Christian Khangno le Tattoo ~ Lian Muan Kim

Christian Khangno le Tattoo ~ Lian Muan Kim

Nidang lai sangin tu hun teh tattoo kitam muh zaw a, i upmawh hetlo pawlkhat bang in zong tattoo na nei khinkhian thei uh hi. Lasa siam, music siamte leh kimawlsiamte in a pumpi tung uah nei tek keei uh ahih manin tuate a mumu i khangnote in zong tattoo hong deih semsem uh hi (Music siamte le kimawl siamte lakah tattoo neilo taktak tawm mahmah hi, ci uh hi. Tu laitak-a mi minthangte lakah Taylar Swift in tattoo a neihloh pen lamdang kisa mahmah liang hi). Tua hi-a, khangnote in tattoo a muhcil-un hoih sa khollo uh hi mah ta leh mu mun lua ta uh ahih manin hong deih ta uh hi (Mi thagol mahmahte baan khawnga tattoo eng pong mawk).

USA ah 2003 kumin mi 14% in tattoo nei uh a, 2008 kumin mi 16% in nei hi. Tattoo nei mi tam semsem ahih manin 2009 kum-a a naumilim (Barbie) bawlte nangawn uh tattoo neisak liang uh hi. A beisa kumin ahih leh mi 21% in tattoo nei uh ahih manin tattoo nei mi khang mahmah hi cih kimu thei hi (Harris Poll Research). Tattoo nei mi tam semsemin a deih mi zong tam semsem ahih leh thu-um khangnote in zong neih ding a kilawm diam? Tattoo neih mawhna ahi hiam? LST in tattoo neih ding a kham hiam? A kham leh i neih khitsa tattoo-te i phiatkik diam? A kham kei leh tu lai khuahun tawh kizui-in khangnote in zong i nei thei lel diam?

LST sungah tattoo na khen kei ung, a cihna lian omlo hi. Pasian in tattoo neih ding a phalna omlo-a, a phallohna zong om tuanlo hi. Pawlkhatte in Siampi Laibu 19:28 bulphuhin tattoo peuhmah khet vet loh ding, i khet leh mawhna ahi hi, ci uh hi:- Misite hangin na pumpi uh kuikek ahikeh na citung uh gialsak kei un. Keima TOPA ka hi hi (ZIV), ci ahih manin tattoo i khetsak leh a mawh ihi hi, ci uh hi.

A dang pawlkhatte in hih Siampi Laibu 19:28 pen Thuciam Lui sunga Judah-te tunga kipia thukham hi-a, tu hun Thuciam Thak thu-um mite tawh kisai nawnlo hi, ci uh hi. A cih zah khat-un a ngaihsut huai mahmah khat zong hi takpi hi. Siampi Laibu 19:28 cih bangin zui ding ihih leh banghangin 19:27 zuilo tuan ding – na sam neel uh meet kei un la, na khamul uh zong heuh kei un, ci hi.

A dang pawlkhatte leuleu in, A puantualpi tung leh a phei tungah, Kumpite Kumpipa, Tote Topa, ci-in min a kingelh hi, ci ahih manin Topa Zeisu in zong a phei ah tattoo nei hi, ci uh hi (Rev 19:16). Ahi zongin Zeisu pen Judah mi, thukham khempeuh a zui mi ahih manin tattoo nei hetlo zaw kha ding hi. Tua banah hih Kilaakna bu pen ‘gentehna lim’ (symbol) tawh a kidim khat hi-a, lim khat hong om leh tua in cihnopna khat a nei na hi zaw den hi. Kilaakna 19:12 ah, ‘a mittangte meikuang tawh kibang a, kumpi lukhu tampi a khu hi,’ ci hi. Aneu 13 ah, ‘sisan sunga kidiahsa puantualpi silh hi,’ cih kimu a, aneu 15 ah, ‘a kam sung panin … namsau khat a pusuakkhia hi,’ ci leuleu hi. Hih thute pen gentehna lim vive ahih zah khatin aneu 16-a ‘a puantualpi tung leh a phei tungah …’ acih zong gentehna lim mah ahi hi. A kam sung pan namsau takpi paikhia zaza lo ding a, tua mah bangin a phei tungah zong tattoo omlo ding hi. Gentehna limte pen a tua bang lianin a khiatna khiat ding hi pah lo a, a gennop thu uh i ngaih zawk ding ahi hi.

