Christian te in ih khangcinna bang piciang tawh ih teh hiam?

Christian te in ih khangcinna bang piciang tawh ih teh hiam? (Majoring in Minors ii a zom hi)

Lungduaina, cihtakna, thumaanna, dikna, itna, khuangaihna, hehpihna le Khrih thu masak thuhilhna cihte tawh ih teh hiam? A thupilozaw ahi, tua banglo teng peuh tawh piciang ih tehteh zaw kha hiam? Tulai paizia (movement) tawh teh maw, LST’ thupiak (Doctrine) tawh teh? Cihtakna tawh teh maw, gamtatna? Degree tawh teh maw, sepzawhzah (service) tawh teh? A mal phazah (quantity) tawh teh maw? A hih theihna (quality) tawh? A hatzaatna tawh teh maw, itna tawh teh? Thusim lohna tawh teh maw, vaangpiakna tawh teh? Deidanna tawh teh maw, huaikimna tawh teh? A upna (Faith) tawh teh maw, a-lam-a-dian-a-otna tawh teh? A kamcidamna tawh teh maw? A thugen cidamna tawh teh? Ei Pawlpi’ paizia deihdan tawh teh maw, Pasian kammal Lai Siangtho’ deihna zia tawh teh? Adang tampi na ngaihsut beh thei lai ding hi.

Zu bangzah vei dawn? Za bang zah vei teep? TV bangzah vei en? Cih tawh midangte teh ding pen baih mahmah a, eimau’ lungsim bangzah in poi cih kiteh ding hamsazaw hi. Bangzah vei a kimu thei khialhna bawl cih sangin mihing’ lungsim ah bangzah vei kikhial cih kiteh ding hamsa zaw hi. Tua ahih manin Topa Jesuh in mihing puatham sangin a sungtawng na kawk masa den hi. Siatna hi taleh hoihna hita leh na sunglam-a na paai zahzah a pusuak ahi hi.

Mawhnei mihingte’ pianzia in ih lawhcinnate kidemna in ih nei a, cihtakna le thumaanna sangin a thupizaw ih sa hi. Ih lungsim ngaihsutna a hoihte bek ih kiciamteh a, ngaihsutna a hoih lote ih kiphawk nuam kei hi. Kipuahphat ding peuhmah ih ut kei a, ahi cipi mahin midik ih tang nuam hi. Hih banga ih thupit sakzawk thute in Pasian’ thupit sak (God’s emphases) thute nuaisiah pahpah ahih manin ih Christian gam sungah thumaanna le dikna sangin zulhzauna le pheengphitna hong khang ahi hi. Ih thupit sakzawk thute ii a gah a lo toto ih hih lam kiphawk ni. Gam le minnam a thupisakzaw mite gal le sa tawh buai uh a, Pasian’ gam le a dikna a thupisakzaw mite in gam le minam daihna ngah uh hi.

Topa Jesuh in hih bangin a gen ciangin sumpi piak ding a nial hi lo hi. Bang na ci gen hiam cih leh, “adangte nusia tuan loin hih thute na zuih ding uh ahi hi” na ci hi (Matt 23: 23b). We should concentrate on those larger issues “without leaving the others undone”. Farisi te in ahih leh a baihzaw thute bek sem uh ah, a gikzaw thute kitheihmawh bawl uh ahih manin hih bangin Topa in sunglam thu gencianna tawh a na kawk ahi hi. A sunglam thupizaw maw, a pualam thupizaw? Lai Siangtho sungah tampivei na gen hi. Mihingte a thupi lozaw a puatham thuteng tawh kipuk pahpah hi. Sumpi zong khia ding, thumaanna le dikna, khuangaihna le hehpihna zong nei ding cihna hi. Farisi te ahih uh leh a khat nusia in a khat hanciam uh a, tua a hanciam zawk uh thu pen Topa Jesuh in a thupilozaw ahihna na gencian hi. A thupilozaw thupi sak, a thupi zaw thupi sak lo, masak ding nunun nunun ding masak. Banglo teng tutna guan, banglo teng tawh buai. Majoring in minors.

