“Burma Campaign UK” Director pa Kawlgam lutnading Visa kipialo

“Burma Campaign UK” Director pa Kawlgam lutnading Visa kipialo

“Burma Campaign UK” pen atomin “BCUK” zong kici a, UK gamsung London khua ah 1991 kumin akipankhia ahihi. NGO (Non-governmental Organisation) khatin akipan hi a, Kawlgamsung ah Human Rights leh Democracy kiptak in aki ngahkiktheih nading ahanciam mahmah kipawlna khat ahihi.

Tua Burma Campaign UK ah tulaitak Director asempen Mark Farmaner akicipa hi a, Kawlgam zinding in Visa a ngetleh kipialo cih Mizzia pan kiza hi. Thailand, Bangkok aom Myanmar Embassy ah Visa angetleh pianuamlo in na nawlh uh cimawk hi. (Mark Farmaner pen Photo sungah anunggual ah ading pasal pen hi)

Mr Farmaner in agenna ah amahpen 2004 kum akipan Visa Ban List sungah kihelzel a, ahi zongin ngahkikzel cihi. 2004 kumin khatvei Kawlgamsung vahawh ngei a, tuakhitzawh Kawlgam ahawhkikding ki khakcip hi. 2010 kum Election khitleh Aung San Suu Kyi aki khahkhiatkhit cianginzong khatvei Myanmar Visa ngetna abawlleh ngahlo hi.

2012 kum April khasung in khatvei ngahkik a, Kawlgam zinthei hi. Tuakummah 2012 June kha ciangin ahawhsawmkik pen Visa kipialo leuleu hi.

Burma Campaign UK ah aseppi uhpen Human Rights leh Democracy vai ahih mahbangin Kawlgam ahawhsim unzong Aung San Suu Kyi tawh kimu tangtang uhhi. Aung San Suu Kyi aki khumciplai huninzong khatveivei Entry Visa ngahtheizel himahleh tu’n Aung San Suu Kyi’ Party in Kawlgam ah kumpi asem hi a, banghangin Visa kipialo hiam cihpen ngaihsunhuai mahmah hi.

Hih Visa hongki piaklohna hangin ka khualzinna kakhawlsawmpah hetkei a, abeisa Than Shew leh Thein Sein te kumpi seplai hunte mahbangin Kawlgam gamgi aom gamkhatpeuh panin kaluttheih nading kanhanciam veveding ci’n genkhia hi.

Aung San Suu Kyi makai aseplaitak in hihbangdan in Kawlgam hawhkulding cihpen ka lam en ngei hetkei cihi.

Tuesday ni in Bangkok aom Myanmar Embassy panin Kawlgam luttheih nadingin Visa anget hi a, ahang bangmah genlo in Visa kipialomiau hihtuak hi. Aung San Suu Kyi tawh akimuzel, Human Rights leh Democracy vai alimsep mahmah Burma Campaign makaikhat Kawlgam banghang ki lutsaklo cihpen lamdang simtham hi. ZD Sawltak #zomidaily