Siampi Laibu 19:28 enkik le hang, na citung uh ‘gialsak’ (tattoo) kei un acih ciangin ‘ciaptehna khatpeuh bawl/gelh/kui’ kei un cihna ahi hi. Hih kammal pen LST sungah khatvei bek mah kimu a, bang taktak a gen hi ding hiam, cih kithei zolo hi. Ahi zongin a kithei thu khat in bang hiam cihleh tattoo cih kammal pen kum zalom 17 khawnga hong kizang hi pan ahih manin LST sungah tattoo cih kammal a om na ding thu omlo hi. Kum zalom 17 ciangciang hih kammal om nailo ahih manin KJV bang in zong tattoo ci hetlo pah hi. Ahi zongin LST kitei nunung pawlkhatte in ‘na citung uh gialsak’ kei un a cih pen tattoo khen kei un, ci-in let ziau uh hi (NIV, etc.).

Pasian in Judahte tungah na citung uh ‘gialsak’ kei un a cih lai-in Judahte pen Egypt gam pan paikhia khin uh hi. Ahi zongin Egypt mite tatzia pawlkhat hong keng uh ahih manin tuate paikhia un, Egypt mite gamtat bangin gamta kei un, aci hi kha ding hi. Egypt numeite in ta a neih theih na ding uh leh nausuah gimna pan a suahtak theih na dingun a nausuah na ding mun uh gialsak (tattoo) uh hi, ci hi. Tua a gialsak uh pen a mawk gialsak uh hilo a, ‘Bes’ a kici nausuahna tawh kisai a nusian lim uh a suai ngiat uh ahi hi. Judahte in ahih leh Pasian bek mah muanga Egypt mite gamtat banga a gamtat loh na dingun Pasian in thu a hilh ahi hi.

Canaan gam a tunkhit uh ciangin Canaan mite tatzia tampi ciing uh hi. Canaan mite tatzia ahih leh a pumpi uh laitui khatpeuh tawh gialsak uh hi zaw lo a, a pumpi mahmah uh bawlsia-in meima pawn khawng omsak uh cih ahi hi. A diakdiakin pasiante a pahtawina uh maw, a it a ngaih khatpeuh uh a sih ciangin a phawkluatna hang uh maw – a pumpi uh bawlsia-in liamma omsak uh hi. Tua hi-in hih Siampi Laibu 19:28 i etkik ciangin Canaan mite tatzia a tatloh na dingun Pasian in Judahte a kham hi leh kilawm zaw hi – Misite hangin na pumpi uh kuikek ahikeh na citung uh gialsak kei un. Keima TOPA ka hi hi, ci hi (ZIV). Tua ahih manin hih Siampi Laibu 19:28 sunga a gen pen tu lai-a tattoo bel hi kei ngel leh kilawm zaw ahih manin hih mun pansanin tattoo pen Pasian in deihlo hi, mawhna hi, cih theih pah omlo ding hi.

LST in tattoo tawh kisai gen kha lianlo ahih leh en koicih ding ihi hiam? I pumpi tungah tattoo khensak thei lel ding maw? Khensat vetlo ding maw? A khenkhin sate neu-et tuam ding maw? Aih kei leh eng ding maw?

Thu-um khangno khat ihih leh tattoo i khetsak ma-in i ngaihsut ding thu pawlkhat hong sung nuam ing:

1) Hih i pumpi pen Pasian in ama lim le mel sun-a hong bawl ahih manin i suksiat loh ding thupi hi (Gen 1:26-27). I vun, i color zong ei aa dinga a hoih pen hong piak ahih manin color dang tuamtuam peuh behlapin color dang khatpeuh tawh zong khek kei ni. Sahang kamkei peuh, gulpi peuh, zawng peuh, numei guaktanga om khatpeuh, misi luguh peuh suah kei ni! Ka pumpi koicih leng Pasian lim le mel sun ahihna kilang thei pen ding hiam, cih ngaihsutin i neih zawk ding kisam hi.

