Condom ih muang takpi ngamdiam?

Condom ih muang takpi ngamdiam? ~ Zomi Quavadis

Dr. David Delvin (GP and Family Planning instructing doctor) in hih thu tawh kisai hibang in na gen hi. “Condom a bawlkhia companyte thugen pen a tamzaw up ding hi lo hi. Condom bit sitset siangtho taka zatna hangin numei 100 ah 92 in nau nei lo uh a, adang 8te’n naupaai veve uh hi. Pawlkhat in theilopi in a bitlopi zang thei uh a, pasal pawlkhatte leuleu in a man kuan ciangin thuah pan zanzan uh hi. Sai pan na lei Condom or a kihawm khia Condom pen et ziau in bit maw bit lo kithei zo lo hi.

Tua ahihmanin Condom pen nauneih dalna ding leh natna tawh kipelhna dingin kingakna cingtaak taktak hi lo a, mihingte a hun zuiin ih kideek siam ding thupi pen zaw hi” ci hi. Hih Doctor pa thugen tungtawn in Condom in numei pasal omkhopna pan a kingah thei natna lauhuai namkimte dal zo taktak lo a, nauneih zong dalzo taktak lo cihna hi. Na zat sawm teitei leh Expiry date en masa inla, na hon ciangin na ha tawh a bawm petkeek ken. Na khut mah tawh hong lecin kikeek/vang lo zaw deuh ding hi.

Tuhun ciangin numei leh pasal zat ding Condom kibawl ta hi. Pasalte zat Condom pen bang hunin hong kibawl khia hiam cih a tangthu tomcik en zual dih ni. Khangluithu akante’ genna panin 15,000 B.C hunlai pek a suanghawm sunga milim kisuaite tung panin Condom ahih lian loh hangin pasalte zahmawh tuamna bawm na om khin hi cih mukhia uh a, ahizongin bang dingin tua bawm pen na zangh uh hiam cih kithei zo lo ahihman in a etlawmsakna hilel in teh cih tawh thukhupna na bawl uh hi. Minam upa mahmah ahi Egypt, Greece leh India te khanglui tangthu kigelhna laibu sungah bel mun tampi ah zahmawh tuamna bawm kizatna thu muh ding om hi. Ahizongin nauneih dalna dingin a zang masa pen hiding a kiummawhte pen Japan te na hi gige uh hi.

Amau zat hun laiin tulaitak a kizanghte dan hih tuak lo hi. Ganhingki tawh a kibawl sitset bawm hoih mahmah ahihi. Nitumna lam gamte laibu sung leuleu ah Rome mite’n Condom pen nauneih dalna dingin na zang masa pen uh hi ciin kiciamteh hi. 15th leh 16th centuries hun sungin Europe gamah natna nam khat Syphilis hong kizelh ciangin kidalna dingin Condom na zangh uh hi. 20th centuries sung leuleu ciangin nauneih dalna ding ngimna bek tawh Condom hong kizang in, galpi nihna hun sungin galkapte lakah kihawm khia ziahziah ta hi.

1960 kum akipan nau khamna zatang hong kibawl khia ahihman in Condom a zangh hong tawm ta uh hi. Ahizongin 1980 kum ciangin natna lauhuai nono HIV/AIDS cihte hong tam semsem ciangin Condom pen nauneih dalna ding bek hi lo in natna tuamtuam pan kidalna dingin tuni ciang dong hong kizangh to suak ta hi. A tunga ih gensa om mah bangin Condom zatna hangin natna tawh 100% kipelh thei tuan lo a, nau zong 100% kidal zo tuan lo hi.

Condom pen hoihnapi a siatna tamzaw hi. Nupa kaal ah ki muanmawhna piangsak hi. Bang hang hiam cileh bangzah takin midang tawh om khawm taleh a tamzaw in nau nei lo uh hi. Nupa omkhopna zong a nopzah dingin nuam zo lo hi. Tuhun ciangin Condom zat ding hi ci-in mi khempeuh kihanthawn uh hi. Tua banga kihanthotna pen ganhing bangin numei pasal om khom mang gawp lel dinga kihanthotna hi lel hi. Condom om kei leh tulai khangno te hihzah takin sia lo ding uh hi. Nupa kaal kihing khenna zong hizah in tam lo ding hi. Pasian thu tawh zong kilehbulh hi. Tulai piangthakte pau leh “Pasian in laisiangtho sungah Condom na zangh un ci lo hi”.

Gennop bulpi pen a tunga ih gensa teng banah: Condom zat kul liang dingin na pumpi uk lah ding na hiam? Condom zangh lianga numei pasal mawhna na bawl pen mawhna lianzaw suak ding hi. Condom tawh nau a dalzo dingin kingaihsun ken, bang hang hiam cileh mihing abawl Pasian hi a, aman piangsak nuam peuh leh na Condom in kham zo tuan lo ding hi. Pasian zahtaak in, amah muangin a hoih in gamta peuh lecin Condom na muanna hong bei lel ding hi. (kikum toto lai ni). Francis Lamthang (Zomi Quavadis)