Ih thupitsak, ih masak, tutna ih guat thu in ih khua ih tui, ih gam ih lei, ih nuntakna ahong luah, ahong uk ahi hi. Farisi te pen a puatham le a kimu pak thei teng mitsuante hi uh a, thukham ii a deihna a sungmu hilh lo, nuntak pih lo uh hi. Tua ahih manin Topa Jesuh in “Moses Thukham le kamsangte’ thuhilhnate a phiat dingin hong pai hi, ci-in hong ngaihsun kei un. Tuate a phiat dingin ahong pai hi loin, amaute hilhna a kicingsak dingin ahong pai ka hi zaw hi” na ci hi (Matt 5:17).

Matthai a lian nga-na bup ih sim suksuk ciangin Topa Jesuh in Farisi te’ thukham hilhzia kicing sa lo ahih manin hih bangin a gencianna tawh Thukham kicinna thu na gen sitset hi. “Hih bangdaan in a kigen in na za uh a, ahi zongin ken a kicingin ka Pa’ deihna taktak kong gen in ah hih bang ahi hi” cih bangin na gencian suk diudeu hi (Matt 5: 21, 27, 31, 33, 38 43 – ‘You have heard that is was said’). Topa Jesuh mimal mahmah pen thukham kicinna hi a, tua banah Farisi te a puatham thukham hilhna sangin a sungmu tawh Jesuh’ ong hilhna ah thukham’ deihna ahong kicing thei pan ahi hi. Gentehna in Fairsi te in, ‘Mi zi tungah na mawh kei ding hi,’ ci-in a puatham gen a, Jesuh in ahih leh, ‘Mawhpih nopna lungsim tawh numei khat a en mi peuhmah in a lungsim ah tua numei tawh a mawh ahi hi,’ ci-in a sunglam thu tawh na pan hi.

Tua hi a, thukham deihna in mikhempeuh mawhna thu tawh a kipeng thei omlo uh a, a kuamah ciatin mawhna panin Jesuh Khrih ong tatkhiatna ih kisapna thu, a thupitzawtna, a lianzawtna hong hilh hong musak nuam ahi hi. Farisi te in amau’ thukham zuihna tawh Jesuh Khrih a kisam lo ding bangkeekin kingaihsun uh a, ahi zongin thukham kicinna Topa Jesuh in ahong gencian ciangin Farisi te zong mawhna tawh a kipeng zo lo banah mawhna bupite ahihlam uh thukham kicinna in na kawk suk hi.

Farisi te pen a thupi lozaw teng a thupisakte ahih manun a nuntakna uh zong apuatham thu tengin ukcip ahih manin, tua a thupizaw sunglam thu a kigen ciangin thupi sa thei nawn lo, sang thei lo, pom thei lo, duh thei lo, deih thei lo, mu thei lo, tel thei lo, nuntakpih thei nawn lo uh hi. Tua ahih manin Topa Jesuh in ‘Mihoih a kineihkhem, no Thukham hilh syate le Farisi mite in gimna na thuak ding uh hi” na ci suk ciatciat hi. Matthai a lian 23na bup sim suk suak lehang Topa in (7)vei tak ‘nu ei!’ na cih san hi (Matt. 23: 13,15,16,23,25,27,29 – seven woes ‘Woe to you’).

Ei Chriatian tate

Ih nu ih pa ih u ih nau phone tawh hopih ding sangin midangteng hopih ding ih thupisak zaw kha hiam? Lungdam ding sangin a khasiat siam lampeuh a thupi sakzaw kha ih hi hiam? Maisak ding sangin cepteh ding peuh a thupi sakzaw kha ih hi hiam? Phat ding sangin mawhsak ding peuh a thupi sak kha ih hiam? Nu le pa u le nau tungah cit ding sangin midangte tungah cing kisa in zu le sa tawh a gualnuam ih hi kha hiam? Ngak ding sangin len mang ding ih thupi sak zaw kha hiam? (Christiante pen ngakzia tawh a nungta dingte hi hang. Topa ong pai ding a ngakte ih hih manin, na tuute cingin na ngak hiam? Tuucing lopi-in tuucing citak hong kici thei ding hiam?).

