China ah lungkia mite ading sih kineih khemna “Grave Classroom” kihong

China ah lungkia mite ading sih kineih khemna “Grave Classroom” kihong

Southwest China ah apasal tawh akikhen Divorcee numei khatin sih kineih khemna “Grave Classroom” khat hong cihi. Lungkiatna lianpi nei in, amau leh amau aki thatlumnuam te, nupa kikhen in luangkia mite kisihbawl taktak hileng bangci bangin omding cih a ngaihsuttheih nading un Grave Classroom ahong ahihi.

Hih Program ah akahte pen misi akivui taktakding bangin hankhuk tawhsak a, tuasung ah sialsuk in thuhilhna nei cih South China Morning Post pan kiza hi. Nung Monday ni inzong Chongqing aom mualdung ah misi vuinading hankhuk akito taktak bangin leitosuk in, numei 13 te abanban in lumsak cihi.

Hihbang Program hong pankhia pen Liu Taijie kici numeikhat hi a, amahpen 1987 kum in suak hi. A pasal tawh aki khenkhit ciangin lamet bei in amahleh amah ki thahlupsawm hi. Ahi zongin sihna leh nuntakna hoihtak ngaihsunkik thei in, amah bangin athuakkha mite honkhianuam, ngaihsut hoih guannuam ahih manin, hih Grave Classroom Program pen hong pankhia ahihi.

Ama ii genna ah apasal in anutsiat khitciang in ama ii innkuanpih te’nzong deihnawnlo uhhi. Pyramid Selling Scam ahzong khemthuak lailai ahih manin, nuntak sangin sihding utzawta hi.

Amahpen kum 19 aphak in pasal nei a, kum 21 aphak ciangin ta khatnei hi. Kum 27 aphak ciangin anasep Business supna piang ahih manin apasal in bawlsia a, anunung ah nupa kikhen uhhi. Tu in tuanu kum 30 hita hi.

Kumkhat valbang lungkia thanem in aomkhit ciangin, damdam in ngaihsutna hoih hong neikik theipan hi. Amah bangin athuak numei tampi om cih phawk ahih manin, tuate lungkiatna, sihnop liangna panin ahotkhiat theihnading in hongkipankhia ahihi.

Kahna khitui luanna in amawkna hi. Sihna inzong hih hamsatna te siangsakzo tuanlo hi. Tua ahih manin kathuaksa Experience tetawh midang te nuntakna zong ka khelnuam cihi.

Liu Taijie in hih Grave Classroom pen khanih ciangin khatveita bawlzel a, summet bawlna hilo, amawkna in akahnuam te abawlsakzel ahihi.

Tuahsiatna leh taangtun lohna cihte pen lauding hilo hi. A pasal tawh akikhen numei khempeuh in nuntakna athak kipan in, amau ii lunggulh a ngahzawh nadingin hanciam thei uhhi. Numei tepen mitung ah ki ngahlo in, amauleh amau akimuan nading ka deihsak hi ci’n genkhia hi.

Grave Classroom cihbang ahaivai tawh akibat zenzen hangin, a ngimna pen nak thupitlua mahmah hi. Zomi sungahzong hihbangdan ahipah keiphial zongin mi lungkia te thukuppihna Counselling akisam mahmah tampi omding hi. Gamdang ah Accident in atuahsia, mawtaw kibung, a inn uh meikang, buan athuak numei, nupa kitawng, kikhen cihbang khatpeuh aom ciangin Counselling neihpih tangtang uhhi. Zomi te’n e leh, pum thuaksaksak lelding maw? Ngaihsut huai mahmah hi. ZD Sawltak #zomidaily