Kimpu leh Kimpi – 13
“Tuni rehearsal bel nuam a sa mahmah om hang ei maw”
“Ha ha ha….”
“Lawm Kimpu na cihna maw lawm Mutpu..ha haaa…”
“Ha ha… pai vo anne mengmeng ni ei, nitak ciang i holim nop zong tam ei… ”
“Hi ei, pai ni ei, ka annekkuang hong tawi pah ning ei, no a e?”
“Ko zong va la nung ei… na ngak o Kimpu”
“Na annek dan lungzuan tuak ve teh aw Kimpu… bangci a hia..”
“Za vet kei ei lawmpan… hmmm…”
“Kimpu, Kimpu…”
“Heih, hawi, kiss…. he, bang e… bang e ka gen, bang e nong gen…?”
“Hmmm…. Bangci kua ngaihsun ngeungau na hia… kong hopih uh zong zalo a… nungakte hampha ei maw..”
“Eh, tu sun ka hunzatna pan zingciang bangci hih ding cihte ngaihsun kha ing e, sorry, anne ni…”
“Kong dot nop mawkmawk khat, tu lai thugen te in pulpit tung pan, “Ka gam uh hong huh in, ka gam uh hong khangto sak in ci uh, kikhop tawp ciang mi in ah pai in, ka tangvalte uh, ka nungakte uh gamdang a tun theihna ding ciin thungetna va neihsak kawikawi leuleu, i gam i cih pen koi lai ahi tam, tu-a i tenna maw, mailam ah i tenna ding pen?”
“Tua bang khawng lim ngaihsut luat ding hi kei Kimpu, zingciang na kidemna ah khatna na ngahna ding kilim thawi mahmah lecin hilel…”
“Tua ahih leh a dangkhat hong dong lai ning ei. “Numei in ama khuat, sumkuang in a li khuat” kici pen bangcihna ahia?”
“Aw, tua bel hong gen thei nung ei. Nungkum Lia leh Taang kiteelna hun ah zong extempore speech ah topic khat in kiguang a, a ngah kha mi 3 te in gensiam vanglak uh hi. Sumkuang in a nopsakna dingin tuili sungah lutsuk in tawldam tak, tha beilo in tuitaw ah annek zong hi. Ahi zongin tuili sung a tunna dingin deihtak in tui in a to nawkna tha pen a phulzawh kisam a, tua ahih kei leh tuitaw tung theilo ding hi. Tua a phul zawh nak leh lah tui nuai a tun ciang nuamsa in ommuang thei hi. Tua mah bangin mo thak te in zong a innkuan thak sungah haksa tampi thuak dinga, tuate a thuakzawh leh nuamsa pan ding hi. Tuate thuak ngamlo a a pelhna a zon leh a khantawn a innkuan thak tawh kilemlo dinga, nuamsa ngei nawnlo ding hi,” cihna hi.”
“Tu lai ciang tuaci nawnlo pi. Mo thakte in amau nopsakna ding bek khuat uh a, amau nopsakna ding a ngah nak uh leh a innkuan thak peuhmah thudon nawnlopi… tua zong ‘numei in ama khuat’ mah hiveve lo ding hiam? Ama nopsakna ding khuat khia khin cihna hiven…”
“Khaih, i holim nop tuak in, ann kuang sawp ni in, room sungah holim dih ni ei, niangtui khawng zong om leng, zingciang social ding hi in, tu nitak laisim khiam deuh leng hilel lo hiam, hih bang holim ding hun baihlo ahih teh…”
“Hi lua ei, hi lua ei.. pai ni ei”
“Nung kum in tua bang thute extempore speech ah ka guan ding uh ciang lawmte tawh kiho khawm in, hih bangin gen leng ka ci uh hi. I khanglui paunakte kinak lumleh luata ahih manin kuamah in thudon nawnlo, thusim nawnlo lua ahih manin a lehlam in gen leng mite in a deihtak tak phawkkik in hong kibawlpha kha tam ciin ka ngaihsun uh hi. Tua Kimpu cih bang mah in ‘sumkuang in a li khuat cih pen’ a deihna tuam hi a, tu lai khangthakte in tuate thupi sim nawnlo, amau nopsakna ding bek zong, a nung khuat in, ama nusia hizaw ta in tua pen ahihna bangbang in (tua lawm Kimpu gen bangin) gen ek leng, lehgen, engko leng mite in kiphawkna in a nei tam ka ci mah uh hi. Ahi zongin ei Zomimio College sangnaupangte bek hi a, a za tam lo ding, a thei tamlo ding ban ah college sangnaupang bek hiding ahih manin a tangzaizaw ding, mi tam a huam zaw dingin Siamsim Khoppi ciang hihzaw leng ka ci uh hi. Tua hileh siamsin te bek hilo, nu leh pa, mipi tampi zong thungai ding uh a, kihamphatpihzaw ding hi ka ci uh hi. Tua pen tung nailo hi. Tu kum Siamsim Khoppi ciang kihih leh hilo diam…”
“He, tua lawm Thangpi hong gen himah ei. Numei nih khum khop pen kilemloh kipatna a hih bangin uino nih khumkhop zong kipeh ding kipatna hi. Numei ki it mahmah nih pen innsung khat ah omkhawmsak, teengkhawmsak, giakkhawmsak, kikhawlsak den, kimu sak den lecin, a sawtlo in hong kipet pah ding uh hi. A cil in bel hong kiliak phial ve un, kumkhat kivei manlo in kingit ding uh a, amau bek hilo a lawm a gual lawh ding hi. Tua manin mipil te in inn khat ah numei nih khum khoploh hoih pen na ci uh hi. Lawm Thangpi ciamnuih banga (ka pa in ka nu taw bek liak lo in, a sungh te taw zong liak) khat zawzaw in a khatpen i taw liak den nuam ahih kei nak leh numei nih pen sawt kikoihkhawm theilo cih pen a ngeina hi… ”
“Himawk maw lawm Mutpu? Tua bang ahih mawk leh i nu leh pa khangah innkuan khat ah unau pasal khempeuh a zi te uh tawh inn khat ah a om khop theih uh pen bang hang hi ding hiam?”
