Christmas bawlzia nam 4 ~ Thang Van Lian

Christmas Sermon: Christmas bawlzia nam 4 ~ Thang Van Lian

Bang hangin kumsim Christmas bawl ihi hiam? Vantung mite in Choir lapi hong sa suk uh ahih manin Jesuh suahna pibawl mahmah uh ahihna hong phawksak hi. Leitungbuppi a hon khiapa Jesuh thupi sa ihih leh ama suah hun phawkna bawl ding zong a kilawm mah ahi hi.

1: Kumpipa Herod leh Christmas (Mt 2:1-18)

Herod pen migilo, a innkuanpihte nangawn a that lum ziauziau khat hi. A zite khat leh a tate nih zong a thatpa hi. Ama za luah ding kumpi dang a pian ding dah mahmah khalau den hi. Ama thu tawh kituak kei leh thah lup a sawm pahpah migilo khat ahi hi. Jesuh bia nuam ing, a cih hangin a that nuam ahi hi. Ama thupiakna tawh pasalno kum 2 nuaisiah a kithat 14000 val hi, ci-in kiciamteh hi. Pawlkhat in 64000 hi ci uh a, pawlkhat in 144000 pha ham tang ding hi, ci uh hi.

Tuhunin zong Herod tawh a kibang hausa khawng, veng makai leh Pawlpi makai khawng, sum nei pian khawng om thei kha ding hi hang. Herod bangin gitlohna tawh a kidim, ama zalaih ding mi limlim a deih lo, panmun khat ngah leh midang a awn nuam nawn lo, a tawntung a a ukcip nuam den mite adingin hong suak Honpa Jesuh pianna pen dahna suak zaw hi. Bang hang hiam cih leh Jesuh pen kiniam khiatna lo tawh kimu zo lo, biakna kipia thei lo ahi hi.

2. Zinbuk Neipa leh Christmas (Lk 2:5-7)

Joseph leh Mary te nupa Bethlehem khua hong tun uh ciangin zintunna ding zinbuk awng nawn lo hi, cih i zak zel thu ahi hi. Zinbuk awng nawn lo ahih manin bawng annekna kuang sungah Jesuh kisial hi. Israel mite ngeina ah zindo ding pen vantung mi zindo bangin a ngaihsut khat uh ahih manin Joseph leh Mary te innkuan adingin zinbuk awng nawn lo, cih pen amau mai ah mi na tam lua khin hi ding hi. Zinbuk neipa in a bawlsiat nop man leh a gawt nop manin zinbuk a pia lo leh a tuam bawl zong hi tuan sam lo kha ding hi.

Jesuh omna ding om lo zah dongin i nuntakna sungah buaina, manlahna leh paulap dang a tam luat leh Christmas hun a hong suak naungek Jesuh ei sungah hong suak thei lo ding ahi hi. Zinbuk neipa in zindang na hau lua khin ahih manin Jesuh suah lam phawk lo a, Jesuh bia kha lo hi. I khua i gei nai a hong suak ei hong hon dingpa Jesuh suah lam a phawk lo zah dong a i om khak loh ding thupi mahmah hi. Jesuh lo kumpi dang i lungsim leh i nuntakna ah anih in om kop thei lo ahi hi.

3. Tuucingte leh Christmas (Lk 2:8-20)

Vantung mite in tuucingte kiangah Christmas carol singing choir lapi (Zanvak la) kilawm takin na sa uh hi. Jerusam khuapi sung hi hen la, biakinn tung san tak khawngah sa le uh kilawm zaw ding tawh kibang napi tuucingte kiangah phatna lapi na kisa sese hi. Tua hun a biakna makaite thu kidong ding hi leh meeting sawm vei a bawl phial uh zongin vantung mite lasakna ding mun pen tuucingte kiang hi ta hen, ci ngei lo kha ding uh hi.

Tuucingte in Jesuh suahna thu vantung mite kiang panin a bil uh tawh za in Pasian’ vangliatna taang zong a mit uh tawh mu kha uh hi. Tua hi bek loin vantung mite’ gen Jesuh mahmah bawng annekna kuang sung a kisial mu kha uh hi. Hong suak naungek bia kha uh a lungdam maitai takin Pasian’ min phat kawmsa in ciah kik uh hi. Biakinn pan kua teng Pasian’ min phat kawm sa in inn lam i ciah hiam? Christmas sung kua teng mai gum sa khawngin i ciah hiam?