Lengla ih neih ciangin ih maitai ding sangin ih phone, ih TV, ih Computer cihte peuh tawh a kimaitai tai kha ih hi hiam? Na zi na ta sangin mite ading hun na thupi sak zaw hiam? Nasem lo-a a vak zialzialte sangin nasem semte’ nuntakna a maizum huaizaw khawng peuh na sa kha hiam? Khangnote tampitak ih nuntakna ah kisit tel pah a, bangteng ka nuntakna luah sak kha ka hiam? A thupi loteng tawh buaibuai ka hiam? Ka nuntakna ah banglo teng tutna ka guan kha hiam? A thupi lopi teng tawh a buaibuai kha ka hiam? A thupi teng ka nuai siahsiah kha hiam? Ka nuntakna ah a thupizaw nuntak khuasak ziate a hawlkhia khia, a zin sansan kha ka hiam? Athupi loteng a thupi sak kha ka hiam? (Majoring in minors) Kisittel pha ciat ni.

A thupi loteng ih thupit sak zawk leh ei zong Topa in ‘nu ei! Woe to you!’ hong ci kha ding hi. Pasian phatna ah hiphop in hymn luah hi. Thusuak in thunget ding luah hi. Min le za (degrees) in ahihtheihna (qualities) luah hi. Mihing thu in Khrih thu luah hi. By law in doctrine luah hi. Paizia (movement) in Upna (confession) luah hi. Hanciamna in hehpihna luah hi (Ei zong ih sep ih bawl hi, hehpih kul kei cihte pawl). Kipawlkhopna in Lungdamna thu luah hi (Kipawlkhop theih nading ahih leh Christiante’ ih tumdanna Khrih thu khawng zong suut lo lel ding cihte pawl daan). Kibat sawmna in ih tumdaana luah hi.

Kikhelna in thumaan luah hi (Khua hun zui-a nuntak khuasak ding hi. Thumaan peen cih bang om kei cihte pawl). Kamcidam in thucidam luah hi. Mite’ pahtak ding ut luatna in thumaan gen ding hun luah hi. Gen ngam lo toto sak lai hi. Ih mawhna hong kipholak ding launa in diktang mi ih suah ding hong luah hi. Hazaatna, elna, deidanna, kiliatsakna, kitheihmawh bawlna, duhhop huaihamna le muhdahna in itna luah hi. Luah luah luah, Luahsuk mawhna!!! Tuni ei Christian te ih nuntakna ah bangteng in hong luah hiam? Bang ih kiluah sak hiam? Nisim ih Christian nuntakna sangin biakinn suk bek thupi sak zaw kha ih hi hiam? Lai Siangtho in a thupizaw a cih thute ih kankhia thei nai ding hiam?

Bangzah ta-in pilin ih siam hangin thumaanna, dikna le khuangaihna (Justice and mercy) a om kei leh gamdaihna bangmah om thei tuan lo ding hi. Kawlgam hihzah a ih khantohlohna a bulpi pen ih pil loh man ih siam loh man hi lo zawa, dikna le khuangaihna (justice and mercy) cihnamte a om loh man, Lai Siangtho sung thute a kiniam koih zawk man hizaw hi. Kawlgam mite pen kipil thei lua, kisiam thei lua hi. Ahi zongin thumaanna, cihtakna, dikna le khuangaihna tawh nuntak khuasak ding thute ih muanglah mahmah mawk uh hi.

Ih umlah mahmah mawk uh hi. Muan ding teng nunun, muan loh ding teng masak kha hi hang. A muanhuai teng thupi sak thei mahmah loin a muanhuai lo teng peuh kithupi bawl nuam se hi. Zuih ding thute um loin, a up huai lo thuteng zui kha ih hiam? Up zawh ding thute kisin nuam lo se in, uplah ding thuteng kisinsin sese ahih manin uplah ding teng umin, upzawh ding teng a umlah khang hong piangpiang ta hi. A uphuai thuhilhsyate kipua seh sawnsawn a, a uphuai lo thuhilhsyate tutna kiguan sese hi. A thupilo teng peuh thupi guatguat kha ih hiam? A kisit tel nuam kim ciat dingin Topa’ min tawh kong zawn hi. Majoring in minors. Evan. Suang Dal