“A hang tampi omlo e, amau hunlai in zong dictator kivaihawmna om cih hiziau lel hi. Pa pen ahih kei leh nu pen thuthu himai a, mo te, tapa te, tanu te kuamah nu leh pa vaihawmna nial theihna chance nei vetlo uh hi mai hi. A kam uh kihumbit hi top mai hi. Tua pen ukcip i cihcih pen hi.”
“Aw, himawk mah vem maw. Tu hun ciang bel mi khempeuh in amau lungsim bang, amau deih bang, amau lunggulh banga nuntak ding thupi kisa a, i nu leh pa hun tawh teh in a kihampha mahmah aive maw…”
“Hampha kisa hang ei, nidang bang hileh tuni nang bang Nuamno tawh ki kiss kha lo ding himawk hive cin…”
“Ha ha ha….. hong mu nam aw… [mu lo e, mi hong gen om hiven…]… mawk peuhmah…”
“Phamawh kei ei, a tua bangte a hampha hizaw ta… nungakte khawng hehsak sangin ki kiss sak thei leng mailam hizaw hi… hilo maw lawm Mutpu?”
“Hilua, hilua… lawm Kimpu bel na melhoih a hamphatpih himawk ciai, hong eng khong hang ei..”
“……………”
“Na dawnna ding theilo maw Kimpu? En tak hi kei e, beek ci ve niteh”
“Aiveh, en taak mahmah kei ei, a powder gim bek kiza man ei… ha haaa….”
“A banban in hong pai ding hi ei, ngaklah kei o….”
“Zawlai aw… bangteng om lai ahia…. bangin zui lai ding ahia?”
“Tua te bel en zong i thei dia hia, a hun a tun ciang nong hilh kei dia..”
“Ha haaa…. college kah cih mawk peuhmah bel, i khua lam ah i omdan teng i gen ngam mawk dia hia?”
“Khua lam ah gen ding hilo e, i khua lam cih thadah, khuapi ah zong ei sangnaupang lak bek ah gen ding hi. Midang, lawm dang, biakinn khangno lak khawngah zong gen khak hetloh dingte hi ei…”
“Ok, ok… ”
“Tuni thu gen kik leng, Nuamno tawh bangteng kiho man nai vua Kimpu? Kimpi te lawmta zong a lawmnu Tum buaipih buai keei ve uh aw maw… nang lah mangngilh bawl pianpian mawk ve cin..”
“Nuamno tawh bangmah gen kei ung e, kidemna ah hong deihsak thu khawng, tua ciang nungkum amau hun ah haksa asak thu cih khawng hi. Kimpi te lawmta zong galmuh mah ing e… nusia cih bel, nusiat na ding kinaih luatna om ngei kei, khua khat pan hi ung cih bek hizaw…”
“Nong tun ciil lam un no gel vive kithuah in mi khempeuh no a kingai hong sa e maw”
“Hi mah ei, tua na gen pen… ”
“Tua leh…”
“Tua mana tu dong Nuamno in zong amah tawh hong muangmawh den…”
“Muangmawh hilo a midang na ngaih ding hong phallo hizaw lo ding maw?”
“Theilo maw… Kimpi bel a lungsim picing mahmah hi. Minam it, thukhual, nasep lah kizen, mi lah deidanlo, kiniamkhiat si, ka nu deihte hi…”
“Nang deihte hilo maw… Nuamno e leh?”
“Nuamno bel a melhoih seisai in, a lungsim khawng kawi pian tawh kibang, zong heh baih, lah hazatna hau, mi hoih a sak peuh tawh kingai pahpah thei leh kilawm sa ing…”
“Nang hoih cina hong ngai ahi pah ve…”
“Ka ngaih taktak ding lah hisa thei keng, aman lah hong kineisak mahmah…”
“Tua mana free kiss khawng a ngah ziahziah nai ve… khatvei tangval sunsun, bang…”
“Khatvei tangval sunsun pen lawm Thangpi genna pan siasak kha leng kibawlpha kik thei nawnlo ci a, ka lunghiang mahmah hiveh aw..”
“Khangno lai hun bel kidop ding himah, na kidek zawh kei leh Nuamno ngai vet inla, na zi dingin ngaihsun pah vet in, nanga dinga piang zong hi mai ding aive… your destiny”
“I ngaihsut bangin kipai theilo himawk ei.. lawm Mutpu…”
“Guai, zan sawt ta ei, lum phot ni ei, zinglam ciang holim kik ni. Kimpu zong ihmut cim kei leh zingciang a kidemna ding uh tha nei kei kha inteh, ngah kei lai leh bang Nuamno in ei teng hong zial ding aimaw… ha ha…”
“Nuamno tung mah tu kik zel maw… melhoih te pen hampha mawk uh ei”
“Melhoih ngah kha te zong hampha uh ei, hilo maw Mutpu?”
“Hilua, hilua.. ci ni ei, mangpha vo”
“Awle, nang zong na mangpha o, lawm Kimpu bel mangpha cih zong kul tuan kei ei, amah nungakte mangmat ding theihsa… he heee..”
“Tua ci tuan kei veh aw…”
(zop lai ding)
Hau Za Cin
Phuitong Liim
Comment piaknop aomleh...