Covid hunsung kikep danding pawlkhat ~ Dr. Mangsan

Covid hunsung kikep danding pawlkhat ~ Dr. Mangsan

Medical lampan lawmte in kidop kikep danding pawlkhat kisam om lai ahih man in hih anuai aa te gen leng hoih ding hi cihna tawh hong gen hi ing.

Covid positive ihih lian loh hang huih khamzolo aa Oxygen kisam khat hong om tak ciang…….

• cina kem ding 2 leh 3 hoihtak ki seh sitset in ahih theihlai teng tua cina kemte koi mah pusuak khia nawnlo in lupna khan ah om suak ding.
• huih khamlohna tawh hong nusia khat aom aa leh zong tua cina kemte Self Quarantine dan in ah koi mah pusuak khialo aa tawlkhat kikep phot ding

Luanghawm tawh kisai zong i it penpen i ngaih penpen hi mah ding hi. Ahi zong hunhoih lai bang in luanghawm kawi ngeungeu aa ki kah theih hong om nawnlo phot ding hi.

*Hih pen ken zong haksa kasak mahmah khat hi aa ka pa luanghawm kawi ngeungau aa ka lungkim dong akapkap khat ka hih man in tulaitak aa hong nusia te innkuan pihte akhasiat dan ding uh ka telpih mahmah hi.

Bang bang ahi zong ami taktak pen ahu asan tawpna lian in Topa kiang ah alengto vingveng ziau ahih man in luanghawm pen leitawh akibawl milim khat bek hita mai hi.

Bek thamlo in hih virus tawh hong nusia luanghawm pen luanghawm mawkmawk zong hilo aa Covid virus tampi in a suksiat pumpi himawk ahih man in naak lauhuai mahmah hi.

Tua luanghawm in ama tung aa natna dan lian mah ei leh midang tampi tak tung ah hong piangsak thei hi cihpen khasia mahmah tamah leng i ngaihsut loh aphamawh thu hita hi.

A luanghawm pen mi tampi tak athatlum Virus tawh kidim hi cihthu pen anusiat innkuan pih te aa ding in ngaihsut hak mahmah kha mah ding hi.

Ahi zong midang te hih bang gimna tawh asih ding uh deihsak hetlo i hih man in luanghawm pen virus tampi omhi cih i လက်ခံ loh phamawh ding hi.

• ong huh ding teng in PPE tawh kituam sitset in a luanghawm zong plastic 2 Layers tawh tuampah ding
• pi guk (6 Feet)sung peuhmah kuaman naih lo ding.
• WHO te guidelines bang in zuih ding teng i zuih ding.

ci in hihteng atom in hong genkhia hi ung. Atawpna ah tha kongpiak nop in…. Hih natna gilo angah u leh nau te aw lungkia peuhmah kei un thusia tampi aom hang in hih natna pan adamkik tamzaw pekpek hi. Asi atam tawh aki bat hang adam kik tam zaw thamtham hi ci in kong hanthawn nuam hi. I zekaai luat ma in Topa khephung va zuan ngiat ding hihang. Topa in damna hong pia kik ding hi. Lungdam.

More: COVID ka kantan zia – Lungsim cidamna muhzia pan

Lungkia peuhmah kei un u leh nau aw. Asi te thu bek izak hi aa a damkik te thu i za kei hi. Bang hanghiam cih leh adam kik tamlua mahmah ahih man in aki gen zo lo ahihi. Mitampi tak damkik khin zo uh hi.

Topa aa ding kimanna i neih lai ding naak aaleh Topa in hong damsak ding in ka um ngiat hi. Tua ahih man in ” Hih natna pan Topa’n hongdamsak ngeingei aa leh Ama aa ding bek in ka nungta ding hi ” ci in ki ap ding hi hang. I ki ap nading in zong hunhoihpen hipah hi.

Thugenna pawi Crusade cihte sang in ki ap hun ding ahoih zawtham ahihi. Lungsim ki tamzan takpi tawh ki ap ding ihih man in Topa in hong sang lo in om hetlo ding hi. Topa aa ding nuntakna kan aa thupi zaw vantung leitung ah khatzong omlo hi. Topa in hong zat theih ding naak aa leh DAMNA hong pia ding hi. Amen Dr. Mang San