Cingno tawh lenna gam – 4 ~ Hau Za Cin

Cingno tawh lenna gam – 4 ~ Hau Za Cin

Zomi Christian Fellowship, Tokyo ah :: Lupna nuamtak pan tawldam tak a zingtho in, niangtui leh mohte ka nek khit uhciangin Pa Nang Lian Thang tawh Ngaih Anglai Ah film a Khualpu in Niangbawi a dawnna, “Shinjuku meileng khawlna, a kongkhak thumna ah hong kum in aw…” a cihna lamah Ngaih Anglai Ah te gamtatna lam en dingin ka diangkhia uh a, Shinjuku station ka tun uh ciang mitkha ah hih video et masak laia meileng tung pan Niangbawi hong kumkhia a, Khualpu in, “…. hai ngak thei ngak a i hong ngak hi ei” a cih lai khawng mitkha ah hong kilang zungzung hi.

Shinjuku station pen vanlengtual pan khuasung lam zuanin i pai ciang Tokyo station zawh a khuapi laizang station khat ahi hi. Tua teng ka et khit uh ciang mitkha a Shillong sangkah lai mu zuaizuai kawm in innlam ka ciah uh a, KHUADO khuang gingging ta ahih manin kikhopna lam ka zuanpah uh hi.

Zomi Christian Fellowship, Tokyo ah kikhawm masa a tawp ciang Khuado Pawi ka zang uh hi. Kikhawm dinga ka kuan uh ciang Ryogoku station pan tuangin meileng tuamtuam ka khek kawikawi zawh uhciangin munkhat ah Japan Zomi Taang Thang Hau Lian (ama thu den ciang behlap lai ni) in hong na ngaka, maan ka kizaih khit uh ciang station pua ah paikhia in Bus stand ah Bus ka ngak uh hi.

Tua Bus stand ah Delhi khuapi Munirka Veng Bus stand mahmah bangin Zomi nupi khat in nau na pua liatluat a, a naungek sawnna leeng leh a naupuan teng a pi in na khai a, a innkuanpih dangte zong na ding liailuai uh hi. A omdan uh pan galmuh bek leng zong Zomi hi ding uh cih kitel pah hi. ZCF Pastor Rev. Nang Lam Kim zite na hi takpi a, ki nohset in (kawlpau na theih kei khak uh leh kimeltheih in cihna hi) khut kilen in Topa thupha ka kipia uh hi, tua lian leh Bus hong tunga, biakinn tan ka tuangphei pah uh hi.

Biakinn pen na hoih venvan mahmaha, a khan tungnung zaw ah kikhawm ahih manun khuk ton letlet in step ah ka kahto uh a, kongkhak biangah khedap suah in biakinn sung ka lut pah uh hi. Kongkhak ah ka dak uh ciangin music ging setset tawh lasa in Zomi te’n Pasian na phat ziahziah uh a ka lawp mahmah pah hi. Nu ei, melhoih buang si e! Tutna ding lam zuan a ka pai phei laitak uh Zopuan tawh kilawm taka kizem sitset khat ko lam manawh in hong pai phei a, ka lungsim ah hia nungaknu melhoih zen si e ka ci pah hi.

Singapore ka zinlai in zong Zopuan kilawm tak tawh kizem a hong kikhawm Zolia pawlkhat mu ka hih manin, Eh hem, gamdanga om Zomi te in minam na zuun zaw uh hi veh e, ciin ka ngaihsun hi. Maan hong la pah ning ei ciin ka camera ka mek ziahziah leh kikhop tawp ciang ZCF innteknu ahi cih ka thei pah a, Zomi te zong gam hoih ah om leng i mel a tul hi tuanlo hi cih ka phawk pah hi. Zing leh nitak a lokuan te bel nungakno takpi a mel uh a hoih ding zahin hoih lo mawk hi. Kua hiamte cih dan leh – “Ngaihsun thei leng ana mah hi”.