2) Hih i pumpi pen Khasiangtho tenna biakinnpi ahi hi (1Cor 6:19-20). Zeisu sisan tawh hong kilei ngiat ahih manin i pumpi pen ei aa zong hi nawnlo hi. Ei deih banga zat ding hilo-a, Khasiangtho deih banga a zat ding bek ahi hi. I manphatna zong phawk a, Pasian khutsiamte ihih manin i pumpi mahmah i zahtak ding kisam hi (Eph 2:10).

3) Banghangin tattoo khen? Nu le pa tunga i lungkimlohna i lahnop man peuh ahih khak leh a khialkhin ahi hi (Eph 6:1-3). Mite in thupi hong sak tuam na ding uh maw, i lawmnu/lawmpate min i puak tawntung nop man maw, i ngaihna hong theih semsem na ding uh maw – thu dang khatpeuh hanga tattoo khen nuam ihih leh a khialkhin ihi hi. Ei aa dingin a nungta ihi nawn kei a, Pasian minthan na dinga nungta ihi hi. I ne-a i dawn zongin ihihna khempeuh Pasian minthan na ding (1Cor 10:31).

4) Koimun ah tattoo khen? Tattoo khatpeuh i muh ciangin kilim-et se hi. Tua ahih manin pawlkhatte bang in a tattoo uh pen a nuailam theithei khawngah khen se uh hi. Numeite bang a ang lam khawng uah khen se thei uh hi. A tattoo khetna mun uah mite lungsim a kai uh ahih manin koi tengah tattoo kikhen hiam cih zong ngaihsut huai hi. Zeisu a kilangsak dingte ihi-a, ei le ei a kizuak dingte ihi kei hi.

5) Bang tattoo khen? Thupi i sakte tattoo-in a kibawl ahi hi. Gulpi thupi a sate in gulpi bawl uh a, misi luguh khawng a bawl zong om hi. Thupi a sak uh thute zong gelh uh a, a ngawng khawng, a awm khawng, a khut a baan tung khawng uah gelhsak hi. Pawlkhatte bang in ‘Zeisu’ min gelh uh hi. Teci panga kinei uh hi napi LST hong sawlzia na hi khollo zaw hi. LST hong sawlna ahih leh a thu gen ding, nuntakpih ding, cih ahi hi.

6) Bangtan kimang ding? Tattoo kikhen a tamzaw pen a kiphiatkik theilote hi zaw hi. Mi a tamzaw in a tattoo-te uh khannelh uh (pilna, siamna, upna lamah) ahih manin tawl khat khit ciang deih nawnlo uh hi. A kumtam khit uh ciangin a tamzaw in a tattoo uh deih nawnlo uh a, ahi zongin kiphiatkik thei nawnlo hi. Gulpi tattoo nei pa hong pianthak ciangin deih nawnlo a, a lawmnu masa nu min tattoo-a a gelhpa in a zi lak ngam nawnlo hi – aih hang kiphiat thei nawnlo. Justin Bieber bang a tattoo khet kisik lua khin ta!).

7) Bang kilem lawh? Tattoo a kikhet ciangin si le nai tampi luang hi. Vun kidawtvang gawp ahih manin natna tuamtuam, lungno tuamtuam zong lutbaih zaw a, phim sianglo zong om thei lai ahih manin natna tuamtuam kilawh thei hi. ‘B’ lungno ‘C’ lungno icihte zong ngah baih uh hi, ci uh hi (mayoclinic.org). Tua banah a kimawk hihsak zong tawm mahmah a, a tamzaw in sum beilawh uh hi. Pasian sum tua bangin i zat ding a kilawm mah hiam?

8) Nasep zonna ah? Tattoo neite sangin a neilote in nasep ngah baih zaw uh hi, ci se uh hi (Kawlgam mite Japan ah nasem ding kideih, aih hang tattoo a neite deihlo uh, ci se). Na siavuanpa khut ah tattoo dim leh na lung a nuam diam? Na pastor pa baan-a gulpi tattoo hangin Zeisu na mu thei hiam? Nasep a pia dingin kituat le teh – tattoo nei khat leh a neilo khat, na muh phetin kua na pia nuam zaw tam? Thu hong ngetsak dingin kua na sam zaw tam? Dr. Lian Muan Kim