Tedim Municipal pan Ninkhawm Mawtaw vai gencianna

Tedim Municipal pan Ninkhawm Mawtaw vai gencianna

Ninkhawm Mawtaw –Dec 15, 2017 (Fri) ni-ngani sial (every Friday) ninkhawm mawtaw Kamhau lampi leh Tedim lampi zui-in khuasungah nin hong khawm kawikawi hi. Tualo lampi dangte ah zong ninkhop ding kilungulh aa, ahi zong mawtaw pai nading lampi lemtak nailo hi. Mailam ah lampi dangdangte zong khopzawh nading ki hanciam lai ding hi.

Gencian na

Mipawl khat ten ko kum khat ai ninkhop manding piakhin hi ungh, banghang in kolam hong kipailo/banghang sum kipiak beh lai hiam a ci ki om hi.

Sipin mawtaw in nin hong khop ciang anbuk aa, meh i bawlna themnengte Gtn gualkhadi hawng/ Alu hawng etc..a tuamtuam te a khonkhong in kipaihsak hi. Tualo a dangte ippi khat 200ks ippi-liante 500 etc… cih bang kila hi.

Kumkhat ai ninkhopman phiangsiah tawh kisai kilkel lo hi. Tuazong anna (by force) in sumkila lo aa, a ngaihsun theite bek in hongpia uh hi. Ni-ngani sim ninbua mawtaw in nin hong khawm ding ahih man in Tedim lampi/ Kamhau lampi munkhat peuhpeuh ah koihkhol thei leng hoihpen hi.

Mimal Vaipuak

Tedim khuapi siangtho nading leh khantoh nading pen thunei te bek vaipuak hilo zaw aa, mimalkim vaipuak ahi hi. I omna i innsung /i huang i kim leh paam siangtho leh huih siangtho kingah aa, ki cidam in ki mavak hi. Khanglui ten zu leh va in a neekna uh anuai ah khia ci uh hi.

Mihing takpi neektheih dawntheih khat peuh peuh i neek ciang a hawng/ a bung i nuai khawngah i paihziauh pen mihing lungsim puakding na hilo mawk hi. Ninkhempeuh a nin /a eek nangawn dong in Sinpite tavuan hi ci’n a pilciakciak mipawl khat om tazen hi. Tedim ah Sipin staff mi (11) leh committee member (5) bek om hi.

Tuateng in inn 3000 val leh mi 15000 valte ninkhem peuh tavuan lazo ding ahiam? Sik-thagui zaitha a nei kuamah ki omsamlo ahih ciang. I khua leh i gam khantoh nading in mikhempeuh khutkhat tawi khe khatkhai bang mapang khawm in tuibang i luan khop ding kisam pen hi.

Sakha Mawk

Tedim khuami te’n hawkguam i muhnak leh nindum dan in ngaihsun in, ninpainuam luakisa i khut bang lingdaldal mawk hi. Ninpaih ding bang a om loh ciang suangtum peuh khuksuk lawmlawm lai mawk hi hang.

A taktak in cileng ei mau inn/huang ciat hah siangleng khuasung a siangtho hipah hi. A dang munteng sipin ten hong sem ding uh hi. Pasian in lungsim picing khat nin mawkpaih nopna lungsim neisak hetlo hi Ninbung a om kei leh zong a ip sungah pua tinten lel uh hi.

Mihing cih pen a kicing khin kuamah omlo hi,tua hi aa, thanem nading in i kicinloh nate peuh tawh i ki gengen sesang ki theisiam in i thanem nate itna tawh ki huh leng nikhat ni ciang Tuunnu Zogam zoheisa paal bang hong paallun peelmawh ding hi.

More: Tedim Khua Lampi te Part I ~ Khup Khan Thang

Et cianna kinei

Dec 14,2017 (Thursday) Sakollam veng Tuiphum biak-innpi gei aa, inn thak kilam pen Sipin thukhun tawh kituak maw/ tuaklo cih Sipin zumpan et-cianna kinei hi. Tedim Municipal