Topa hoih hi, Kha Siangtho hong leng, Nang na siangtho, Om hithiat ning cih late ka sakkhit uh ciang Sia Nang Lam Kim hong dingto in Topa hoih hi…. kei tungah, ka innkuan sungah, ka pawlpi sungah….. ciin Topa kiphat khawm ziahziah a, tua zawh ciang kawlpau siam leh siamlo ka thuzak uh hong kikim nawnlo panpan ta hi. Sorry, hunzat kipan ta hi ka cihna hi zaw ei! he he….

Siapa in, “tu in ki meihsetna i nei dinga….” cih tawh hong pan pah ahih manin ka kianga tu Japan Zomi Taang Thang Hau Lian bang kawlpau theilo ahih manin khuahek hek lel hi. Kei bel kawlpau ka theihloh zong om a tamzawh ahih hang phamawh kasa sese kei hi…. he he… “ZCF khatvei kikhopna ahite hong ding un” a cih ciangin ka ding uh a, khutbengin hong kimuak ziahziah hi. Ka et gige leh ka mai gual veilam kiu ah Pa Hang (Ngaih Anglai Ah) in a lu su ngeungeu ahih manin ka lung hong kim pah hi. Ahi zongin Ngaih Anglai Ah Pa Hang khatbek om a, tun lah biakinn sungah nih mu ka hih manin ka mit phia hiam, ahih kei leh …. lamdang kasa hi….. a theician nuamte Japan paitek ding hi mai ei!

Zomi lasiam (Rev. Suan Za Pau zi) Sianu Sangpui in Sia David Kham phuah, “Anglai ah ka pom, Aman kei hong len” cih la hong sak ciangin hih pen Japan gam hitakpi hiam? ka ciphial hi. Zomi bekbek kimu, Zola bekbek kisa, Zolai bekbek kitawi… Topa hoih hi!

Kha an hong vak ding Yangon ah Word of Hope biakinn ah pastor a sem Sia Suan Za Pau hong dingto a, “Tuni in Pasian kammal kikum thei dinga hunpha i ngah manin Pasian min ka phat hi. ZCF te in nong letkhan manun ka lungdam hi. Pasian in hong kem dinga mimal khat ciat piahtana te phiatsii hong om pah ding hi….” hong cih ziahziah ciangin ka kianga kawlpau theilo te bel luvai veve sam in um ing. “Yangon ah Khuado Pawi kibawl dinga, kum 70 tungsiah hong nuntak pih laite letsong kipia ding hi.

Tu in mi 50 val bang min sazian kila ta hi, ” a cih khit ciangin, “Lai Siangtho Hebrew 12 sung sim ni. Kawlpau in sim mai ni, thei veve ni maw?” hong cihtak ciang Hunukpa zong a lungnuam mello hi ding hiven Tedim Lai Siangtho lem bubu pia a, “tu kum Tedim Lai Siangtho ka khatvei simna hi” hong ci leuleu hi. Ka behpa zong kawlpau na siamta si e ciin ka lungsim ah ka ngaihsun hi.

Heb 12 sung kandah thum tawh ensuk in, mun khatkhat ah anai-uu kawmkawm a, sitni leh kusapiuh te a pelh khit ciang nauhsuung, kaluciah, tung patasu te khen lamah, “i pandai i tun dongin tai ding hi hang” cih tawh hong khup hi. Pa Kam Khan Thawn ahuam thungetna leh Lia Hau Khan Ciang sumpi donte Pa Gin Khan Suan in hong apsak khit ciang “Hong sem khin hi” cih la sa in Sia Nang Lam Kim thupha piakna tawh hun kizo hi. Tua ciangin nek leh dawn ading thungetna Nu Mawi in hong nei a, a nuam penpen ZOMI KHUADO PAWI zang dingin innuai ah ka kumsuk uh hi. …zop lai ding… Dr. Hau Za Cin (Phuitong Liim)