Covid-19 leh Babel tausang ~ T. Sawm Lian

Covid-19 leh Babel tausang ~ T. Sawm Lian

Leitung bup a cidamna lam tawh kisai a kipawlna lianpen World Health Organization (WHO) in pulpinatna lauhuai, pandemic ci-a a pulak, kum 2019 kum bei kuan pana leitungbup a lingsak Conora Virus Disease (COVID-19) tawh kisai ngaihsutna tuamtuam tampi omte lak panin, Babel tausang kilamna tawh genkhawm leng i ci hi.

Piancilna 11 sungah tuiciin a tunkhit ciang Noah suan leh khakte hong pungin, tuate in kampau khat neiin, nisuahna lam Shinar ah a omkhopna uh, tua munah van a baan ding khuapi khat lam a sawmna uh leh a kipatna uh kimu hi.

Mihingte kithutuak mahmah uh a, zong thahat uh hi. Na lianpi sem thei dingin pilna siamna zong nei uh hi. Kithutuakin, pau nam khat bek a zatna uh hangin nasep zong baih mahmah hi ding hi; tua pen Topa in in zong thei cian mahmah hi (n. 6). Ahi zongin, tua bang nasepna, kalsuanna pen Topa in pakta het loin, a pau uh kitukalhsakin, tua mun panin thehthangin, leitung mun tuamtuam ah kikhenzak uh hi.

Pasian deih dan hi loin, mihing pilna siamna leh thahatna tawh khuapi, van a ban ding lam a sawmna uh pen lawhsam uh hi. Kithutuak deihnapi, amah langpanna ding a kithutuak a deih lo Pasian hi. Pilna siamna mihingte pia napi, amah i langpanna ding, amah sanga i liatsak, i thupisak ding a deih lo Pasian hi.

Tuhun ‘global village’ ci a, leitungbup pen khuaneu khat banga kingaihsutna, mihingte pilna siamna sangpi tak nei a, sep theihloh nei lo phial a kingaihsutna hun, Pasian deihna bang a nuntak ding sangin a puatham peuh a kiliatsak zawk hunah, bang hangin hici zahin pulnatna hong thang mawk hiam? cih ngaihsuthuai hi.

Tuhun mite in i pilna, siamna, hauhna suangin, i lungsim leh i nisim nuntakah ‘Babel tausang’ lam sawmsawm hang a, tuate bangmah lo a suahna ding, leitungbup kithutuak a Pasian zahtak lohna, neih kibang kiteenna, politics, economic lam a kitaitehna leh leitung vai nate buaipih lua hang a, tua lamah kithutuak lua, Pasian bang zong phawk man lo phialphial i hih manin, gam khat leh khat, state khat leh khat, khua khat leh khat sem khawm lo, tonkhawm lo, kalsuankhawm lo phot dingin ei mun ciatah hong khumcipna a hi kha diam?

Sing, suang, leiseek tawh ‘babel tausang’ lam kei kha mah ni. Pasian i ngaihsaklohna, i thupisimlohna, Pasian kisam i kisaklohna, mihing lam pankhop kithupi i sak luatna khempeuh vatmai dingin, babel tausang a lam mite a thehthang mah bangin, tuhun a mite ei om munah hong khumcip ahi kha diam?

Hih COVID-19 hang a linglawngna leh haksatna pen bei pah thei, beipah lo thei hi. Ahi zongin hih natna hanga i haksatnate, i tuak thute ngaihsunsun lehang, hih pen tuhun a Pasian in a hoih lama hong sinsakna zong hi kha ding hi. Leitung ah hauhna, pilna-siamna leh mihing lamah kingakna taak om lo ahihna, innkuan manphatna theih thakna, a manpha mahmah haksatna, Pasian tawh kinai zawk semna suak thei hi.

Nidangin Babel tausang hangin Pasian in mihingte pau kitukalhsakin thehthang a, tuhun ciangin Covid-19 hangin gam, khawk (state), khua khenzakin ki-om hi. Topa in bang sinsak nop hong nei hiam, cih ngaihsun kawmin hih haksatna mimal, innkuan, pawlpi adingin thupha suaksak sawm ni. ~ T. Sawm Lian