuhmah panmun guanlo hi. Ama sepnopteng a sep theihna dingin ama cih bangbang “aw” a ci ding mite bek tawh semkhawm hi.
Thukhun leh bylaws cih bangte a om hang a deih bangin kawikaih thei hi; ahang: a kawikaih hang a dal ngam ding kuamah omsak lo hi. A dal a nial a omleh zong damdam in nawlkhin in mailam ah valsak a, hemkhia, a nawngkaisak nawnlo dingin notkhiat hi.
Vai khat peuh ah THU tawh i kalsuan kei a, mi tawh i kalsuan leh dictator suakbaih mahmah hi. Makaipa in, makaite in amau thu bek hong zuisak in, amau thu bek tawh hong kalsuanpih in mipi hamphatna ding hong hihpih lo semsem uh hi. A tawpna ah amau nasem hong suah dihdih uh a, amau deihna a tangtungsak dingin mipi hong zang miau thei uh hi.
A kilawh theih nam a hi diam? Kilawhtheih lua kisa, tun zong a kilawhmang khin hi. A diak in Zomite gamtatna, vaihawmna, kipawlna leh kalsuannate ah a zung zam kiphalhmang khinta hi. Ki-ukdan dingin i deihlohpen hinapi i tamzat pen hi bilbel hi.
Mi’n zang leh i mit kham mahmah in en zang leng kuamah theihloh bang kek in ki-uang mahmah hi. Makai i sep sung peuhmah eima deihna leh eima thu bekmah tawh kikalsuanpih a, zong kisem phei giapgiap hi. Midang khat in laih leh tuate in zong ama deih bang beka sep ding sawm pah geu zel hi. Giapgiap bek sam!
Dictator khat in amah a lawnthal zo a om mateng ama thuthu ahih manin ama thuneihna a bei ding patau mahmah a, a sih dongin a nuntakna tawh dal ngam liang hi. Tungnun kituhna ahih manin amah a laih ding a om mateng leitungbup ah ama tungah vanpi bek a om hi.
More: Advisor leh Dictator ~ Pau Khat Suan
A khangto minam peuhmah in thudik thuman tawh kalsuan ding hanciam uh a, mi khat leh nih ukcipna nuai ah amau nasem bek a nuntak ding utlo uh hi. Mikhempeuh hamphatna kibanga nekzonna, pilna, hauhna, siamsinna a neih ding uh gelna THUKHUN nei in a hanciamzo peuh kilamsang in kidem uh a, kituankheh lo in a khangto dingin kitawsawn zaw uh hi. Nang zong nang level ah dictator na hisim khinkhian hiam? (A zom ah zoplai ding) Dr. Hau Za Cin
Comment piaknop aomleh...