Coronavirus mimal muhdan ~ DK Khup

Coronavirus mimal muhdan ~ DK Khup

US, UK, Israel, China akipan gam pawlkhatpan zatui lam companies pawlkhat in vaccine ( sunphuk zatui/kidalna) ding a sinsin laitak uh hi. Ganhing tungah sin kipan ta uh a, tua khit teh mihing tung ah sin ( clinical trial) April kha khawng ah sin kipan ding kici hi. Mipi tungah lauhhuai nang om lo ( side effects tamlo) in sunphuk in a zat theih ding atawmpen kumkhat sawt thei dingin gen uh hi.

Antiviral drugs ( adam nang/virus zo ding zatui) ding HIV/ AIDS zataang pawlkhat akipan atuamtuam kisinsin khin ta in, China in 80 vei val sinna ( clinical trials) nei khin kici hi.

Tu ni ciang, vaccine, antiviral drug ding ahoih akituaklian amucian zo om nailo hi. Hih natna aneisate kemcip ( contain) zo in khat leh khat akilawh nawnloh nang hahkatpen in akinei ciat suak hi.

Ahoihlam in hong pai leh, khua honglum in hi leh flu namdangte mah bangin hong beibei thei ding. Ahih kei leh kilawhna tawm in damdam bei manawh ding.

Asialam in hong kizopzop khak leh leitungbup kizelnatna ( pandemic) hong hi in, mipi hong linglawng toto kha dinghi.

Tam hong kilawhdeuh leh kivaakgam nawnlo, zumkikhak, sang kikhak thei dinghi. Tutaak bel mipi kimuhkhopna pawlkhat ahunsotto( ASEAN makaite leh Trump kimuh ding aa kipan), vaanleng leh khualzinna pawlkhat kikhaktan cih ciang hi.

Asialam hongmanawh kha leh cih tawh muntuamtuam, khuatuamtuam pan vaanzat neeklehdawn ding kigingin honkhat aleikhol ki om hi ( Zomite bek ki hilo, amang avom minamkim).

Leitungah pilna siamna khangsemsem hi mah hi. Ahi zong computer virus dan mah in virus khat ki do, kidal zo leh hunkhat teh athak khat, asia zaw khat hong piang thei hi. 20th Century (1900-2000) sung smallpox tawh mi millions 300 bang, akipat pan hi leh millions 500 bang kisi in ki ciamteh hi. Vaccines ding mukhia zo paaklo mawk uh hi. HIV/AIDS vaccine ding muzo nailo in, antiviral drugs tawh adamsiang loh uh hang kumtampi nunta sak zo ciang suak lai hi. Mi millions 32 bang AIDS tawh si khin kici hi.

Pasian phalna a om leh asawtlo in Coronavirus zo zatui hong kibawl zo ding in i lamen hi. Ahi zong Pasian pen na motor lei ding a color akipan lam hong laahnop leh hong laak thei ding hi. Lamkhat leuleu ah kum 400 sungbang ( OT leh NT kikal) kilaahna om mello in adai thei zong hi leuleu hi.

Science pilna khang mahmah, leitung hauhna khang, na hoih nono kibawlbawlna tawh kizui-in mihingte kimuang mahmah in i om hunlai in Coronavirus in hong linglawngsak zo ziau hi.

Hope for the best, but prepare for the worst. Ahoihpen ding in i lamen a, lametdan hong hih kei khak mawk leh antaang akipan kigingkholh zong meidawiluatman zong hi pahlo kha thei ding hi. Hih bang lungman hun ah mihing te i dinmun hong kiphawksak in Pasian tawh kinai zawk nang, Pasian phawk nang lampi zong hi thei ding hi. Do Khan Khup