Tuni-in tual niam kisa, pangpa kisa leh lungneu kisa-in tuucingte omna gamsung tawh a kibang dinmun leh nuntakna ah a om mite adingin vantung mite in Honpa Jesuh hong suak zo hi, ci-in thu hong tangko uh ahi hi. Amen, ci pah in la, Jesuh dawn dingin hong nawh tai in! Bang dinmun bang dinmun ah om ta le hang tuni-in a hong suak naungek Jesuh en dingin na pai nak leh Jesuh na mu pel mawh ding a, lungdam sa leh Pasian’ min phat kawm sa-in Topan inn lam hong zuansak kik ding hi.

Tuucingte pen vantung mite zanvak lasak a zak bek uh tawh phasak mai loin tuute nusia-in Bethlehem dong a pai mah bangun hong suak naungek Jesuh en ding leh bia dingin paisan ding leh nusiat ding pawlkhat om tuak hi. Tuucingte in a lawhcing Christmas a zang uh ahi hi.

4. Mipilte leh Christmas (Mt 2:1-12)

Hih mipil thumte pen Sheba, Arabia leh Egypt gam pan a hong pai uh hi, ci-in kiciamteh hi. Gamlapi mun tuam tek pan hong pai uh ahi hi. Mipil hi bek loin kumpi hi, kici lai hi. Mipilte in Jesuh suahna aksi pan thei khin mu khin lel uh ahih manin lungkim ziau le uh kilawm napi tua hong suak Jesuh a bia dingin amau gam tek pan hong kuan khia uh hi. Mipilte in Jesuh suahna thu thei bek hi loin mu nuam bia nuam uh ahih manin inn leh lo khua le tui nusia-in kuan khia uh hi. Mipilte mah in Jesuh mu nuam, bia nuam uh hi. Jesuh na muh nop pen mipil na hihna ahi hi.

Jesuh tawh a kimuh uh ciangin kiniam khiatin khuk dinin bia uh hi, ci hi. Pasian biakna man taktak pen lamet leh kalh bangmah om loin kumpite kumpipa mai ah kiniam khiat a kunsuk… cihna ahi hi. Kiniam khiat a khukdinna lo tawh a lawhcing Christmas kibawl thei lo, cih ding hi. Tua bek hi lo lai-in Jesuh tawh a kimuh uh ciangin Jesuh adingin a puak uh gobawm (Treasures/bhan-dha-oh-sa) hongin Jesuh adingin van manpha pia uh hi, ci hi.

Jesuh mu dingin a pai mite peuhmah in Jesuh adingin a manpha pen hun leh neihsa thatang phal mahmah uh hi. Jesuh a mute in a nei lian pen teng a kepna uh gobawmte Jesuh adingin hong khia uh hi.

Tuni-in Jesuh tawh a kimu khat mi kua teng i om ding hiam? Jesuh tawh i kimuh manin bang teng kihong hiam? Hih pen Lai Siangtho in a gen biakpiakna man taktak ahi hi. Thupha deih man peuh, music tum nop mah peuh leh makai ut man peuh tawh a pai a kineih hi bek loin a neih lian pente mah uh kengin Jesuh bia uh hi. Jesuh tawh a kimuh khit uh mipilte a ciah uh ciangin lampi dang tawn uh hi, ci hi. Koi lam tawn ding, cih lamlakpa Jesuh ahi hi. Topa’ hong hilhna lampi i zuih theih ding thupi mahmah hi. Jesuh tawh kimuh ma leh kimuh khit khualzinna lampi tot kibang thei nawn lo ahi hi.

5. Thukhupna

Kumpipa Herod leh zinbuk neipa adingin Jesuh suahna pen Christmas lawhcing het lo suak hi. Ahi zongin tuucingte leh mipilte in ahih uh leh hong suak naungek Jesuh mu kha, bia kha uh ahih manin Christmas lawhcing a zang kha uh suak hi. Tuni-in nang leh kei in Herod dan maw, zinbuk neipa dan maw, tuucingte dan maw, ahih kei leh mipilte bang hi zaw ding? Nangma khensatna tawh kizui-in a lawhsam Christmas lah suak thei, a lawhcing Christmas lah suak thei ahi hi. A lawhcing Christmas zang thei kim ciat dingin Topan thupha hong pia ta hen. Amen. Rev. Thang Van Lian