Covid-19 tawh kisai Khitui Gospel pan nasepna tomkim pulakna

Covid-19 tawh kisai Khitui Gospel pan nasepna tomkim pulakna

Covid-19 tawh kisai sep ding Khitui Gospel in gelna anei kihimasalo in i minam sungah Covid-19 gimna hong huaisiat luat ciangin siamlopi mah, theilopi mah, neilopi mah thungen in hihtheih sunsun sungkhia-a, pan i lakna pan in tudong hong kizomto suak ahi hi.

Amasa lam in Malkual, Cikha kuam a dingin nakpitak i hanciam a, natna hong khanzui in Tonzang gam, Tedim gam banah zanggam zong i seploh hong phamawh hi.

Oxygen tawh Nasepna

Dik ding huih giautauna kialpi in i minam sung i gam sung hong nawk ahih manin it le ngah tampi in hong nusiatkhin a, tampi mah oxygen giaugtau in thumletau in ki-omlai hi. Khitui Gospel in Pasian maitang en in pan i la-a, Cikha, Tonzang, Tedim gamte huh in i buai mahmah kawmkal ah zangsung Kawlpi kuam zong hong huaisia lua ahih manin i nasepna khanloh hong phamawh hi.

Oxygen Cylinder

Oxygen Cylinder 40L-te Cikha, Tonzang, Tedim ading tampi i vaihawmpih banah Kawlpi ah kawmtheih dingin a 100 a sim in i lei hi. Minam, biakna pawlpi deidan omlo Oxygen kisam cinate Free in i kawmsak hi. Hong kawm tamlua ahih manin amin in i gelhzo kei ding hi.

Oxygen Concentrator 10L

Oxygen Concentrator 10L-te zong Cikha, Tonzang, Tedim kuam ading i vaihawm pih banah kawmtheih dingin pawlkhat i koih a, Oxygen kisamte free mah in i zangsak hi. Mei tawh zom a dikziau ahih man inlem mahmah hi. ZYA Presidentpu Mung (Kam Suan Mung) in agenna ah, “ama zat sung bekbek Oxygen bungpi 40L-te sungah kitun hileh, bungpi 20 peuhmah pha ding,” ci ci’n Khualpu(ZYA) in hong gen hi.

Oxygen Concentrator hong kawm kha teng;

• 1.Sitni Pu Cin Siang Thang (President ZCD)
• 2.Rev. Cin Za Mung ( Ex. Associate Pastor, Emmanuel Bapt.)
• 3.Dr. Pau Sian Lian
• 4.Sia Pau Hau Sum (UNICEF)
• 5.Nu Lunpi (Layseih Store)
• 6.Pa Kam Suan Mung (ZYA President)
• 7.Rev. Dr. Kai Hau Lian Pau (Youth Pastor, Berean EBC)
• 8.Sianu Zuan Zen Cing,(Rev. Hen Khan Go zi, ZBC Tahan)
• 9.Rev. Dr.Cin Lian Sum (Ex. Associate Pastor, Emmanuel Bapt.)
• 10.Pastor Gin Khen Suan (New Life Mission Church,Yangon)
• 11.Pa Thawng Khan Sang (St. Peter & Paul RC)
• 12.Rev. Thang Kim (Full Gospel, Yangon)

Zatui zaha tawh Nasepna

Nat le sat atam mahmah hangin tulai khuahun luanzia zui in cidamna lam zato leh siavuan siamahte nidang banglo bek thamlo in Zatui lei ding takpi nangawn hong hamsa hi. Hibang kawmkal mah Khitui Gospel in Siavuan Siamahte lamlahna bangin zatui zaha i lei a, Cikha Zoto, Tonzang Zato, Tedim zatote ah zong i puak banah khuapi Khuata deidan omlo ei khaptantan in puak in i huh kawikawi hi.

Mualpi, Theizang, Phunom, Pimpih, Sozang, Taingen, Hiangzing khuate ah zatui siamte zatui kicing tawh kuansak in a khawnkhong in i van hi. Darkhai, Selbung, Vanglai, Mualbem, Haupi, Teeklui, Tuilangh, Cingpikot, Anluun, Keizang, Ciau, Haimual,Saizang, Pakzang leh Tuikhiang cihte akipan khua tuamtuam ah zatui akhonkhong in i puak hi.

Annek tui dawn tasamte huhna

Gambuai zawh sawt in nasep khawl kitam a natlesat tawh vaikuan zolo zong kitam mahmah ahih manin annek tuidawn haksa zong i tam mahmahta hi. Tua ahih manin kham le zang ahaksa zawdeuhta ading, mimal zui ahi zong, Pawlpi zui ahizong in a khua akhua ah ahizongin ei khap tawh i batzawh tan antang, sathau, besan cihte i hawm hi.

Thukhupna: Hih atunga i pulak pak teng, i sepsa leh i sep dan tomkim cingin i pulakna pak ahi hi. Man(photo), Min le khua min kipulak khate lem asalo i omle kigen ni, phiatkik ding hi hang. Pasian itna leh minam veina tawh nong piakhiat uh sumlepai leh van le nate angsung leh aituam vai in kizanglo ahihna leh akham azang, pawlpi biakna deidan hetlo in huhna kisamte mah huh i hihna akilangsak nuam i hi hi. Hite khempeuh Khitui Gospel sep hilo-a, i vekpi a i sepkhopsate Khitui Gospel min tawh hong kipulak bek a hi hi.

I khuahun hoihnai hetlo a, mipi kigenthei mahmah lai ahih manin nong kihel lailoh in i minam donghtuahna hotzawh ding hinawnlo hi. Nek tawm ding antang hong kingen in i guak ciahkik sak leh Oxygen hong kingen in piak ding omnawnlo a, a sih uh i zakkik pen i laitang na ngaungau hi.

Tua ahih manin i minam donghtuahna kitheihmawh bawllo in thasanlai a, ma a pangkhawm dingin kong zawn uh hi.

More: Zankhang kimin kah tamlawhna ~ Sia Do Khup

Nasepnate pen a hun zui in Sia Do Khup facebook Account : Sia Do Khup, ah ahunhun in hong kisuaksak hi. Note tawh khut kilen kawm in, Sia Pauno (Director, Mission & Relief ; Tears Gospel Ministries)