Bunghawm le Niangtui hainih

Bunghawm le Niangtui hainih

Mihingte i nungtakna sungah nasep silbawlna, gentheih gaksatna le gualnopna, dahna thu tuamtuamte tawh nisim kibuai den hi. Ni khat nai 24 pen kicingsak lah liangin i buai hun teh “Bunghawm khat le niangtui hai nih” thu i phawk den dingin kisam hi.

Nikhat, sang naupangte Philosophy a hilh Professorpa a class sungah van pawlkhat tawh kigingsa in na om hi. Sangnaupangte a kim ciangin, Siapa in pau mello-in, Bunghawm khat hong lakhia aa, tua sungah goft tang hon khat thunsak hi. Goft tangte bunghawm a dim ciang, Siapa’n “a dim nai hia?” ci-in naupangte dong hi. Amau, “dim mah ei,” ci-in dawng ngeingai uh hi.

Siapa in, suangsi hai khat tua goft tang lakah sun beh in, a sinlitlit pian suangsite lutsuk in bungdim leuleu hi. A ngei mah bangin naupangte kiangah, “a dim hia?” a cih leh, “dim mah Sia aw” ci-in thukim ciat uh hi.

Siapa’n a ban zomin, sehnel haikhat suangsi kawmlakah sungsuk leuleu hi. Petpet ah, sehnel tengin bungsung mun awng khempeuh hong dimto sak hi. Siapa’n hong dong leuleu in, “naupangte aw, a dim taktak hiam?” a cih leh, kituak takin “dim mah hi Sia aw,” ci-in dawng khawm uh hi. Siapa khawl nai tuan lo-in niangtui hai nih bawl tadih a, bung sungah sun beh zel mawk hi. Sang naupangte nui ngeingai uh hi.

“Khaileh! ci-in a nui zuahzuah teng hong daih teh Siapa in, “a kua maciat in hi bunghawm pen na nuntakna bang un na teltheih ding uh ka deih hi. Goft tangte pen na nuntakna uh a thupi diak ahi, na Pasian, na innkuanpih NulePa, zi-le-tate, na cidamna le na uk diak uh khatin ngaihsun un.

A dang na khempeuh om lo-in, hih a thupi diakteng neipeuh lecin na nuntakna uh a dim hilel hi. Suangsite ahih leh, a dang i nasep tuamtuam, inn le lo, mawtaw cih bangte in bulh ding hi. Sehnelte leuleu ahih leh a dang nengneng a thupi lualote ahi hi. Hih sehnel pen bung sungah kithun masa hileh goft tang le suangsite kita nawnlo ding hi.”

Siapa in a thugen zomin, “I nuntaknate tua mah bang hi. I hun le thatangte a thupi masalo nengnengte tawh i beisak leh, a thupi zawtham na dangte a dingin mun awng om nawnlo ding hi. Tua ahih manin, na nuntakna a nopsak ding nate thupisak masa in. Na zi na tate tawh hunnuam zatsiam in.

Na cidamna ding kinbawl masa in. A om theilo thupi nate ahi goft tang bangte kin masa in. A kisam diakte lenkip masa in, adang nengnengte pen sehnel hisak in,” ci hi. Tua a cih laitak, sang naupang numei khat in a khut lamin, “Sia aw, niangtui hai nih e leh, bang a deihna aa?” ci-in dong hi. Siapa nui kawmsa in,”lungdam ei!, hi nong dot theih” ci kawmin;

“Hi niangtui hai nih pen, na nuntakna bangzah takin vai thupi tuamtuamte tawh na buai tateu zongin, na lawm it khat tawh niangtui na dawn khop hun ding, na kikholh khop hun ding om teitei hi,” cih teng Professor pa in hilh hi.

Manlah kawmkalpi mah a itna niangtui hawp kawm-a holim khopzel pen MANPHA se hi.

Kiholimna pan, ‘Kimeltheihna khanga, kimeltheihna pan ki-itna piang hi. Ki-itna omna ah kilemna kipan hi. Kilemna om peuh leh ma kipangkhawm thei hi. Mapan khopna ah gualzawhna om hamtang hi’.

Tua banah tangthu sunga bunghawm pen i nuntakna limlak hi a, tua i nuntakna bunghawm sungah goft tang bangin a thupi pen ahi, Pasian mah i koih masak ding hong phawksak hi. Pasian koih masa kha lo-in, sehnel, suangsi bang ahi leitung na tuamtuamte peuh i guan masak khak leh i nuntakna ah Pasian tazo nawnlo dinga lawhcinna kician ngah lo-in, tangsapna vive hiden ding hi.

Hi thu Topa Zeisu in tel lua mahmah ahih manin Mathew 6:33 ah, “Pasian Gam le ama dikna zong masa un, tua hipeuh leh adang nate hong kipiak beh ding hi” cih thu hong hilh ahi hi. Pasian masak peuh leng leitung hauhna, gualzawhna, lungdamna cihte in hong nungzuih dinga, thupha khempeuh tawh kidim nuntakna i ngah thei ding hi. Hih Thute Manpha Sa Lua Ni Teh!