Buhkaang ~ Hau Za Cin

Buhkaang ~ Hau Za Cin

Shillong Tyrannus Hall ah ka omlai un ka annhuanpa uh a min Arun, India mi, vai, kalapa in zong “Buhkaang” mah ci damdam sam hi ei.

“Buhsih leh Aksa” pen Zomi te ann duh pen leh a lim pen-a i neih hi a, tu hun ciang namdang tawh kikhawl in, leitung khantohna in hong nawk ciangin ann nam tuamtuam i kim i pam ah hong kizuak in, a neizo deuhte bangin minam tuamtuam ann ne kha ta a, India gam nangawn ah zong Chinese Food “Chowmien”, “Chowfaan” khawng kine ziahziah ta hi.

Buhsih i huan a, mei kuang tungah phul ziahziah in a tui i diit a, a tuidiit te kuangsungah koih in a khal liuh leuh ciangin sikkeu tawh i hawp a, a lim dan! I gilvah zo liang hi. A tui diit khit ciangin buh bel pen mei-am saikhia in mei-am tungah i koih a, meigei ah kihai in, a kimkot ah a kihai kim matengin kilakhia lo a, a kihai kim ciangin a min sitset – aksa tawh meh theih hong hita hi. Tua banga meikuang tunga kihuan, mei-am sa tungah thuk pangah a kihai Buhsih zah a lim leitungah omthei nawn diam ka ci mai hi. A huan, a suan, a hai, leh a tuidiit nengneng a sawt hang in. Na up kei leh gam sungah gamgiak in meipi tungah anhuan inla, ne mah dih……

Ahi zongin leitung khantohna hong manlang semsem in singkhuah tawh annhuan hong bei deuhdeuh in, huih tawh anhuanna, meitha tawh anhuanna cihte hong kizang deuhdeuh ta hi. Khuata ah a om pawlkhat sim loh khuapi ah a khangkhiate bangin singkhuah tawh meh leh buh te kihuan hi cih zong a thei nawnlo ding hita hi. Singlukhap zong a thei nawnlo dalzeen tampi ki om ta inteh.

Tua banga khantohna mun ah sing tawh ann kihuan nawnlo ahih man in Buhkaang muh ding hong tawm hiai hiai hi. India Cooker tawh i huan leh i huan khial mahmah kei leh a kaang om theilo a, meitha electric cooker tawh i huan leh buhkaang omlo seem hi. Shillong Tyrannus Hall ah bel singkhuah mah tawh Buh leh Sa kihuan ngekngek ahih manin Buhkaang pen lim se hi (mi 27 ading).

Kum 1991 a Shillong Tyrannus Hall ka lut ciang besan (dailuah) leh siimmai (alu) kilim nek pian ahih manin a sawtna ciangin kicimtak a, buhkaang tawh ne le’ng buhkaang muinam veuveu in i lawp kamsak tuam ahih manin anhuanpa kiangah ka ngen zel uh hi. A taktak in bel buhkaang pen a lim kaat leh bang kha a, limlo hi. Ahi zongin a lim kaat vetlo, a san hiuhiau te pen nak lim lua mahmah a, a limna a theiphot te adingin zongsang loh phamawh hi. Tua a limna pen (ka neknek ciangin lawmte in zong hong eng uh a), hong theih uh ciangin ka anhuanpa uh Arun kiangah “Buhkaang” ciin ka kituh ngeingai zel uh hi. Annek hun pawlkhat ah bang ko sang Arun lungkham zaw hi. Ahang: Buhkaang omlo!!

Tua zahta a minthang leh a lim ngaungau, a ciil vitvet Buhkaang pen a khiatna ka Naga lawmte kiangah ka gen ciangin hi sa mahmah uh hi. Tuni dong ciang tua lawmte in zong Buhkaang mah lunggulh dingin ka lamen hi.

