Southwest China sung aom Petrol Station khatah Motorcycle hawlkhat in meihal ahih manin, tualai ah nasemte’n phelhhuan ngeingai uh cih SCMP pan kiza hi. Tua Petrol Station ah nasemte’n mei akat ciangin taisanziauding cih lungsim neihetlo uh a, anasepna ah citak in ahihtheihzah un phelhpah ngeingai uhhi.
Hih thupiang pen May 04 ni in Sichuan Province sung aom Yibin khuasung ah ahihi. Motorcyclist pasalkhat in sathau athunsak khitciangin a Motorcycle pen meisah “Cigarette Lighter” tawh halmawk hi.
China gamsungah “Oil Refiner” alianpen ahi Sinopec te neihsa Petrol Station khatah hi a, hih Motorcyclist pa ii gamtatna pen CCTV panin Video tawh kimuthei sitset hi.
Motorcycle pen meisah tawh ahawl ciangin agei aom nasem khatin meiphelhding in “Fire Extinguisher” tawh akithawi laitak, Motorcyclist pa’n Motorcycle pen sawntuk sese ahih manin meikang pen huaisia semsem hi. Motorcycle sathaubung sungpanin datsi teng kuangpah ziahziah hi.
Tuakhit ciangin tua meikuang sungah Motorcyclist papen diangsuk in, amahleh amah aki sihbawlsawm hihtuak hi. Meikuang sungah adiansuk ciangin Petrol Station ah nasem Manager Qiu Chunhu akicipa’n amanlang in kaikhia leuleu hi.
Video etnopleh: Oil suppliers put out fire on a motorcycle in a gas station in SW China
Qiu Chunhu akici nasempa mahin Petrol Station alanglam ah Motorcycle akatciploh nadingin kaihkhiatsak leuleu hi. Ama nuntakna zong khuallo in, Motorcyclist leh Motorcycle te akattumloh nadingin hanciamtak in honkhia hi. Tuahang in akhut aveilam leh atal meikang cihi.
Minute 4 sungin meikang pen kiphelhsiang theihi. Tua Motorcyclist papen kum 42 aphakhin khat hi a, aminpen Yan cihbek in kithei hi. Amah leh amah aki sihbawlsawm hileh kilawm a, Police te’n kemsuakpah uhhi.
Related: China, Beijing aom Public Toilet te ah eklai deihzahzah zat kiphallo ~ ZD
Hih Petrol Station ah meiphelh in abuaimahmah nasem mi 5 tepen Sinopec Company in paakta mahmah uh a, nungkal sungin pahtawina sum akigawm in US$9500 (Chinese Yuan 65,000) piakhia uh cih kiza hi. ZD Sawltak #zomidaily
Comment piaknop aomleh...