Dahna Pulakna : Mangpha Lia Ruth Niang San Nuam

USA gam, Oklahoma State, Oklahoma City khuapi a teng Pa Zam Khen Khai @ Thang Kim, (Naulak beh) leh Nu Ciang Khan Cing te tanu tumpen Lia Ruth Niang San Nuam, Kha (11) in abeisa May 14, 2016 ni nitaklam nai 4:30pm hunin Sisan Cancer (Leukemia) natnatawh mual ong liamsanta cihthu izakmanin Zomi Innkuan USA kipawlna in nakpitakin kidahpih hi.

Pa Zam Khen Khai te innkuan pen Zogam, Tedim uksung, Pimpih khua ateng hi-in nuntakkhuasakna anuamzawding lunggulhna tawh abeisa 2011 kum in USA gam ongtung uh ahihi. Pasianthupha Tapasal 4 leh Tanumei 2 aneihna lakuhah tutunga ongnusia I naunopen a nautumpen hi-in abeisa June 25, 2015 in suak in ongdamlohciangin a beisa April 12, 2016 ni-in zatozuanin siavuan siamahten zatuizaha tawh ongbawlsak, ongkhoisak uh himahleh leitung mipil misiamten anuntakna honkhiazo nawnloin tawntung Pa Pasiankiang ongciahsanta hi.

Pa Zam Khen Khai te innkuanpen USA ongtuna kipanin Oklahoma City bulphuh Zomite kipawlkhopna Zomi Innkuan Oklahoma City ah kiciantakin pawlmi nalutpah banah USA gambup Zomite sihnavaiah luangkiphamnadinga kiphuankhia ZIUSA Genvai kipawlna ahzong pawlmi kiciankhatin onglutpah uhhi. ZIUSA Genvai thukhun ombangin inauno Lia Ruth Niang San Nuam pen Zomi Innkuan USA kipawlna in $ 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih ipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 7,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.

I nauno Lia Ruth Niang San Nuam tawh a nunungpen hunzatkhopding pen ongtungding May 21, 2016 (Saturday) ni sun 12:00pm hunin Corpus Christi Catholic Church, 1616 N Kelly Ave, OKC, OK 73117 ah Rev. Fr. Robert Kimpu leh Rev. Fr. Carson Kritten Brink ten Catholic pawlpi ngeinazui-in hunkhempeuh ong makaihding uha tuakhitciangin Rose Hill Cemetery/Hanmual, 6001 NW Grand Blv, OKC, OK 73118 ah daitansakna/Vuina kineidinghi. Inauno ongnusiatna hanga adah akap, alunglengkhuangai pianna nulehpa sanggamteng akipan khuapihtuipih tanaumeltheih akuamapeuh ibiak Vanglian Pasianin ong hehnemtek henla lungnoptawldamna ongguankimtek tahen cihthu kongngetpih uhhi.

Dahpihna lianpitawh
Executive Committee
Zomi Innkuan USA, Inc.
May 16, 2016