Mi pawlkhat in, mun pawlkhat ah buhkaang pen ne lo, duh lo, a limna theilo ahih manin leh gilpi in zolo cih paulap in pai thei mawk uh hi. A kine thei ciang-a lim buhkaang hilote bel paih ding himah. Akine thei buhkaang te bel lim ngaungau hi ei. Gentehna in tulai China gam bawl electric cooker ah anhuante adingin buh pen a kaang ngeilo hi mawk hi. Minlo cih zong omlo hi mawk hi. A tui tamlua, a tui tawmlua cih zong kigen lo hi mawk. Zomi numei zolia khempeuh in bel nidangin Buhhuan khial ngeilo uh hiven, tu hun ciang khialh theihloh dingin a huanna bawlzaw ta uh hi. Mihing nuntak hong dawn mahmah ci ni.

Tu sun, sun ann ka nek ding ciang Buhsih ka et leh a kaang sa in ka nek leh a kaang lah na hilo, a kaang dektak lah hi si, a vanglak mahmah khat na om a, tua in nidanga College kahlai a Hostel buhkaang ka kituh ngeingai lai uh hong phawksak ahih manin Zolai zuunna in hong at mawkmawk hi ing. Zolai in buhkaang limna zong ki at thei hi mawk ei.

Buhkaang nek loh zawh a sawt mahmah ta hi mawk ei. Upate pau kawmpak leng, naupan lai, phalbi zingsang vasa vai ding ciang meikhuk ah mei-am tungah zanni tak a buh khing pen lompi khat ki-em kaang in, tua tungah ci phulh ziau in, a gei pan pet kawmkawm a singgah bawm vasa beng dingin kikuan khia hi mawk hi ven…….

Lasiam Thawn Kham la hong phawksa e:

Sum zong pai zong zinsuk zintoh khuapi sungah ka om a,
An lim an al ne in inn hoih sungah ka om zong,
Khuapi sungah omdan, khawldan, nuntakziate cimtak ing,
Kil bang khanna vangkhua mu bang ngai ing e
Tun leh zua leh laizom teng aw tang bang na dam uh hiam aw,
Sian in naubang kem hen thelnah lel in banzal hong len ing,
Va bang lenna khuambang luahna khuasung hu gingte ngai ing,
Cik ciang tung ding vai bang ngaklah ta’ng

Sakkik:
Mim bang pianna vangkhua nuam,
Pianna tunnu saumang nuam,
Lailung gel zalmang in man den ing e,
Cik ciang vai bang kong tung diam,
Galkhua in hong don zel ing,
Pianna vangkhua mu bang hong ngai ing e.

Sa bang tatna va bang lenna khuasung lamsuk lamto te,
Solkha vangtang nuai ah lungtuak lia leh tangte lungtuak in lengkhawm,
Zingsang ansuk gingte, sangkah dak ging, biakinn dak gingte
Ngilh ni omlo, benghem in zaza ing e
Ni leh gang leh pi leh pu leh beh leh phung tenna vangkhua,
U leh nau, veng leh pam, it leh ngaih teng tui bang kicinna,
Nopna dahna kinoppih, dahpih khuapih tuipih te,
Itna damtui luanna Zogam kham vangkhua.

Tang khuakhal in lenmui kai in pengpelepte hong ham ciang,
Vailo kuan in anteh pawi in mehgah mehteh kisuan a,
Innkuan nuntakna ding lo kuan, sing pua, sum zong pai zong te,
Khawi leh vulh leh khoi leh tuk phung bang cing hen.
Thulguah hong kia lummei nuai ah lo hunna kilong gingte,
Benghem in za ing e thei bang senlai sa bang ka tatna,
Phalbi zingdai nuai ah thangsiah thangvil vasa ka bet lai,
Vangkhua lo gam kuamte mu bang ngai ing e!

Khuapi ah moto khu diik dinga zing thawh liailuai sangin Zogam mualdawn vangkhua ah zingdam huihsiang nung hiauhiau diik dinga i thawh sitset mah nuamzaw mawk ei mataw, guai!! Dr. Hau Za Cin (Phuitong Liim)