A nahlawhpek khangno te ~ Pa Vial Khan Do

A nahlawhpek khangno te ~ Pa Vial Khan Do

Leitungah tomvei nuntak sungin mi khempeuh in kidaupai nuamtek hi. A daupai, a mazang ihih theih nadingin i khangno nuntakna thupi mahmah hi. Lawhcinna pen khangno hun pan kipankhin hi. Khangno i cih pen lungsim manlang hun, thatang hat hun ahih manin i khangno hun pen thupi mahmah a, manpha mahmah hi. Tua bang hun manpha sungah i khialhkhak loh nading lunggulhna tawh hih a nuai-a thute kong hawmsawn nuam hi.

1. Pilna Masak Ding

Leitung nuntakna i a thumungpi pen in pilna ahi hi. Nuntak zonna khempeuh ah pilna kisam lo nasep khat beek om lo hi. Lo khawhna-ah pilna kisam lo hi, ci-in Zomite in kingaihsun khialkha uh hi. Tua manin i lokhawh nasep in i gam i lei hong keugawsak ta ahih manin haksatna tampi i tuakta hi. Tuhun pen pilhun hi, a kicih mah bangin lokhawhna sepna ah zong pilna tawh i kop kei leh kima-zang zo nawn lo ding hi. Leitung nuntakna ah pilna mah kisam masa pen ahih manin Solomon in zong nadang khempeuh sangin pilna mah na ngense hi. Tua ahih manin khangnote in i khangno lai-in pilna mah masak a i zon leh a nahlawh peek khangnote suak ding hi hang.

2. Nu le Pa Zahtak Ding

Arab mite paunak khat ah “Pasian pen leitung ah muhtheihin hong om thei lo ahih manin ama tangin Nu le Pate hong koih hi” na ci hi. Nu le Pa cih pen i leitung Pasian taktak ahi hi. Ahi zongin Pasian tawh kizakim hi cihna hi lo hi. Pasian tawh a kibangin thupha nei hi cihna zong hi lo hi. Pasian pen thupha naak hi a, nu le pate pen tua thupha i a luanna zawi (tuizawn) ahi hi.

Leitung nate lakah huih le meikuang lobuang, ka theihkhialh kei leh, a sangna panin a niam ah a luan, a pai a ngeina ahi hi. Tui lim ngah nadingin tuinaak puah kul a, tuizawn zong puah kulin, tuizawn nuai panin dawh kulse hi. Nu le pa zahtak cih ciangin a mai-ah kun cihna hi tuan lo hi. Zahtak cih ciangin hehsak ngei lo cihna hipah lo a, nu le pa khasiasak ngei lo, khitui luangsak ngei lo cihna hizaw hi. Nu le pa hong deihsakna khitui in tate adingin a manphat zahin a khasiatna khitui in gutui suak thei hi.

3. Lungsim Kuhkal Ding

Leitung mihingte nuntakna bulpi in lungtang ahi hi. Tua lungtang‘ nasepna tungtawnin a hong phulkhia ngaihsutnate pen lungsim kici hi. Tawlngak hun nei loin a kisaisai lungtang pen nuntakna a tawsawn thahatna bulpi ahi hi. Lungsim lam mipilte in a genna ah “mihingte lungsim pen thahat mahmah a, ahi zongin leitung ah mihing a tamzawte in a thahat mahmah a lungsim uh pen koihdak uh a, apkaisak uh hi.

Tua hi a, ama lungsim thahatna a zangsiam a citakte pen mi kuhkal kici hi. Bangzahta-in a pil a, a siam zongin lungsim kuhkal a nei lo mi peuhmah nasepna ah mazang thei lo hi. Bangmah lo zong pek nga manta ahih manin leitung ah nuntak kivakna cing lo nasep khat beek om nawn lo hi. Lungsim kuhkal mi’ nasep khempeuh pen nuntakna cing nasep suaklel ding hi.

4. Kikhalna Nei Ding

Leitung ah mimal gualnop zonna ah zu le numei kitamzatpen hi. Tua gualnopna thaang sungah mihaute, mipilte, misiamte le miliante kia, awk baih pen uh hi. Mipil misiam tampite lungsim kuhkal lo uh ahih manin ma tun zo lo uh hi. Pilin siamin lungsim kuhkal ta mah leh kikhalna (discipline) nei lo peuhmah mite’ lapsangna panin amau kibawlin kiakik veve uh hi. Lungsim kuhkal lo mite kiatna sangin kikhalna nei lote kiatna pen sangzaw ahih manin na zawzel hi. Mun sangna panin i kiat khakloh nadingin kikhalzawhna i neih ding thupi mahmah hi.

Tua bangin kikhalna i neih theih nadingin i khangno lai panin nek le dawn, silh le ten, gamtat luhek kidophuai mahmah hi. Hih tawh kisai-in ka theih thu khat kong hawmsawn nuam hi. 2009 kum sungin OM a kimawlna makaipa Sia Do Khan Khup’ huhna tawh ZOFA tangin Chaungtha ah training ka vakahkha hi. Siapa’ sapna tawh 2009 kum kha 8 kha-in Brazil bawlungsiamte Kawlgam ah hong pai uh hi.

Kawlgam bawlungsiamte tawh a kimawlkhit uh ciangin kumpi lam kimawlna makaipa in nitak an a vakna ah an khamkhit ciangin a dawn dingun kumpi zu lim nono le tuithawl koihsak hi. Khatbeek in zong zu dawn loin tuithawl khattek la-in a ciah ngelhngelh uh a muh ciangin Kawlgam mite in lamdang sa mahmah uh hi, ci hi. Leitung ah bawlung siampen Brazil-te in zu dawn lo uh hi, cih pen Zomi a kimawl khangnote in theihhuai, ettehhuai mahmah ka sa hi.

5. Kauphe In Zong Nek Muta

Miksi le kauphe tangthu i theihsa ahi hi. Kauphe pen kimawl uk a, miksi in pen nasep kin hi. Tuk tun hun ciangin kauphe in nek ding nei loin miksi kiangah an ngen hi, cih ahi hi. Hih tangthu in a hong theihsaknop thu in a kimawl khempeuh in nek mu lo ding cih hi lo hi. Hunkhat lai-in kimawlna pen gualnopna ciang bekin kimukha ahih manin “kimawlmawl leng gilkawng dim lo ding” cih ahi hi. Ahi zongin tuhun ciangin kimawlna ah kivakna nei-in a hanciamte pen lawhcing mahmah ta uh hi. Leitung ah sumlut tam neipen nasep lakah kimawlna zong kihel hi. Kauphe in kivakna, kinna, siamna hong gen a, miksi in cihtakna hong pulak hi. Kauphe in zong nek muta hi.

6. Thukhupna

Kumzalom 21 sungah i lut ciangin pilna neite sangin siamna neite in nek a muzaw uh tawh hong kibang hi. Pilna khempeuh pen nektawm pilna (applied education) tawh hong kibang hi. Pilna pen siam nading, nektawm ding ciang bekin i muhkhak leh nuntakna hong sukha ngelngel ding hi. Tua hi-a khangnote in i daupai theih nadingin pilna mah masakin nu le pa zahtak ding hi hang. “Nu le pa thumang a nahlawhpek” kici hi. Tua hileh pilna zonna ah i mazang dinga, kimawlna zong pilna ahihna phawkin a nahlawhpek khangnote suak ding hi hang. Pa Vial Khan Do (ZYA Magazine)