Covid a thuakte Kosiatna (Victim Blaming) hih ken! ~ Cing Van Kim

Covid a thuakte Kosiatna (Victim Blaming) hih ken ~ Cing Van Kim

Myanmar gam sungah COVID hangin mipi a kipan biakna makaite tampi in hong nusia uh hi. A hang tampi om thei mah ding a, banghang hita leh ko beh lohding kisam hi. Tua banah mipi tampi zong kisihlawh hi napi, i zahtak siate in hong nusiatteh kilangh deuh-a kigelh ahih manin “biakna makai vive bek” a si danin zong deihkaihin ki ngaihsun kha zong hi ding hi.

Biakna makai te in pawlpi mite a vanna uh, hong arna man uh le a phunciak thei i kam te a lau manun hong pai tantan manin hizah a kilawh hi lel hi. Mopawi le thunget te ah i sam tantan a, cina khat om leng thungen ding i sam hi. Dahna sihvuina te ah kipeel theilo ahih manin hong pailoh uh phamawh a, natna ngah lawh uh ahi hi.

Tua ahih manin gamsung/pua pan “biakna makaite a sih pen a mawhna hang uh hi, Pasian’ dantatna thuak hi, tua acih man/tua ahih loh man” cihdan akipan hong nusia khinsa biakna makai siate mawhsakna kammal peuhmah pau kei ni. Innkuan bupa kina ngeingai lungkham khimzing kimlai, hong nusia sa i makai te mawhsak behna kam kidawm ni.

A hang na theih aleh nang peel pah in. A hang taktak zong Pasian bek in thei ding hi. Gamdang ah cidamna tawh kisai facilities hoih ahih manin mi tampi a suakta hilel ahi hi. Hong nusia sate in “double dignity” nei uh hi. Tua banah a cianlai innkuan pihte lungkiat nading piangsak lel hi.

A tom-in cileng, hong nusia sa le a na laitak biakna makaite a kipan mi khempeuh kosiatna bawl kei ni. Mipi huzap lau-in nei napi a dam banga mipi lakah kihelhel zong om thei hi. Tua in natna kilawh sak semsem hi.

More: Hehpihna tawh khatvei ong post kik nuam ing ~ Lia Cing Van Kim

Tua ahih manin hong nusia sa biakna makai te a “mawhna hang uh hi” cih tawh kosiatna bawl ken la, hong nuntak pihlai biakna siate zong “hong pai kei in, a gamla pan thu hong ngetsak in” cih siam ciat zaw ni. A kipeel theilo dahna te ah bittak a kidal theih nading a kisam vante pilvaang takin vaihawm sakna tawh pumpi dam nading kihuh thei a, kamcip na tawh lungsim dam nading kihuh thei hi. Lia Cing Van Kim