China gampan akibawlkhia lungtang zatui te siangtholo cih kimukhia

China gampan akibawlkhia lungtang zatui te siangtholo cih kimukhia

China gampanin akibawlkhia lungtang thahatza zatui “Blood Pressure & Heart Drug” tepen siangtholo cih Reuters pan kiza hi. Chinese Compnay te’n abeisa 2012 kumpek panin abawlkhiat uh lungtang zatui tepen siangtholo bekthamlo, Cancer natna ngahtheih nadingtawh kizom hi ci’n European Regulators te’n Tuesday ni in genkhia uhhi.

Tuabangin zatui abawlkhia pen Chinese Company Zhejiang Huahai Pharmaceutical te hi uh a, abeisa kum 6 hunlaipek akipan azatui bawlkhiat te uhpen siangtho hetlo in buaina tampi piangsak hi. Anunung ah Cancer Risk tampi omsak cimawk hi. Tua lungtang zatui tepen leitung gamtuamtuam ah ahawmkhiat uh cisawnsawn hi.

Hihvai tawh kisai in European Medicines Agency (EMA) te’n July 05 ni in amuhkhiat masak uh hi a, tuazawh akipan mipi tungah theihsakna Alarm aki genkhiapah ahihi. Tulaitak in hihvai tawh kisai in European Medicines Agency (EMA) te’n bangtanvei zatui kizangkhin in, bangciang cina te dinmun tungsak khinhiam cihte akician in akansan laitak uh kici hi.

Tua lungtang zatui sungah akihel NDMA ahih keileh N-nitrosodimethylamine kicipen in Cancer natna apiangsak hiding kici hi. Zatui lamsang pilna anei te’n hoihtak in datkhuaikhan ah “Laboratory Test” bawl uh a, tua zatui tepen sawtveipi anekha, azangkha te Cancer natna ngahthei cimawk hi.

Tulaitak in European Medicines Agency (EMA) te’n hoihtak akanciansan laitak uh hi a, thuthak New Information aki theihbehphet in mipi theihdingin hong tangkokhia phalaiding uh cihi.

Tulaitak in EU Authorities kumpi thunei te’n Zhejiang Huahai Company panin abawlkhiat zatui te kaikhawmkik in Recall abawlsan laitak uh ahihi. Tua Company panin akibawlkhia zatui peuhmah koimah zatuisai “Pharmacy” peuhmah ah kizuakthei lodinghi ci’n European Medicines Agency (EMA) te’n genkhia uhhi.

U.S. Food and Drug Administration te’nzong tua Company panin akibawlkhia zatui tepen nung Friday ni akipan kaikhawm kiksak uh cih kiza hi.

Tua zatui abawlkhia Zhejiang Huahai Company te’nzong tua zatui tepen asiangtholo kihelkhading cihpen amau ngiat inzong theihpihna genkhiata uhhi. Tua zatui tepen abeisa 2017 kumsung bekbek inzong $50 Million manbang ki zuakkhiakhin cihi.

More: Zatui azangkhat mihing sin aneknoptha suakin avengpa thatlum

Senbawl limlim Quality ahoihlam in minthang vangvang khollo a, adiakdiak in Myanmar gamsung akipuak Senvan tepen Quality hoihlo phadiak kici hi. Adiakdiak in Sengam panin akibawlkhia nektheih tuamtuam leh zatui cihte zat huaituak khollo hi. Adiakdiak in zatui zaha cihtepen cidamnop manin akilei himawk ahih manin, hanciam tentan in ahoih theitheimah leizawk, zatzawkding ki thapiak huaihi.

Kalaymyo kuamsung khawngleh Zogam khuata pawlkhat ah Sen zatui azuak kawikawi Zomi pawlkhatzong omthei hi. Mundangpan aki ngahtheilo, amaukiang bekpanin aki leithei bangkek in ahoihlam bekbekin amutmut omthei hi. Zatui zaha naleiding ciangin zatui zaha lamsang athei taktak, kumtampi asin ciatciat te kiangmah ah leihuai, zuat huai zawtham hi. Cidamloh kawmkal ah zatui atuh khawngtawh kibawlkha sawnsawnleng bangcih mawkding? Sawltak #zomidaily