Cidam nadingin annek thupi

Cidam nadingin annek thupi

Cidamna dingin a thupi mahmah tampi lakpan in khatpen i an nek te hoihtak in haizan ding ahihi. Hihpen mitampi in kiphawk khalo theiaa ahizongin cidamna dingin thupi mahmah hi.

Nisim in anki ne hi. Cidamna dingin hong huhthei bek hilo in ihnuntakna zongh an i nek hang ahihi.

Cidamna dingin exercise bawl ding a ki thadah theih hangin an nek ding ki thadah samlo hi. Pumpi siantho ding i thadah phialzongin an nek ding ki thadah ngam samlo hi.

Cidamna dingin septheih tampi a om te i sem nuamkei zongin an a ne nuamlo omlo hi.

Tua ahihmanin an i nek ciangin gilvah na dingbek in nelo in cidamna dingin i ngaihsut ding kisam hi.

Cidamna tawh a kituak an te cidamna tawh a kituak in nek siam mahmah ding thupi hi. Tua zah mah in i nekna peuhpeuh haizan sitset ding hoih hi.

An haizan sitsetna in gilpi sung nasepna, khuakbu sung nasepna leh pumpi sung nasepna te ah damna, hatna piangsak hi.

Siavuante hong genbangin gamtatna

A thupi mahmah khat ah: cidamna dingin siavuante hong gen bangin gamtat ding leh a thu i man ding thupi mahmah hi.

Siavuante pen Pasian a hihloh hangin Pasian piansak nate sin in Pasian in a koihsa pilna a piak te ahihi. A mauhong gente 100% a mankhitloh hangin mitampi ii zattheih damsaktheihna pilna tampi neiuh hi.

Mipawlkhat pen a damloh uh ciangin siavuante kiangah pai in zatui va dong thei uh hi. Zatui te ne in tawmkhat a noptuam khit uh ciangin siavuante vaikhak thute manggilh ziau thei uh hi.

Niangtui na dawn ken, voksa na tangin, tui hai tampi na dawn in, phone na tamet lua kei in, na lungnopna dingin na hanciam in, lam nasiau in cihbangin siavuante in damna dingin vaikhak thei hi. Tua te pen seppah ding ahihi.

Natna a damsakpak pen zatui te hi mah hi. Ahizongin natna a pianna pen tua sepding aa hongkisawl bangin i nuntakloh man ahihi.

Natna i suksiat pak dingsangin natna a piangsakte suksiat ding hoihzaw hi. Tua hileh sauvei i cidam ding hi. Siavuan te in nuntakna hongpiaktheihloh hangin khansauna dingin honghilh, hongbawl thei uh hi.

Pasian koihsa thute sin in Pasian in pilna a piak siavuante thu i manna pen Pasian ngeina sungah nuntakna ahihi. Siamsin Library