Malaysia UN ulianpenpa in Chin Refugee te naseptheih nadingin ngetsak

Malaysia UN ulianpenpa in Chin Refugee te naseptheih nadingin ngetsak

Malaysia gamsung aom UNHCR zumpi ah alianpenpa ahi Richard Towle (Representative for United Nations High Commissioner for Refugees) in Refugee gambel te adingin Malaysia kumpi tungah ngetna khat hong neihsak a, Refugee te’n nasep theihna Right nongpiaksak uhleh amau nuntakna tampi ki lamdang saktuamding hi ci’n genkhia cih theStar pan kiza hi.

Chin Refugee te’n phalna tawh Legal takin gamsung ah naseptheih nadingin kumpi in akisam Legal Documentation nong vaihawmsak uhleh ki lungdam mahmah dinghi ci’n Richard Towle in “Refugees No More” cihtawh kisai in Screening kibawlna ah a genkhiat ahihi.

Tua The Star’s R.AGE Team te vaihawmna tawh akibawl Chin Refugee galtai tevai kikupna ah ACR (Alliance of Chin Refugees) panin Chairman Mung Khat, Refuge for the Refugees Founder leh Director asem laitak ahi Heidy Quah, Immigration Director of Operation (Enforcement) Saravana Kumar Marimuthu tezong kihelthei uhhi.

Tuaban ah Ethnic Chin kipawlna leh Rights Activists honkhatzong kihel uhhi.

Tulaitak Malaysia gamsung aom Chin Community tepen 2019 kumbei ciangin Refugee Status ciaptehna ngahnawnloding dinmun ahihi. Tuabangin 31 December 2019 ciangin Chin Refugee khempeuh UNHCR in panpihna Protection apiak nawnlohding vaitawh kisai in phutkhakding hamsatna tuamtuamte Community makai te’n pulakkhiatna neithei uhhi.

2019 kumbei takciangin Chin Refugee tepen Refugee Protection ngahnawnloding uh a, amau adingin agam uh ahi Myanmar ah ciahkikding maw, ahih keileh Malaysia gamsung ah omtheih nading bangmah neinawnlo “Undocumented Migrants” in omdingmaw cih hiphot hi ci’n Richard Towle in genkhia hi.

Hihvai tawh kisai in Myanmar gamsung ah ciahkikding cihpen muanhuai taktak dinmun hinailo hi ci’n ACR Chairman Mung Khat inzong pulakna neithei hi. UNHCR te ii muhna ah Chin State pen lungmuanhuai dinmun “Safe to Return” himahleh ataktak in Chin te adingin lungmuanna taktak omlo hi.

Malaysia Immigration Director ahi Saravana inzong tuavai tawh kisai in Chin Refugee tepen thagum tawh agam uhah aciahding in ki pumsawlloding hi ci’n genkhia hi.

More: UNHCR Representative Richard Towle tawh kimuhna

Malaysia kumpi lampanin MyRC akici Identification Program pen kipankhin a, Refugee leh Asylum Seekers te’n kibawlthei hi. Ahi zongin hih MyRC Card pen Malaysia gamsung ah kimatloh naciangding geelna hi a, MyRC Card in naseptheih nadingin phalna pialo hi ci’n Richard Towle in genbeh hi. Tua ahih manin Chin Refugee te Malaysia gamsung ah naseptheih nading leh naupangte sangkahtheih nadingin nong vaihawm saktheih uhleh amau te ii nuntakna ah tampitak ki lamdang sakding hi ci’n UNHCR ulianpa in Malaysia kumpi tungah angetsak ahihi. Sawltak #zomidaily