Ka muhpak US Gamthu pawlkhat (31) ~ Awn Za Pau

Ka muhpak US Gamthu pawlkhat (31) ~ Awn Za Pau

Nasep Sep Kawmsa Mah In Thaksuah Sak Den
A maantakpi in ken hong siang gen mai leng, haksapi takin laisimin tan sangpi tak ih zawh hangin, nisim nai simin ih nasepna ah kizang suaksuak kei leh ih laisinnate khangham semsemin zang kei semsem leng, a kuamah tek a tam zaw in kimangngilh lel hi.

Kei mahmah tawh hong kigenteh pah mai leng, Kawlgamah engineering tawh kisai bangah sangsiate leh zumpi a design sectionte bek mah in sangkah lai a laisimte nisimin a nasepna uhah zat suaksuak loh in phamawh hi. Tua banah, a zong thuahthuah a kan thuahthuah a thei nuam thuahthuahte a’dingin ahun tawh kizui in, a khangtoto pilnate zong ki-kanbeh thuahthuah thei lai hi. Ahih hangin sang lai tawh kizom suak aa nasepnate losiah, a tamzaw in ih sanglaite kizang kim lo in a sawtteh kimangngilh ngilh ta hi.

Ka neu lai in ka pate in zu neeksul ah la khawng a sak uh ciangin nu ve! lawmlawm aw.. a dawn thei nawn kei veng e, ka theihsa hi napi’n; ci in akigen tangtang uh ka za munn thei peuhmah hi. Tua hun lai in a theihsa lawmlawm mangngilh, thei siang taktak hi leh pawh mangngilh kenteh.. ka ci kha ngei hi. A hi zongin tuhun ciangin ka pate gen bangmah kihi ta a, ih theihsa gegu zong ki-mangngilh peuhmah thei khongta hi.

Tua teng mah thei in US ah a tavuan neihna tawh kizui in laisim kikkik ding thukhun khat in guang uhhi. Mun khatkhat ah aung letmat (certificate) nei naii lo a, nasem pawlkhat bang a nasep uh sem thei in siam mahmah gegu hi tase leh, laivuansak kik tangtangin a on kei leh a nasep bang a siamsa kimlai mah tawpsak kik mawk uhhi.

Athu khunsa a upadi uh a zui tangtang uh ahihi. Tua pen thupi kasa mahmah hi. Pilna sang tawh nasep neisate leuleu teh na nasepna tawh kisai laisin na pilnate a thak suak den ding leh a khangsak semsem dingin, nipi khat in nai tua zah peuhmah lai sim in ci in thupia hi. Pawl khatkhatte’ gentehna in zato siama (nurse) lah ahi lo mi picing lote kepna ah (nursing home) zatui piak theihna letmat kipia aa, a hi zongin a kizattheih hun ciangtan uh hi. Pawl khatkhatte kum nih in ciangtan aa kum nih a cin khit ciang in lai sin kik sak uh hi. Lai vuan sak in, a on leh kumnih ciang aa zat theih ding zatui piak theihna licence letmat thak pia leuleu uhhi. (azom omlai hi…) Agelh: Awn Za Pau