2018 kumthakzawh Myanmar gambup ah zinling 14 veibang omkhin

2018 kumthakzawh Myanmar gambup ah zinling 14 veibang omkhin

Myanmar gamsung ah 2018 kumthak khitzawh akigawm in 14 veibang zin lingkhinta cih Myanmar Earthquake Committee (MEC) panin Vice Chairman asem laitak ahi Myo Thant in genkhia hi. Tua zinling 14 veipen tukum January 12 dong, ni 12 sung bekbek in akigawm in zinling 14 vei apiangkhin ahihi.

January 10 nikhatsung bekbek inzong Myanmar gambup ah zinling 7 veitak om ci a, ahatlua velval bel omlo in, ahi zongin 5.8 Magnitude ciangciang phaveve hi.

January 12 ni inzong Myanmar gamsung muntuamtuam ah zinling 7 veimah omleuleu hi. Tuani zinling pen abeisa sangin khauhzaw a, Phyu khuageinai ahzong 6.0 Magnitude thakhatna tawh zinling hi.

Phyu khuagei ah zinling pen Western Bago Yoma Fault panin akipankhia kici hi. Tua zinlinna munpen Sagaing Fault panin anunglam ah 40km bang ki gamlading in ki ummawh hi. Sagaing Fault kici pen zinling ahuaisia apiang ngeikhin azawipi khat hi a, ahi zongin tuatawh kizopkhakna omloding hi ci’n Myo Thant in genkhia hi.

Tuaciangciang zinling tepen akhauhlua omlo in, aneu nonobek ahihi. Zinling akhauh mahmah atamzaw pen alingma in aneu nono lingphot cihbang omngei khollo ahih manin, hih Myanmar gamsung a zinling tezong akhauhzaw in nungzuihlo khading in ki ummawh cihi.

2016 kumin Bagan ah zin khauhtak in alin inzong aneu nono lingphot cih omlo in, thakhat in khauhtak in alingziau ahihi.

Ahi zongin 1975 kumsung in China ah zin nasiatak in linggawp in mitampitak in sihlawh hi. Tua zin alinma in aneu nono pawlkhat lingmasa in, tuakhit ciangin akhauhzaw in nungzuih hi. Tuciangciang katheihkhak tuabek hi a, tualo adang zinling akhauhte pen amasa in aneu nono lingphot cih omngei khollo hi ci’n Myo Thant in genkhia hi.

Ahi zongin Sagaing Fault kici zinling zawipi tungah khuapi honkhat kilamkha ahih manin, kidopding thupi mahmah hi. Sagaing Fault in anawkkhak, zinling athuakngei khuatepen Bago, Phyu, Taungoo, Nay Pyi Taw, Yamethin, Tharsi, Mandalay, Sagaing cih khuapi te ahihi.

Sagaing Fault tawh akinai aomkha ahi Swa khua ahzong 1929 kumin Magnitude 7.3 thahatna tawh zin nasiatak in lingngei hi.

1930 kumin Bago Earthquake kici zinlinna hangin Bago khuasung ah mi 500 val in sihlawh a, Yangon ahzong mi 50 bangin sihlawh ngei hi. Tuate ih etkik ciangin abeisa kum 80 pan kum 90 sungbang nasiatak in zinling cih omkik ngeinailo a, tua khuate ah aomkha te’n kidopding, kigin kholhding thupi hi ci’n Myo Thant in genbe hi.

More: Myanmar, Bagan khuasung aom Pagoda tungpan American numeikhat kia in si

Myanmar gambup ah 2016 kumsung in zinling akigawm in 40 bang om a, 2017 kumsung in zinling 60 veibang om hi. Ahi zongin ahuaisialua tamlo bilbel hi. Sawltak #zomidaily