Tonzang ah Zomi Idol kidemna omding

Tonzang ah Zomi Idol kidemna omding

Athu: Lasiam Kidemna Ah Sapna | Atung a thu tawh kizui in Leitungbup Zomite Lasiam Kidemna Global Zomi Idol Season 2, 2020 ih neih sawm hi. Leitung mun tuamtuam a om Zomi khempeuh kidemna hi a, gam tuamtuam pan in a siampen mi 20 te lamka khuapi (India) ah 2020 kum April kha 16 – 18 sung kidem ding hi. Akhatna US Dollar $ 5,000/ (Dollar tul nga) kipia ding hi. Akidem zia ding anuai a dan hi:

• Myanmar Top 5, India Top 5, Malaysia + Singapore Top 3, USA + Canada Top 3
• Australia Top 2, Europe Top 2,
• Avekpi gawm Top 20.

Kawlgam sung ah Yangon, Mandalay, Kawlpi, Tamu, Tedim, leh Tonzang khuapite ah zong Blind Audition (kidem nawina) neih ding in gelna om hi. Tedim leh Kawlpi ah kibawl khin hi. Tamu ah November 17, 2019 ni, Yangon ah November 24, 2019 ni leh Tonzang – Cikha ai

Tonzang ah November 20, 2019 ni ih bawlsawm hi. Tua khuapite ah mun khat pan in Top 3 ta kitel khia ding a, Tonzang – Cikha ai Top 5 kitel khia ding hi. Tua teng khempeuh in Kawlpi ah kidemna nei ding a, tualak pan mi 5 kiteng khia ding hi. Tua mi 5 teng Lamka khuapi (India) ah va kidem ding uh hi.

Tonzang gambup Lasiam Kidem Nawina (Blind Audition)

• Ani : November 20, 2019 (Wednesday)
• Amun : Vialnang Memorial Baptist Church (VMBC Tuiphum Biakinn)
• Ahun : Zingsang nai 10:00 am (Kidem nawina/ blind audition) & Nitak nai 6:30 pm in Lengtong Kam Khen makai in Top 10 teng kidemna, Laksana leh thapiakna tuamtuam

Note:

• Tonzang – Cikha pan Top 5 teng Tonzang ZOMUS leh ZYA-Tonzang in Pahtawina piading hi.
• Hih Global Zomi Idol (GZI) Season 2 Pawipi pen Zogam Artistes Association (ZAA), Zomi Music Uplift Society (ZOMUS), leh Zomi Innkuan USA (ZIUSA) kipawl khawm a kibawl ahi hi.
• A ut peuhpeuh ciangtanna omlo in kidem thei hi.

Kidem nawina ah Music kihello ahi zong in, Music tawh ahi zong in, Karaoke tawh ahi zong in, ut bangbang in kidem thei hi. La zong deih bangbang Zola khatpeuh saktheih hi. Top 10 sung ah kihelkha te in nitak hun ah Music Band tawh asak kul ding hi. Tua ding in Lataih hun ding kiza sak ding hi.

Lasak akiden ding peuhmah in November 18 ni nitak nai 6:00 pm ma in Sia Kimpu (Ph. 09256270536) leh Pa Siampi (Ph. 09451819426) te’ tung ah na zasak un.

Hih lai na khua/veng/pawlpi sung ah hehpihna tawh nong hawmsakna ding un kong thuum uh hi.

Committee Aitangin; Pa Thang Suan Mang (Secretary, ZOMUS Committee. Tonzang) | Rev. Thang Suan Kim (President, ZOMUS Committee, Tonzang)