Dahna Pulakna: Mangpha Pu Ngin Za Langh (NYC, USA)

Zomi Innkuan USA
Executive Committee

Dahna Pulakna: Mangpha Pu Ngin Za Langh

New York City a teng, Zogam lam a zanggam Pyidawtha khua a khangkhia, khamgam Muallum khuami, Milun beh Pu Ngin Za Langh in Oct. 31, 2014 ni zingtung in New York khuapi sung a Hospice zatopi khat panin damlohna hang tawh a leitung nuntakna hong nuisiata hi. Pu Langh pen a damloh zawh sawt simta a, lungtang natna leh sin natna tawh zato hoih pen ah a kibawlzel hi mahleh, abawl pa anungta Pasian in a hun tung sakta ahih manin ahong nusia ahi hi. Ama hong nusiat laitak in kum (64) cing khinpan a, tu leh tate tawh US gam sung ah thupha tampi asanbeh theilai dingin a kilawm mahmah khat ahih manin, hun nailopi a hong paisan pen lamdang kisa in, na kisa mahmah hi.

Pu Langh in ahong nusiat laitak in agei ah a it mahmah azi, Pi Khual Za Man leh a tapa upa pen, Pa Joseph Suan Sian Mung a kipan, Zomi Innkuan USA kipawlna General Secretary Dr. Do Khan Khup, Rev. Thang Cin Pau, Tg. Thang En Khai, Tg. Ngin Kam Cin, Tg. Sian Muan Thang, leh a tanute Nu Nem Deih Lun, Nu Ngai Sian Dim, Lia Luan Ngaih Nuam, a mo a makte teng, tu leh tate teng, meeltheih tanau teng kim takin om thei uh a, lunglen khuangaihna tawh mangpha kikhak uh ahih hangin thupha ngah inn papi khat a hihna kitel mahmah hi.

Pu Langh hong nusiatna hangin adah akap, lungleng khuangai a om, Pi Man leh Pa Mungtawngte unau a kipan a innkuanpih teng, meeltheih tanaute, khuapih tuipihte, pawlpi mipihte, leh Zomi Innkuan New York City tawh a kibangin Zomi Innkuan USA Executive Committee pawlzong nakpi takin kidah hi. Adiak in, tu laitak a ZIUSA EC pawl sung a ka mapanpih uh, Dr. Do Khup leh a innkuanpihte tawh akibang in hih dahnate ka puakhawm uhhi.

Pu Langh pen thunuam, lungnem, teitang, mi kuhkal mahmah leh Pasian thu um mi thumaan mahmah khat ahi hi. Ama cihtak thumanna hangin Pasian in thupha pia in a tu a tate teng US gam sung ah kikhuasa sakzobek hilo, mi tungtuang in thupha a sang innkuante ahi uhhi.

Pu Langh a tangvalcil pawlin ama pate in Muallum khua panin Pyidawtha khua asat pawl in pang uh ahih manin Pyidawtha innteek bangkuate asuak zo zahdong in khua leh tui in amuan asuan upapi khat ahi hi. Tua thupha kizomsuak in, US gam ahzong New York khuapi leh Columbus khuapite ah inn bulpi in pang tawntung zo uhhi.

Pu Langh pen ZIUSA Genvai thukhunpom Pawlmi kician mahmah khat ahih manin, Zomi Innkuan USA min tawh ama luang kipham/kivui ding hi. Ngeina om bangin dahna pulakna in paakkual khat tawhzong mangpha kikhak ding hi.

Pu Langh tawh hun nunung pen Nov. 1, 2014 (Saturday) ni zingsang lam in kizang ding a, Mount Olivet Cemetery hanmual ah kikha ding hi.

Pu Langh hong nusiatna hangin adah akap lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin ahong siamna dingin thu ka ngen uhhi. Ka mapanpih uh Dr. Do Khup zong cidam thahat in ih minam maban, khua leh tui mabante ah picing takin ma ahong pansuak zawhna dingin thupha pia in, thu ka ngen uhhi.

Executive Committee
Zomi Innkuan USA

Tulsa, OK
October 31, 2014