Deihsakna taktak leh ahoih ngimna ~ Khup Lian Thang

Deihsakna taktak leh ahoih ngimna ~ Khup Lian Thang

Tuni ka thangahna thu khat John C. Maxwell laibu sunga thangthu khat ong hawmsawn nuam ing. Hih tangthu tungtawn in ih thungaihsutna behlap to dingin ong zawn ing.

Journalist thu dong khat in inn ki lamna mun khat ah pai in innlam nasem tangval thum thu dong. Hih tengah bang sem na hiam? Ci-in khat khat in dong hi.

A dawnna uh;

• 1) Ama sa pa in, “Sum ngahna dingin na a sem hing” ci.
• 2) Anihna pa in, “Sehnel leh suangsi a pua hing” ci.
• 3) A thumna pa in, “Gentheih haksatna a tuak mite omna dingin inn a lamlam hi ung” ci in lawptak in dawng hi.

A sep uh ki bang, a sum ngah ding uh zon ki bang hi.

Ahih hangin a nasep na tungah a ngimna uh, bang lungsim tawh sem cih pen khat leh khat ki banglo hi.

1) Ei zong athumna pa mah bangin ih leitung tawmvei ih nuntak sungin , ih tavuan ih maban te lawptakin ngimna man tak tawh thumanna cihtakna tawh sem ni. A khatna leh a nihna pa bangin ih tavuan ih vaipuak ih nasep na tungah tua bang lungsim ih koih kha hiam? Ih koihkhak leh kikhel dih ni.

2) Minam aa dingin na sepna, pawlpi aa dingin na ki piakkhiat nate hangin bangmah metlawh hetlo kha mah ding hi teh. Ahih hangin nasep dinga tavuan na neih khat hoihtak na sepna hangin na upmawh loh zahin a genthei a pangpa khat na kha lum tuam dinga, ama nuntakna nangawn na khelzo thei ding hi. Tua hilo in, na ii deihna na lungsim bangin na ong kisep kei zenzen leh zong telsiam sawm zaw in. Hehna lungtomna tawh na thukkhak leh na mipihte in lamdang ong sa kha ding uh hi. Itna deihsakna a neitaktak te in lungduai takin nasem zaw a, lawptak in a nasep zom veve uh hi.

3) Na nasepna, na sum zonna ah khat veivei na lung a kia thei hiam? Hih nasep pen mihing khat ii sep ding a ngeina hi a, tua in mihing khat ii hihna leh a thupitna hipah hi. Ei te in hanciam takin na ih sepna hangin ih inn ih lo te ih puahzo a, ih nu ih pa leh ih u le naute in ong noptuam pih mahmah hi. Ei tungah mi tampi ii mailam kinga gige hi. Hanciam tak leh lawptakin na sem ciat ni. Lungkia kei ni.

4) Hih bangin hanciam takin ngimna hoihtawh na ih sepna in Pasian deih nuntakzia zong hi aa, Pasian a it mi khempeuh zong tua bangin gamta ciat ding uh hi. Na nasep na tavuan pen “Pasian deihna tawh a sem, ih u ih nau aa ding itna tawh a sem na hi takpi hiam? Pasian deihna bangin ngimna hoihtawh a sem na hih leh na nuntakna na sepna in khiatna anei nuntakna hi in, tua in na minam na innkuan, na beh na phung khempeuh pak bangin ong palhsak ding hi.

5) Na nuntakna, na sepna na kalsuanna khat peuhpeuh ah ngimna hoih nei ngait in. Note tawh, Khup Lian Thang